Luk 10

Jesus túm wír nshòv sibaà e msaàmbà

1Kee shooy ki shaà, Taàtá Jesus shóʼtí wír nshòv sibaà e msaàmbà,#10.1: nshòv sibaà é msaàmbà; Aŋwàʼ ámóʼ vee fó ŋgùʼú kér jii: msaàmbà. e shèmér fo mbìy abaà abaà ji á du é ntèʼ sí, a ghan virə́ʼ ve wun yíi a shaà sho vidzə̀m. 2Wù lòo tum, e sùúy aáwune jii, «Vifá ve á wáa kav vi kùʼ ne e ŋàŋ, a vé kavi dórninè. Vèn ku nèn a lon fo taà sùm ji wù tsə́nsí vé lìme, aá káv vifá və́ vee shooy. 3Vèn wáa dù rì. Lóo dù, vèn wàa kiíy ji m tùm ven, a vèn du moo wón njiì ve á du, e nəə́ e nyám se bi sí wo. 4Vèn lóo dù, lá á yòʼ lì mbàm, kìn kibam, kìn alábáʼ ámóʼó. Vèn fəə́ e dzəə, lá á yòʼ a tiím ji á shaʼtì wír. 5Vèn du, nəə e lav ye á nəən shó, vèn tòmbìy shàʼtì jii, ‹Nyaáŋ wáa dzə e lav fèn.› 6A wìr wo wù koŋ nyaáŋ dzə̀ é lav, é Nyùy ku nèn yiì, é wù wáa ker nyaáŋ. A bó wù yòʼ dzə̀, é Nyùy nèn siìr shaʼtì yee shooy e vèn. 7Mo vèn nəən, vèn gòʼ, a shiíy a dzə̀ é lav foo fèy, e làa yòʼ a tumsín melav. Kifá kidzə̀m ke á yíi a fo e vèn, vèn kù a yi yiín, a no, e làa yòʼ a woomé, bìʼ fo ŋgaà lìm kù dzəə̀n wùn à vilaʼày və́ ví. 8Vèn nəə e ntèʼ, á səə́si ven, wáy e lav, lá vèn yòʼ a nyàʼ kifá ke yi ke á foon e vèn. 9Vèn wáa fèr vé yàsíi é ntèʼ fóo fèy, e kfə̀n a fìʼtì ji ghán se Nyùy sí wìy a saʼ vifon və́ e wír vee shooyí mvəm sí sì á fo mentsə̀m. 10Vèn nəə e ntèʼ, á tén fó səəsí ven, vèn ghàn, e jàŋ dzə́ə sidzə̀m jii, 11‹Kibvər ke vèr liìn fo věn ntèʼ fen ki kìne mo vèr sí kfətì fo věr wuù. Kí ku kfə̀n e věn vitu. Yii bèy, vèn ku yòʼ a kiíy ji ghán se Nyùy sí wìy a saʼ vifon və́ sí sì á fo mentsə̀m.› 12A m suuy e vèn jii, wíy lòo dzə e kishiíy ke Nyùy wíy a tinén nsaʼ, é ké ntèʼ yee shooy ki foy, e shaà ké Sodom.»

13Jesus lò, e yòŋ jii, «Éè wìr veé Korasin, éè wìr veé Besayda, ŋgeʼ dzə̀ yéen. A mò‑oò yii viŋgaʼnìn ve vinyò ve mò‑oò rə́si yii e věn ntèʼ vin, a dzə̀ é ntèʼ see Taya wùn Sidon, bo vé‑eè yiì ne bìnèr melív mev fó ŋgùʼ, e màʼ ndzə̀y sé kpu, a ser e kibvə̀r. 14Vèn wáa kiíy jii, wíy lòo dzə e kishiíy ke Nyùy tínen nsaʼ, é ké wìr veé Taya wùn à veé Sidon vìn ki boŋ, e shaà kén. 15Aà, ké ven vee wír veé Kapeenahum, vèn kwaʼtì ji Nyùy wíy koʼór ven, aá kúy, e mèé e yuv a? Àáy, wù wíy sèn sènèn, é vèn sə́y áàŋkfəə́ wòŋ.»

16Jesus lòo màysì, e sùúy e vé ntum vìyi jii, «Wìr wo wù yuúri kinyo kén, ŋgaàŋ yuúri a dzə̀ kém. Wìr wáa káy ven, bo ŋgaàŋ káy a dzə̀ mo. A wìr káy mo, bo wù káy a dzə̀ ŋgaà wo wù tumen mo.»

Kinyo ke dzə̀ aŋgàa ntum Jesuse wàa sheʼrí

17Wír vee nshòv sibaà e msaàmbà vìyi ghán, e kfə̀n é bàm, a ker kishéʼrì ke ghaʼán kí, e yòŋ Jesus ji Tàr, a bi sho jii, «Vèr dzə́ bèn, aá yoŋ yír yé, a fə̀m dzə̀ *anyùy, á kù a yu ver.» 18Jesus bìnèr jii, «Dzə̀ rú, mò‑oò lo yèn, a Satan njáʼám fó yuv, e gbù e nsay moo kishèv. 19Vèn yén ri lèn, m fò ne ven vitaáví, vèn wáa nyèŋrì abúv wùn aàŋgámé, e kfə̀n fò ven vitaáví, vèn gháʼ dzə́ə sé Satan woo ŋgaà menàŋ sidzə̀m, a bó yòʼ dzə̀ kinyo ki sə̀ʼ ven gheéy. 20Yii bèy, lá vèn yòʼ a sheʼrí a dzə̀ anyùy ve á yú ven. Vèn wáa sheʼrí a dzə̀ ji Nyùy sàŋ ne yír sén é ŋwàʼ woó yuv.»

Kinyo ke Jesus shéʼri

(Matio 11.25‑27; 13.16‑17)

21Mo Jesus suuyin vinyo vìn, Kiyoy ke Ranén kí nèn ŋàʼár shilív sə́, wù wáa sheʼrí, e yòŋ Nyùy jii, «Éè Tàr wor, sáʼ wò yúv wùn à nsay. M beerì wò, bìʼ fo wò‑oò lìtìn vinyo vìn fo wír ve á din vifií, e lìtì fo akiíyí, e dìn a dzə̀ áàmbúʼú. Tàr wor, dzə̀ rú, kù‑uù sìysì wò kinyo kee shooy mo wò‑oò kòŋèn.» 22Jesus kfə́n a suúy jii, «Tàr wor wày ne vinyo vidzə̀m e mǒ kiwo. A bó yòʼ dzə̀ wìr kìíy mo mo woo Wán dzəə̀n, kù jòʼsì wun woo Tàr. A bo yòʼ dzə̀ sá wìr kìíy Tàr wor və̀n, kù jòʼsì mo woo Wán wùn à wír ve Wàn shoʼtin ji wun din Tàr wov shóo.»

23Wù lò, e bìnkìr, a sə̀mrì e wón və́ lìme jii, «Vishí vén vi bòŋ feyì, vèn wáa yen vinyo vìn e sí yéné. 24Vèn wáa kiíy jii, *aŋgàa ntum Nyùy anín wùn aàfone‑eè sí diy feyì ji á yén vinyo ve vèn yén vìn, e kfə̀n yù ve vèn yú, e làa yòʼ a ker dzə́ə.»

Ŋgàn yee kùm wír woó Samaria

25Wìr wo wù kiìn nsər wùmòʼ nèn wìy wìy, a woór kinyo, a dzər e Jesus jii, «Ŋgaà Yèʼey, kinyo ke dzə̀ m kù yiì, e bóo nəə́ e dzə̀ʼə̀m yee là may ki dzə̀ ka?» 26Jesus dzə́r shó jii, «Á sàŋ é Ŋwàʼ Nyùy ji wìr wáa yiì ka? À yoŋ ké yú ji ka?» 27#Remrí 6.5; Cù 19.18. Wù bìnèr jii, «Á sàŋ jii, ‹Wìr wáa kòŋ Nyùy Tàr woo Nyùy və shilív shidzə̀m, e fò kitú kfə́ shó kidzə̀m, a lìm fo fo vitaáví və́ vidzə̀m, e tìír vifií a dzə̀ é wùn wó.› A kímóʼ kí dzə̀ sá jii, ‹Wìr wáa kòŋ fə́r və mo wù koŋ kitú kfə́.› » 28Jesus koóy jii, «À bìnèr rú. Kú a yiì rì bèy, áà wìy lùŋ.»

29Wìr və̀y nèn lò, a wovrí, a dzər e Jesus jii, «A dzə̀ m kìíy wír wo dzəə̀n fə́r wom é le?» 30Jesus bìnèr a dzə̀ é kimfèr jii, «Wìr wùmòʼ‑oò lò fó Jerusalem, a səy e Jeriko. Wù lòo dù e dzəə, ashóŋé koó, e sòr vifá və́ vidzə̀m, e bùʼ, e màʼ fo, e nyèŋ. Wù nèn a neŋ fo, a wù sí kpú.

31«A wìr wùmòʼ kì ghán sa e dzəə fóo fèy, a dzə̀ taà cù. Wù yén wír və̀y, e bàr dzə́ə, e nyèŋ nyéŋén. 32Wìr wùmòʼ nèn kfə̀n wìy, a dzə̀ wír woó ram Levi ye yí yii leey fo lav cù. Wù meé fó, e yèn wír və̀y, e bàr sa dzə́ə, e nyèŋ nyéŋén. 33Wùmòʼ woo wír nèn dù, a wìy, a dzə̀ wír woó wòŋ woo *Samaria, a wùn à wír veé Judàa yii bannìnè. Wù bvə́y fó, e yèn wír və̀y, mendzən mè ku yòʼ rə̀r wun. 34Wù dù fo, e wày meluʼ wùn à meŋgvə́r#10.34: Meŋgvə́r mèn wùn à meluʼ mèn mè dzə̀ kifú ké shìv fo wír veé Judàa. mè e wìr və̀y vileemé, e kùr, e dzə̀ʼə̀r e wùn kitu ke nyàm, e dù sho e lav ye vé ghane yii laʼ, shiiy sho, a leéy fo fo. 35Wùn wun shiíy, yì rán, wù yén ŋgaà lav, e fə̀ə́r mbàm, e fò shó, e sùúy jii, à siiyì, à wàa leéy fo wìr və̀n. Aà sìíy, e kfə̀n jìvír mbàm símóʼ sí, e shaà sin, m lóo kfən, é m siir.»

36Jesus fèr bèy, e dzə̀r e wìr və̀y jii, «Fo wìr vee ataár vìn, à yén ké ji wìr wo wù dìnèn ji wun dzə̀ fər wìr wo ashóŋé‑eè gharin və̀y dzə̀ la?» 37Wù bìnèr jii, «Dzə̀ wo wù‑uù shamen mendzən me wìr woo shooy.» Jesus nèn sùúy sho jii, «Dù ri, a yiì sa bèy.»

Jesus ghán Maata wùn Maria

38Jesus wùn à wón və́ lìme yiì lò, e lòo dù, e mèé e ntèʼ yìmòʼ, a wiíy wùmòʼ dzə̀ fó, aá yoŋ ji Maata. Wù nèn lòn ji Jesus wiy á kiŋgàn e wùn lav. 39Wù‑uù kér fə́r və woo wiíy wùmòʼ, aá yoŋ ji Maria. Mo Jesus duùn, e nə̀ə́, Maria ku nèn dzə̀ʼə̀m a dzə̀ e Jesus ghaŋ, a yuurí kinyo ke wù‑uù yéʼeyì, 40a Maata kù kaŋkàŋ kfə́ a dzə̀ ké ntar. Wù yiì lò, e sàyín, e dzə̀r e Jesus jii, «À yèn, a fər wom máʼtí ne, m wáa tàʼtìn vèr mòʼón, la à yòʼ a ghay à? Ku sùúy, é wù wáa sə mo.» 41Taàtá Jesus yòŋ jii, «Maata, Maata, à kaŋkàŋ, tuʼtìn e mvə̀m vinyò vinín, 42a kinyo ke kí dzəə̀n é shií kí dzə̀ kimòʼón. Maria shòʼ ne kee shooy, a bó á yòʼ dzəə́ wìy sə fo fo.»

Currently Selected:

Luk 10: LNB

Highlight

Copy