Matio 2
2
Akiíyí wíy, e bùn wán woo Jesus
1Vé‑eè dzə̀ə́ Jesus a dzə̀ é ntèʼ ye á yoŋ ji Betlehem, e mbìv wòŋ yee Juda, a ghán sin si‑iì dzə̀ se Fòn Heror‑iì sáʼ woŋ woo shooy. Akiíy ámóʼó nèn dù wìy e Jerusalem, aá ló fó wòŋ wúmóʼó wo wú dzəə̀n é mbìv ye shùy yii tó fo fo. Á wáa wìy bèy, a dzətí jii, 2wan wo á dzəən ji Fon wìr veé Juda sà bèé á? Áwune dzə́r bèn a, bìʼ fo vé‑ee yenen, a sàŋ və ló, e nèn a wìy a ji á bun wun.
3Á lòo dzətí, kí tó e Fòn Heror kitùʼùr, vifíi və́ ví bír, vé wìr veé Jerusalem vi bvəə́rí sá adzə̀m. 4Wù nèn tòóy vitú ve atàá cù wùn à wír ve vé‑eè duŋrì nsər Nyùyi adzə̀m. Á wìy, wù dzə́r aáwune jii, á sà‑aà sàŋ ji á wíy dzəə́ *Mfə̀ə́r wo Nyùy‑iì kàʼàn a dzə̀ feé á? 5Á bìnèr jii, kí‑iì dzə̀ á ji á wíy dzəə́ e ntèʼ yee Betlehem, e wòŋ woo Juda fèn. A dzə̀ mo *ŋgaà ntum Nyùy wùmòʼ‑oò saŋen ji Nyùy suuy a jii:
6 #
Mayka 5.2. «Wò woo shintèʼ shee Betlehem e nsay Juda,
lá à yòʼ a kwàʼtì ji bó à yòʼ kér kilíŋ
e mvə̀m ntèʼ seé Juda se sí tíy mbìy.
Kilíŋ ké ki kùʼ, bìʼ fo ŋgaà saʼ wíy fəə fo wò mvəm,
a dzə̀ wo wù wíy a dànèr wír vém veé Isray.»
7Heror yú bey, e nèn kwàr akiíy viy bámbám, wùn áwune dzə̀ʼə̀m, wù bónén, e dzə̀tí ghán se sàŋ woo shooy‑ii fəən. 8Á suúy, wù nèn tiìsí jii, áwune du é Betlehem, e bònen tàʼ wán woo shooy a fo fo. Á taʼ, yéné, á wìy, e sùúy a wun, é wun du sá, e dù bùn.
9Áwune nèn lò, a dù. Á lòo dù, e kfə̀n yèn sàŋ wo áwune‑ee yenen aáwuné wòŋ və̀y, a wù du fo mbìy, danèr áwune. Wù dù, e tìím fo wàn‑eè dzəə̀n. 10Mo áwune kfə̀n yenen sàŋ və̀y, a wù danèr áwune, á wáa ker kishéʼrì ke ghaʼán kí, wúné wáa bòŋ áwune. 11Á dù, e mèé fo wù tiimen, e nə̀ə́ e lav, e yèn wán wùn yè wov Maria, e tsə̀m e wǎn si, e bùn. Á bùn, e nèn mvə̀ʼtì vibam vév, e fə̀ə́r vifá ve kimbùnfòn, a ví dzə̀ jii, *kisha ke mbàm ke baar kí wùn à kiláy kee *frankinsen ki, à kee *mer ki. 12Áwune lò, e lòo kfən aáwuné wòŋ, e nèn gwàm dzə́ə fó səné, bìʼ fo Nyùy‑iì tirin áwune é njèm ji á wáa yen a fó kfə̀n dù ji á yén Fòn Heror.
Joosev wùn à wàn sám, e dù e Ejiv
13Áwune lò, nshìylav Nyùy Tàr siíy, e wìy, e sùúy e Joosev e njèm jii, «Nànène, e lì wán wùn kiyìy kí, é vèn áwune sám, e dù e wòŋ Ejiv, a dzə fo, e meé e ghan se m wíy suúy ji à wáa kfən. M suuy bèn, bìʼ fo Fòn Heror sí taʼ wán woo shoon ji wun yúyrí.»
14Joosev ku nèn nànèn vitsə́ʼ, e lì wán wùn kiyìy kí, wùn áwune léʼ, e dù e wòŋ Ejiv. 15#Hosea 11.2. Á ku nèn a dzə fo, e meé e ghan se Fòn Heror‑iì làyìn. Á wáa dzə e Ejiv bèy ji kinyo ke Nyùy‑iì tiisin e ŋgaà ntum və wùmòʼ kí fiʼ gheén. Wù‑uù sùúy jii: «M fə̀ə́r ne wán wom fó wòŋ Ejiv.»
Heror yúyrí wón veé Betlehem
16Mo akiíy víyi loòn, Fòn Heror siíy, e kìíy ji á bòʼtí ne a wun, kí nyár wun, wù wáa ŋeèy, e fə̀ə́r vé rərí, e tùm é Betlehem wùn ǎ mbùʼ see fó ghaŋ si ji á yúyrí á wón vee vilum vee kèʼ fó viya vibaà, e kfə̀n kfə́nén é bàm adzə̀m, a dzə̀ ghán sin se wù‑uù yuun fo akiíy víyi ji vé‑eè kèʼ, a yen sàŋ. 17Á yúyrí wón vin bèy, kí nèn ghèén mo *ŋgaà ntum Nyùy woo Jeremia‑aà suuyin jii:
18 #
Jeremia 31.15. «Shirəə́ shi kóʼ fo Rama,
yòv kpu kóʼ fo fo, aá diy kibiíbí.
Dzə̀ Racel wo wù diy wón və́,
aá sə́mer ntéŋ,
a dzə̀ bìʼ wón və́ ve á yòʼ dzə̀ə́.»
Joosev wùn à wàn kfə́n é Naasarer
19Wáa dzə e ghan se Fòn Heror‑iì làyìn, a Joosev kù dzə̀ə́ e wòŋ Ejiv, wù yén nshìylav Nyùy Tàr é njèm, yì suúy shó jii, 20«Nànèn é yuv, e lì wán wùn kiyìy kí, é vèn áwune wáa kfən e wòŋ Isray. Kú a kiíy ji wír ve vé‑eè taʼ, e laàr wán woo shooyi kpùkír ne.»
21Joosev nèn nànèn, e lì wán və̀y wùn kiyìy kí, wùn áwune wáa kfən e wòŋ Isray. 22Wù lòo dù, e yù ji Akilor woo wan Fòn Heror yì ne a ntaʼ tàr wov, a saʼ e mbìv wòŋ yee Juda, wù nèn a fàn fó dù fo. Nyùy kfən tìr wun e njèm ji lá wù yòʼ dù a fo. Wù nèn tèém, e dù a dzə̀ é mbìv wòŋ yee Galeli, 23a dzə e ntèʼ ye á yoŋ ji Naasarer. A kí‑iì kòóy bey ji kinyo ke *ŋgaà ntum Nyùy wùmòʼ‑oò yiìn ne fìʼtì ki fiʼ ghèén. Wù‑uù fìʼtì jii:
«Á wíy a yòŋ *Mfə̀ə́r ji wír woó Naasarer.»
Currently Selected:
Matio 2: LNB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2022 CABTAL