Matio 3
3
Kinyo ke Joon woo Ŋgaà Wáyndzəv
(Maak 1.1‑8; Luk 3.1‑18; Joon 1.19‑28)
1Wáa dzə e ghan fóo fèy, Joon woo Ŋgaà Wáyndzəv nèn fəə̀, e dù, a fìʼtì e woʼ ye yí dzəə̀n é mbìv wòŋ yee Juda jii, 2wíri biner á melív mev. Ghán se Nyùy sí lo, a saʼ vifon və́ sí sì á fo mentsə̀m. 3#Aysaya 40.3 (Grik). A dzə̀ wun woo Joon wo Aysaya woo ŋgaà ntum Nyùy‑iì fiʼtì jii:
«Jì wìr fúŋ fo kwaʼ jii,
‹Á náŋsín dzə́ə Tàr,
e naàrì, é bo wù wáa wìy.› »
4Joon‑eè dzə́ e kwaʼ, kúr ndzə̀y se vé‑eè baan e wuy nyàm ye á yoŋ ji *kamer, síŋ e kikuúví kí. Vifá və́ vé yi vi‑iì dzə̀ ŋguùmé, a wù kfə́r, lá dòŋ. 5Wù lóo fìʼtì kinyo kfə́ é kwaʼ, wír veé Jerusaleme nèn a fəəkír adzə̀m, a yuurí. Wíri kfə́n a wìy fo ntèʼ seé Juda foo fèy símóʼ sí sidzə̀m, a wìy sa fo mbìv wòŋ yeé ghaa ndzəv ye á yoŋ ji Jordan. 6Á wáa wìy bèy, a tuuné ajay vév, Joon wáa way áwune é ndzəv ye á yoŋ ji Jordan.
7Wù lòo yen, a wír veé mbìv *Farasi wùn à veé mbìv *Sadusìi wiy sa ji wù wáy áwune é ndzəv, wù yòŋ aáwune jii, «Abúv vìn, tìr la ven, bo vèn wáa wìy, a kwàʼ ji dzə̀ vèn bòy fó ŋgeʼ ye Nyùy wíy màʼ e věn kitu? 8A dzə̀ vèn kù tòmbìy, a yiì vinyo ve ví wáa dìn ji vèn bìnèr ne rú melív men. 9Lá vèn yòʼ a kwàʼ kwàʼàn ji vèn kù sì wír Nyùy ji bìʼ fo vèn dzəə̀n rám Abraham. A dzə̀ Nyùy lì tíy sin, e bìnèr ji rám Abraham. 10Vèn wáa kiíy jii, á nàn ne njàm ji á sí gwar vicí ve bó ví yòʼ koom vifá ve juŋ vi vidzə̀m. Aá yíi mèn, à gháŋé shó, e tòn e və̀y.»
11Joon kfə́n a suúy jii, «M wáy wíri é ndzəv lèn ji á bìnèr ne melív mev. Yii bèy, wìr wùmòʼ wiy fo mǒ bàm, a wù kùʼ, e shaà mo, a bó m yoʼ fə̀m ghèén fó keerí alábáʼ ŋgaàŋ. Wù yíi wìy, é wù wáa way kfə́ wíri a dzə̀ e Kiyoy ke Ranén kí kiwo, a way ámóʼó é və̀y. 12Wù wíy lòo wìy, é wù wáa ker júy rə e wùn kiwo, e fetí sáŋ shó. Wù féti, é wù báʼtí sáŋ, e lèm, e yèr mvə́y, e tòn e və̀y wo wú bo ghán sidzə̀m.»
Joon wáy Jesus e ndzəv
(Maak 1.9‑11; Luk 3.21‑22)
13Wáa dzə e ghan see shooy, Jesus lò fo mbìv wòŋ yee Galeli, e dù, e yèn Joon é ghaa ndzəv yee Jordan ji wù wáy á wun e ndzəv. 14Joon nèn a shaʼnín, a suúy jii, «Kì yíi way wò mo é ndzəv, kfən wìy wò ji m wáy wò e ndzəv moó le?» 15Jesus bìnèr jii, «Wòsò ku yiì ke kí dzəə̀n ji á yii lèn, e fíʼ yiì kinyo ke Nyùy taʼ kidzə̀m, é kí wáa dzə réŋréŋ.» Wù suúy bey, Joon nèn biìmé, 16e wày wun e ndzəv. Kù mo Jesus fəə́ fo ndzəv, shúu yuví mvə̀ʼə̀m, wù yén, a Kiyoy ke Nyùy ki sə́ʼəy fo fo e njà kibìŋ. Kí wìy, e dzə̀ʼə̀m e wùn kitu. 17Jì wìr súŋnín fó yuv jii, «Və̀n dzə̀ Wán wom, m koŋ wun feyì, m shéʼri wun e ŋàŋ.»
Currently Selected:
Matio 3: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
