Ioane 17

Kua Tatalo ia Iehu mo ona Hoko

1Kua uma te lea atu o Iehu i te mea iēnei, oi kikila ake ai ki te lagi ma lea vē, “Te Tamana, kua pa mai te itūlā. Fakailoa ko te mamalu o te Ataliki, kae ke fakailoa ai e te Ataliki te mamalu o koe. 2Auā na kē tukua ki ei te pule ke pule ai i tagata uma, kae ke ia mafaia ai oi fōki atu te ola fakavavau, ki a te ki lātou uma na kē filifilia ke mulimuli ki a te ia. 3Ma ko te uiga o te ola fakavavau, ko te iloa o koe, te Atua moni e tokatahi, ma te iloa o Iehu Keliho, tē na uga mai e koe. 4Kua uma te fakailoa e au o te mamalu o koe ki te lalolagi; kua uma te fakataunuku e au o nā gāluega na tuku mai e koe ki a te au ke fai. 5Te Tamana, fakailoa ko i te taimi nei e ala i tō fakatahi ma au, toku mamalu, te mamalu nae ia te au fakatahi ma koe, ka ko hēki faia te lalolagi.

6“Kua uma te fakailoa e au o koe ki a te ki lātou uma na kē filifilia mai te lalolagi, ke mulimuli mai ki a te au. Ko nā tino iēnei e a koe, na kē tuku maia ki a te au. Kua uhiuhitaki ki lātou ki tau kupu, 7ma i te taimi nei, kua ki lātou iloa ko nā mea uma na fōki mai e koe ki a te au, e mai ia te koe. 8Kua uma te tuku atu e au ki ei o te fekau na tuku mai e koe ki a te au, ma kua ki lātou taliagia; e iloa e ki lātou e hako ko au na hau mai ia te koe, ma talitonu ko koe te na uga maia au.

9“Ko au e tatalo mo ki lātou. Ko au e hē tatalo mo tagata o te lalolagi, kae mo ki lātou uma na kē filifilia ke mulimuli mai ki a te au, auā e a koe ki lātou. 10Ko nā tino uma e ia te au e a koe, ma ko nā tino uma e ia te koe e āku; ma ko toku mamalu e fakailoa, e ala ia te ki lātou. 11Ma i te taimi nei, ko au ka fanatu ki a te koe; ka hē toe i ei au i te lalolagi, kae e i te lalolagi ki lātou. Te Tamana Paia, puipui malu ki a te ki lātou i te mana o tō igoa, te igoa na kē tuku maia ki a te au,#17.11 puipui malu ki a te ki lātou i te mana o tō igoa, te igoa na kē tuku maia ki a te au; ko iētahi tuhituhiga e lea mai I te mana o tō igoa, puipui malu ki a te ki lātou na kē filifilia ke mulimuli mai ki a te au. kae ke tahi ai ki lātou e vē ona tahi koe ma au. 12#Hal 41.9; Ioa 13.18Ka koi i ei au ma ki lātou, na puipui malu e au ki lātou i te mana o tō igoa, te igoa na kē tuku maia ki a te au.#17.12 na puipui malu e au ki lātou i te mana o tō igoa, te igoa na kē tuku maia ki a te au; ko iētahi tuhituhiga e tuhi ai I te mana o tō igoa, na puipui malu e au ki lātou na kē filifilia ke mulimuli mai ki a te au. Na leoleo e au ki lātou, ma e hēki i ei he tino o ki lātou na galo, vaganā ai te tino na tonu lava e galo — kae ke taunuku ai te kupu i te tuhituhiga paia. 13Kae nei, ko au ka fanatu ki a te koe, ma ko au e tautala i nā mea iēnei i te lalolagi, kae ke fakatumulia ai o lātou loto, i toku fiafia. 14Kua fakailoa e au ki a te ki lātou tau fekau, ma kua inohia ki lātou e tagata o te lalolagi, auā e hē mai te lalolagi ki lātou, e vē foki lava ko au e hē mai te lalolagi. 15Ko au e hē lea atu ke kave kehe ki lātou mai te lalolagi, ka ko au e lea atu, ke puipui malu ki lātou mai ia Hātani. 16E hē mai te lalolagi ki lātou, e vē foki lava ko au e hē mai te lalolagi. 17Ko tau kupu ko te meamoni. Ke kavea la te kupu tēnei ma mea e ofo kātoatoa atu ai ki lātou mo koe. 18E uga atu e au ki lātou ki te lalolagi, e vē lava ona uga mai au e koe ki te lalolagi. 19Ona ko ki lātou, e ofo kātoatoa atu ai au mo koe, kae ke mafai ai foki ke ofo kātoatoa atu ki lātou mo koe, ma te fakamāoni.

20“Ko au e hē tatalo mo ki lātou oioti, kae vēnā foki mo nā tino kua talitonu mai ki a te au, e ala i a lātou takutinoga. 21Ko au e tatalo ke mafai ki lātou uma ke tahi. Te Tamana, ke tahi ko ki lātou ke vē he tino e tahi, ma ke tahi ki lātou ma ki mātou e vē oi tahi koe ma au ma tahi au ma koe. Ke tahi ki lātou kae ke talitonu ai te lalolagi ko au na uga mai e koe. 22Na tuku atu e au ki a te ki lātou te mamalu na kē tuku maia ki a te au, kae ke tahi ai ki lātou, e vē lava ona tahi ia koe ma au: 23ko au ia te ki lātou ma koe ia te au, kae ke mautū ai to lātou tahi, ke iloa ai e te lalolagi ko au na uga mai e koe, ma ko koe e alofa ki a te ki lātou e vē ona alofa mai koe ki a te au.

24“Te Tamana, kua kē tuku maia ki lātou ki a te au, ma ko au e fofou ke fakatahi ki lātou ma au i te mea e i ei ai au, kae ke ki lātou kiteagia toku mamalu, te mamalu na kē tuku maia ona ko koe e alofa mai ki a te au, ka ko hēki faia te lalolagi. 25Te Tamana āmiotonu, ko koe e hē iloa e te lalolagi, kae e kō iloa koe, ma e iloa e nā tino e mulimuli mai ki a te au, ko au na uga mai e koe. 26Ko koe na fakailoa e au ki a te ki lātou, ma ka kō faia pea lava te mea tēnei, kae ke ia te ki lātou ai te alofa o koe e vē ona ia te au, ma ke i ei ai foki au ia te ki lātou.”

Currently Selected:

Ioane 17: TNT

Highlight

Copy