Luk 9

Jesus túm wón və́ vee nshòv sibaà e ghvə̀m

(Matio 10.5‑15; Maak 6.7‑13)

1Jesus wìy lò, e yòŋrì wón və́ lìm vee nshòv sibaà e ghvə̀m adzə̀m. Á báʼtí, wù fó vitaáví ve dzə̀ á wàa jùm *anyùy ve á jívir wíri, e kfə̀n a fèr ayàsí. 2Wù nèn tùm áwune ji á du, a fìʼtì e wíri mo sáʼ Nyùyi dzəə̀n, e kfə̀n a fèr aŋgàa yàsí. 3Wù kfən sùúy aáwune jii, «Vèn lóo ghan, lá vèn yòʼ lì kifá. Lá vèn yòʼ lì mbàŋ, kìn vifá ve yi, kìn kibam, kìn mbàm. Lá wìr yòʼ lì vikúm vibaà. 4Vèn du, mee e ntèʼ, á wáy ven é lav ye á wayin shó, vèn gòʼ fó, e meé e ghan se vèn wíy lò. 5A ntèʼ yìmòʼ tèn fó səəsí ven, vèn wàa lò. Vèn lóo lò, vèn tèr nsay fo bàm, é wáa dzə kisəəm ké kinyò ke wír vee shooyi yiìn.» 6Áwune nèn lò, a dù, a ghan e ntèʼ sí, a fìʼtì sáʼka Nyùy wo juŋ, e kfə̀n a fèr aŋgàa yàsí virə́ʼ vidzə̀m.

Shilív shé Fòn Heror shi sáʼ wun

(Matio 14.1‑12; Maak 6.14‑25)

7Fòn Heror wo wù‑uù sáʼ mbìv wòŋ yee Galeli yú sá vinyo ve aŋgàa ntum Jesus vìyi yii vidzə̀m. Kí wáa jivír wun, bìʼ fo wír ámóʼó‑oò suuy jii, Jesus və̀n dzə̀ á ŋkfə Joon woo Ŋgaà Wáyndzəv mo wù fəən fó kpu. 8Aámóʼó suuy kév jii, dzə̀ á ŋkfə Elija mo wù kfənen ne, ámóʼó ji dzə̀ á *ŋgaà ntum Nyùy woo fó ŋgùʼ wùmòʼ mo wù fəən fó kpu. 9Heror nèn a ghay jii, «Mò‑oò shòʼ ne kitú ke Joon, və̀n woo wír kfə̀n dzə̀ la lèn, wo m yú virom ve wù shóʼ vìn?» Wù ku nèn a tàʼ ji bo wun kì yèn á Jesus woo shó.

Jesus yiír wír ansə̀kì atàn

(Matio 14.13‑21; Maak 6.30‑44; Joon 6.1‑14)

10Aŋgàa ntum Jesus vìyi ghán, e kfə̀n é bàm, e fèr vinyo ve áwune‑eè yiìn vidzə̀m e Jesus. Wù yuúrí, e lò, e lì, wùn áwune bàr wún, a dù e mvə̀mlaʼ yee Besayda. 11Wíri ku yù, a jùmrì wun, wù ku yòʼ səə̀sí áwune, e nèn kèʼ, a fìʼtì aáwune mo sáʼ Nyùyi dzəə̀n, e kfə̀n a fèr aŋgàa yàsí.

12Ndzə yiì lòo ji, wón və́ lìm vee nshòv sibaà e ghvə̀me kóʼtí, e sùúy sho jii, «Vèsən dzə̀ fen a dzə̀ é kwaʼ. Ku sùúy, é wír vìne du é melaʼ wùn ǎ ntèʼ see fó ghaŋ, a tàʼ vifá vév vé yi, e kfə̀n a tàʼ fo á yíi shiíy.» 13Jesus bìnèr kfə́ jii, «Kù yíi yiír ven wír vee shoon.» Á nèn sùúy jii, «Kifá ke vèr kér ki jòʼsì ntuʼ se kiban sitàn wùn à sə́ si sibaà, mo à kì yén ké ji dzə̀ vèr yùn vifá ve yi ve dzə̀ á yìír màŋgòŋ və̀n sho à?» 14A vé‑eè suuy bèy, bìʼ fo màŋgòŋ‑eè dzəə̀n e gháʼán, mbìv vilum cáʼcáʼ wáa dzə wír ansə̀kì atàn. Jesus nèn sùúy e wón və́ lìme jii, «Vèn suúy, é wíri dzəʼəm é nsay e viliŋ viliŋ, wír mtàn mtàn.» 15Á suúy, á dzə̀ʼə̀m. 16Jesus lì ntuʼ se kiban see sitàn wùn à sə́ see sibaà sí, e lèéy yúv, e beèrì Nyùy, e bèʼtí, e fò e wón və́ lìme ji á jav, é wíri wàá yí. 17Á jàv, wìr dzə̀m yí, e kùrkír. Á kfən bàʼtí vimbéʼ ve ví‑iì berin, ví rún ŋkaà nshòv sibaà e ghvə̀m.

Pita tóʼ ji Jesus dzə̀ *Mfə̀ə́r

(Matio 16.13‑19; Maak 8.27‑29)

18Wìy lòo dzə e kishiíy kímóʼ kí, Jesus wáa bùnrì Nyùy wùn mòʼón, a wón və́ lìme dzə́ fo ghaŋ. Wù yiì lò, e dzə̀r aáwune jii, «Màŋgòŋ wo wù rə́si wiy fo mò yii yoŋ mo ji la?» 19Á bìnèr jii, «Wír ámóʼó yoŋ ji à dzə̀ ŋkfə Joon woo Ŋgaà Wáyndzəv, aámóʼó yoŋ ji ŋkfə Elija. Ámóʼó ji *ŋgaà ntum Nyùy wùmòʼ fo vé ŋgùʼú mo wù kfənen fó kpu.» 20Wù nèn dzə̀r jii, «Vèn wáa yòŋ kén ji m dzə̀ la?» Pita bìnèr jii, «À dzə̀ Mfə̀ə́r wo Nyùy‑iì kàʼàn.» 21Jesus nèn kàntì áwune fo á wáa suúy e wìr ji wun dzə̀ Mfə̀ə́r. 22Wù wáa suúy jii, «Ŋgaà wo yírí dzəə̀n *Wanwìr və̀n kér fó wìy yen ŋgeʼ sinín. Vé wòŋe wùn à vitú ve atàá cùu, à wír ve á duŋrì nsəri wíy kay wun, e yuyrí, vishiíy ví mee vitaár, é Nyùy fəə́r wun fo kpu.»

Kinyo ke wìr wo wù táti ŋgoo Jesus

(Matio 16.24‑28; Maak 8.34–9.1)

23Wù kfə́n a suúy e wìr dzə̀m jii, «A wìr koŋ ji wun wáa dzə ŋgaà wom ŋgoo, ŋgaàŋ kù màʼày kitú kfə́, e toòmé kpú, a lì moo kintam vishiíy vidzə̀m, a ghan sho e mǒ bàm. 24Wìr wo wù bávti kitú kfə́ ji fo wun kpú, kù wíy kpu. Yii bèy, wìr maʼay kitú kfə́, bìʼ mo, bo ŋgaàŋ wíy shaàrì.» 25Wù nèn kfə̀n dzə̀r jii, «A wìr yì ndzə, yì may, wù bívír kitú kfə́, bo séʼ dzə̀ ka? 26Vèn wáa kiíy jii, a wìr woóme fó a dzə ŋgaà wom ŋgoo, kfə̀n woóme fó a jùmrì kinyo kém, bo ŋgaà wo yírí dzəə̀n Wanwìr və̀n wíy a woomé sa fó lì ŋgaàŋ ji və́ə woo wír e ghan se wù wíy a kfən e wùn mvə̀m vikùʼùy ve dzəə̀n vé Tàr wov wùn à nshèelav sə́ sí. 27Vèn wáa kiíy rú ji wír ámóʼó tíy fèn lèn, a bó á yòʼ wíy kpukír, a bó á yén sáʼ Nyùy yee shooy.»

Jesus dín e wón və́ ámóʼó mo wù dzəə̀n é yuv

(Matio 17.1‑8; Maak 9.2‑8)

28Kishiíy kí lòo meé waamé mo Jesus‑eè suuyin vinyo vìn, wù lì Pita wùn à Joon, à Jeem, wùn áwune wáa koʼ e gwan wùmòʼ ji wun du, e bùnrì a fo. 29Wù dù, e lòo bùnrì, vishí və́ ví nèn bìnkìr, a kìʼ jeéy. Ndzə̀y sə́ sí kfən kùvsín, a fər, a njàʼkìr. 30Á lòo sìn, wír ámóʼó bvə́y fó abaà, a suŋnín wùn à Jesus, a dzə̀ Mooser wùn Elija, 31a rán Nyùyi bán sa fo áwuné wùn. Wùn áwune wáa suŋnín mo Jesus wíy dù e Jerusalem, e kpu, é vinyo və́ vidzə̀m vi gheén.

32Á wáa suŋnín, a Pita wùn à Jeem, à Joon kì sí buúne. Á lòo sàsìn, e yèn mo rán Nyùyi bán fo Jesus wùn, e kfə̀n yèn, a wír vee shooyi tíy e wùn ghaŋ abaà. 33Wír vìyi lòo bàʼ kiwuú, Pita tùʼtìn, e sùúy e Jesus jii, «Tàr à wíri, kí bòŋ mo vèsən à wír vìne dzəə̀n fen. Ku sùúy, é vèr túy táv fen e taár, wúmóʼó ji wó, wúmóʼó wó Mooser, wúmóʼó wó Elija. Pita wáa tùʼtìn, a suúy bèy, a bó wù yòʼ fə̀m kì kinyo ke wù suuyì.»

34Kù mo wù suuy bèy, mbàʼ yìmòʼ nèn wìy, a shaà aáwuné kitu, e lò, e sə̀tí áwune, á nəə́ shó, a fàn. 35Jì wìr súŋnín fó mvə̀m mbàʼ foo fèy jii, «Wan wom wo m shoʼon və̀ne. Vèn wáa yuurí a dzə̀ kfə́.» 36Jì yee shooy súŋnín, e sə̀sín, á nèn yèn, a Jesus kfə̀n sí tíy fo wùn mòʼón. Mo áwune yenen kinyo ke kí kooyin é gwan foo fèy, e yiì lòo dù, e làa yòʼ fèr kinyo kimòʼón e wìr gheéy e ghan fóo fèy.

Jesus fér wán wo *nyùy wùmòʼ jívir, a wù gbu kimgbù

(Matio 17.14‑18; Maak 9.14‑27)

37Yì rán kibvəə́shí, wùn à Jesus lòo səy fo gwan fèy, màŋgòŋ wìy e gháʼán, wùn áwune tárnín. 38Wìr wùmòʼ nèn lò, a waamé fo wírí mvəm jii, «Ŋgaà Yèʼey, kii wò, ku lèéy wán wom. M kér wán woo shoon e mòʼón cáʼcáʼ, a dzə̀ lumèn. 39A nyùy wùmòʼ lo, wù wàa jivír. Wù lo, wù wàa rəəmé fo wǎn bvə̀m, a màʼ wán fó nsay, wù wàa buʼ, a cu vifə́yfə́y. A bó wù yòʼ yii bèy, wù tàv màʼtì wán gheéy. Wù lóo màʼtì, a wàn ló ne, e wèvrì wèvrìn. 40M kì lòn ne ji wón vé lìme jum nyùy woo shooy, á múm ntéŋ.»

41Jesus yú, e sùúy e wón vəə́ jii, «Vèn dzə́ bèn, a vèn dzə̀ wír kisaŋe. Vèn yòʼ lo, vèn wày shilív e Nyùy wùn gheéy. M kér fó wìy tsəmrí vinyo vén é le? Vèn taʼ ji m dzəʼəm vèsən e mèé e le?» Wù nèn sùúy e tàr à wan və̀y jii, «Wìy e wan wò fèn.» 42Wù lì, e lòo dù sho, nyùy və̀y kfən màʼ wán, wù wáa buʼ, a ŋàyìr. Jesus kàntì nyùy woo shooy, wù màʼtì wán, wù bónén, Jesus siìr e tàr wov. 43Wìr dzə̀m yén vitaáví ve dzəə̀n vé Nyùy, shúu yúm áwune.

Jesus kfə̀n naarì kfə́ə kpu ye yí wíy lì wun

(Matio 17.22‑23; Maak 9.30‑32)

Wíri kú a leéy Jesus, a ker gháʼ fo vinyò ve wù‑uù yii vidzə̀m. Wù nèn lò, e bìnkìr, e sùúy e wón və́ lìme jii, 44«Vèn fó vituʼùr ví é kinyo ke m suuy kìn kijuŋ. Á wíy way ŋgaà wo yírí dzəə̀n Wanwìr və̀n e wírí wo, aá yii shó mo á koŋè.» 45Wù suúy bey, la áwune yòʼ kìíy. Kifá ki‑iì sə̀tí vifií vév fo á kiíy, á nèn kfə̀n a fàn fó dzər sho.

Dzə̀ la wír wo kuʼùn?

(Matio 18.1‑5; Maak 9.33‑37)

46Áwune nèn yiì lò, e kèʼ, a bìʼ jii, áwune sà dzə́ bèn, a dzə̀ la wír wo kuʼùn fo áwune á? 47Jesus ku nèn kìíy kinyo ke vé‑eè biʼ, kwaʼtì aáwuné meliv. Wù lì wán wo terí, e tìír e wùn ghaŋ, 48e sùúy aáwune jii, «A wìr yén wán və̀n ji wír bìʼ mo, bo ŋgaàŋ yén a dzə̀ mo. Wù wáa yen mo, bo wù yén a dzə̀ ŋgaà wo wù tumen mo. Vèn wáa kiíy jii, wìr wo wù li kitú kfə́ fó tèr e věn mvəm, dzə̀ wo dzəə̀n wír wo kuʼùn.»

Kinyo ke ŋgaà tòmrí

(Maak 9.38‑40)

49Joon nèn lò, e yòŋ Jesus jii, «Tàr à wíri,» a bi sho jii, «Vèr‑iì yèn wír wùmòʼ, a bó wù yòʼ dzə̀ e vèsə́n ŋgoo, a wù yoŋ yír yé, e bó a jùm anyùy ve á jívir wíri, vèr nèn a shèm.» 50Jesus bìnèr jii, «Lá vèn yòʼ wìy a shèm wír woo bey. A wìr dzə̀ là fó a kìnèn kinyo kén, bo wù tómri tòmrín.»

Wír veé Samariàa tén fó səəsí Jesus

51Ghán se Nyùy‑iì wíy lì Jesus, é wù kóʼ é yuv sí lòo gheén, Jesus wáy ji wun kù du e Jerusalem, e nèn lò, a dù. 52Wù lòo dù, e tùm wír ámóʼó fó mbìy. Áwune nèn dù e ntèʼ yeé Samaria yìmòʼ, a tàʼ fo wù yií shiíy. 53Wír vee fóo yén ji Jesus kì shaa shaàn, du a dzə̀ á é Jerusalem, e nèn ŋwèy kirə́ʼ.#9.53: Wír vée Samaria wùn à veé Jerusaleme yòʼ‑oò li və́y. Leéy mbìv Ji se Naarìn sí: Samaria. 54Jeem wùn Joon vee wón lìm Jesuse yiì yù, e dzə̀r e Jesus jii, «Tàr, dzə̀ ji vèr túm və́y, é wú sə́y a dzə̀ fó yuv, e laàr wír vìn à?» 55Jesus leéy áwune, e wàm wámén, 56e nèn lò, wùn áwune wáa dù e ntèʼ ye sən.

Ŋgaà ŋgoo Jesus kér fó yu kinyo a dzə̀ ké Jesus

(Matio 8.19‑22)

57Wùn áwune lòo dù e dzəə, wìr wùmòʼ wìy, e sùúy e Jesus jii, «Aà fə̀m du fèé, bo wòsò kù yíi a ghan.» 58Jesus bìnèr sho jii, «Nyám símóʼ sí kér bií sév, a menə́n medzə̀m mè kér láʼ sév. Yii bèy, a bó ŋgaà wo yírí dzəə̀n Wanwìr və̀n yòʼ kér fó teʼ kfə́ kee kitú.»

59Jesus lò, e sùúy a dzə̀ e wùmòʼ woo wír jii, «Wìyi, é wòsò wáa ghan.» Wìr və̀y suúy jii, «Ku màʼtì, é m du, wíy dzəəmè tàr wor ŋkuŋ, é bo m wiy.» 60Jesus bìnèr jii, «Màʼtì kee shooy ki, é wír ve á siìn ji aŋkfəə wìy a dzəə̀mè aŋkfə vév. Ku dù ké ki, a fìʼtì a dzə̀ mo sáʼ Nyùyi dzəə̀n.»

61Wùmòʼ woo wír nèn kfə̀n yòŋ jii, «Taàtá, mo‑óò wáa ghan wòsò. Ku màʼtì, é m tómbìy lòn dzə́ə fo kfə́ə yémé, e bó a wìy.» 62Jesus bìnèr e woo shooy jii, «A wìr ghàr lá kisoo ji wun sí lim lim, e kfə̀n a leéy bám, bo bó ŋgaàŋ yoʼ ghèén fó a lìm e kinyò ke saʼ Nyùy.»

Currently Selected:

Luk 9: LNB

Highlight

Copy