Ioane 20

Ko te Toetū o Iehu

(Mataio 28.1-8; Maleko 16.1-8; Luka 24.1-12)

1I te taeaopō o te aho Hā ka koi pōuli, na fano ai ia Malia te Makatala ki te tugamau, ma na ia kitea ai ko te fatupae nae pupuni ai kua kave kehe. 2Oi vili ai ki a Himona Petelu ma tētahi hoko nae alofa ki ei ia Iehu, ma lea vē atu ki ei, “Kua kave kehe e ki lātou te Aliki mai te tugamau, ma e hē ki mātou iloa pe kua tuku e ki lātou i fea!”

3Oi olo ai ia Petelu ma tētahi hoko ki te tugamau. 4Nae fētutuli uma ki lāua, kae na fakahao e tētahi hoko ia Petelu ma na pa muamua ia ki te tugamau; 5ma na punou ifo ki lalo oi ia kitea ai nā kie vavae e tatitia i kinā, kae e hēki fano ki loto. 6Oi hau ai ia Himona Petelu, nae mulimuli mai i ona tua, kua fano hako ki loto o te tugamau; na kitea e ia nā kie vavae e tatitia i kinā, 7ka ko te meakie nae nonoa ai tona ulu e hē i te mea e i ei nā kie vavae, kae kua fetufetu ma tatia kehe mai. 8Oi fano ai foki ki loto o te tugamau tētahi hoko, tē na muamua pa ki ei; na kitea e ia ma na talitonu ai. ( 9Ko hēki mālamalama lelei ki lāua i te tuhituhiga paia na lea mai e tatau ia ke toe tū mai i te oti.) 10Oi toe olo ai nā hoko ki te mea nae nonofo ai.

Kua Fakailoa ia Iehu ki a Malia te Makatala

(Mataio 28.9-10; Maleko 16.9-11)

11Ka ko Malia kua tū i fafo o te tugamau kae tagi. E tagi lava ma punou ki lalo oi fātio ki loto o te tugamau, 12ma na ia kitea atu ai ni agelu e toka lua e kofu papae, e nonofo mai i te mea nae i ei ai te tino o Iehu, ko tētahi i nā fogāulu ma tētahi i nā vae. 13Kua fehili mai ki lāua ki a te ia, “Te māfine, he ā te tagi ai koe?”

Kua lea atu ia Malia, “Auā kua kave e ki lātou toku Aliki, ma e hē kō iloa pe kua tuku e ki lātou i fea!”

14Oi liliu ai ia Malia ki ona tua ma ia kitea ai ia Iehu e tū mai; kae e hē ia iloa ko Iehu. 15Kua fehili atu ia Iehu ki a Malia, “Te māfine, he ā te tagi ai koe? Ko ai ta koe e hakili?”

E vēake lava ia Malia ko te tino tēnei te ia kikilagia nā togālākau, oi lea vē atu ki ei, “Te aliki, kāfai na kē kavea te tino o toku Aliki, taku mai ki a te au te mea kua kave e koe ki ei, kae ke fano au oi kaumai.”

16Kua vāgana atu ia Iehu ki a te ia, “Malia!”

Kua fakahaga tonu atu ia Malia ki a te ia ma lea vē atu ki ei i te gagana Epelu, “Lāponi.” (Ko tona uiga “Te Faiakoga.”)

17Kua vāgana atu ia Iehu ki a Malia “Koe nahe paki mai ki a te au, auā ko au ko hēki fanake ki toku Tamana. Kae fano ki nā uho o oku oi lea ki ei, ko au ka fanake ki toku Tamana ma te koutou Tamana, ki toku Atua ma te koutou Atua.”

18Oi fano ai ia Malia te Makatala oi lea ki te hau hoko ko te Aliki na kitea e ia, ma taku ki a te ki lātou te mea na lea ake ai ki a te ia.

Kua Fakailoa ia Iehu ki ona Hoko

(Mataio 28.16-20; Maleko 16.14-18; Luka 24.36-49)

19I te pō o te aho lava tēnā, te pō o te aho Hā, na potopoto ai te kau hoko i loto fale kae loka te faitotoka, auā e mātataku i nā takitaki o Iutaia. Oi hau ai ia Iehu oi tū i te mea e i ei ai ki lātou, ma vāgana vē mai, “Ke ia te koutou te fīlēmū.” 20Kua uma te vāgana vēnei atu o Iehu, oi fakaali ai ki a te ki lātou ona lima ma tona itū. Na fakatumulia te hau hoko i te fiafia i te kiteaga e ki lātou o te Aliki. 21Kua toe vāgana atu ia Iehu ki a te ki lātou, “Ke ia te koutou te fīlēmū. E vē ona uga mai au e te Tamana ki te lalolagi, e vēnā foki ona uga atu koutou e au ki te lalolagi.” 22Oi mānava atu ai ia ki a te ki lātou ma lea vē atu, “Talia te Agaga Paia. 23#Mat 16.19; 18.18Kāfai e fakamāgalo e koutou nā agahala a nā tino, e vēnā lava ona fakamāgalogia; kāfai e hē fakamāgaloa e koutou, e vēnā foki lava ona hē fakamāgalogia.”

Ko Iehu ma Toma

24Ko tētahi o te kau hoko e toka hefulu lua, ko Toma (e fakaigoa ko te Māhaga), nae hē i ei fakatahi ma ki lātou i te hauga ki ei o Iehu. 25Oi taku ai ki ei e iētahi o te kau hoko, kua vē atu ki ei, “Kua kitea e ki mātou te Aliki!”

Kua lea atu ia Toma ki a te ki lātou, “Kāfai au e hē kikila ki nā māila o nā fao i ona lima ma tuku ki ei toku muamuālima, ma tuku toku lima ki tona itū, e hē mafai au ke talitonu.”

26Kua teka atu te vaiaho e fokotahi, nae fakatahi ai foki te kau hoko i loto fale ma nae i ei ai ia ma Toma. Ko nā faitotoka nae loka, kae kua hau ia Iehu oi tū i te mea e i ei ai ki lātou ma vāgana atu vēnei, “Ke ia te koutou te fīlēmū.” 27Oi vāgana atu ai ki a Toma, “Tuku mai tō muamuālima ki eī, ma kikila ki oku lima; papae mai tō lima ki te māila i toku itū. Ia koe la nahe toe māhalohalo, kae talitonu.”

28Kua tali atu ia Toma ki a te ia, “Toku Aliki ma toku Atua!”

29Kua vāgana atu ia Iehu ki a te ia, “Ko koe kua talitonu ona kua kē kiteagia au? Amutia nā tino e talitonu kae hē ki lātou kitea au!”

Ko te Ala na Tūhia ai te Tuhi Tēnei

30E lahi nā fakailoga na fai e Iehu ka koi fakatahi ai ia ma ona hoko, e hē tūhia i loto o te tuhi tēnei. 31Kae kua tūhia nā mea iēnei kae ke talitonu ai koutou, ko Iehu ko te Mehia, te Ataliki o te Atua, ma e ala i te koutou fakatuatua kia te ia, ka maua ai e koutou te ola fakavavau.

Currently Selected:

Ioane 20: TNT

Highlight

Copy