Luk 11

Jesus yéʼey mo dzə̀ á wàa bùnrì

(Matio 6.9‑13; 7.7‑11)

1Wáa dzə e ghan símóʼ sí, a Jesus bunrì e kirə̀ʼ kímóʼ kí. Wù yiì màysì, wan və lìm wùmòʼ wìy, e sùúy sho jii, «Tàr, ku yèʼéy ver mo dzə̀ á wàa bùnrì Nyùy, réŋréŋ mo Joon‑eè yeʼeyin və́ vee wón lìm.» 2Jesus nèn sùúy e wón vəə́ adzə̀m jii, «Vèn lóo bùnrì, vèn wàa yòŋ jii:

« ‹Tàr, ku yiì, é wíri wáa ghvəm yír yé,

e kfə̀n yiì, é sáʼ yée wiy.

3Kú a fo ver vifá ve yi veé kishiíy vishiíy vidzə̀m.

4Ku làysìn ajay vérí,

bìʼ fo vèr laysìn vé wìr ve á jayin e vèr.

Lá à yòʼ màʼtì, é vinyo ve ví mum ver ví gháʼ ver.› »

5Wù suúy bey, e nèn a fìʼsìn jii, «A tàm kí kòóy ji wìr fo vèn du, e kùmrì lav e ŋkar rə yìmǒʼ kitu e tím vitsəʼə́, e sùúy sho jii, ‹Ŋkar yèm, ku foòr mo meŋkfəŋ meé shùu ntuʼ se kiban sitaár. 6Ŋkar yem yìmòʼ lò, e sàsìn, e wìy fo kwaʼ ghan lèn, a bó m yòʼ kér kifá ke wù yí.› 7A tàm e ghan símóʼ sí, wìr woo shooy nèn bìnèr fo mvə̀m lav jii, ‹Lá à yòʼ dzə́ə a jivír mo. Shúu lavi sì e finèn, a vèr à wón vémé neèmkìr ne. Bó yòʼ dzə̀ m kfə̀n a lò e yuv ji m taʼ kifá, e fò e wò.› » 8Jesus fèr bèy, e sùúy jii, «Vèn wáa kiíy jii, a wù fə̀m dzə̀ là fó nànèn, e fo kibán ke wìr və̀y lóné ji bìʼ fo dzəə̀n ŋkar rə, bo wù kù yíi nànèn, e fo vifá ve wù kér shií shó vidzə̀m, bìʼ fo wìr və̀y kù yíi a tiy, a kùmrì shúu lav.

9«M nén a suúy e vèn jii, vèn wáa lon, é Nyùy wàá fó. Vèn wáa tàʼ, é Nyùy yii, é vèn bóŋ. Vèn wáa kùmrì shúu lav, é Nyùy mvəʼ. 10Vèn wáa kiíy ji wìr wo wù kooy kifá dzə̀ wo wù lóné. A wìr wo wù taʼ kifá waà yíi yen, aá mvəʼ shúu lav, é wìr wo wù kumrì nəə́. 11Wìr fo vèn vee atǎr won wo dzə̀ wàn lón sə́ fo fo, wù lì a dzə̀ yó, e fò shó dzə̀ la? 12A wàn lòn wúm, wù lì a dzə̀ ŋgám, e fò shó a? 13Mo vèn dzəə̀n wír ve á kù yii vinyo ve bi ví, kù yòʼ kiiy mo dzə̀ á fò vifá ve juŋ vi e wón véné, bo dzə̀ Tàr won wo wù dzəə̀n é yuv fò sá Kiyoy ke Ranén kí e wír ve á lón fo wune.»

Jesus dín ji wun ghàʼ ne Satan

(Matio 12.22‑30; Maak 3.20‑27)

14Wáa dzə e ghan símóʼ sí, Jesus wáa jùm nyùy wùmòʼ wo wù‑uù jívir wír, ŋgaàŋ kfə́n ji kindzə̀mer. Mo wù màʼtìn, ŋgaàŋ ku nèn kèʼ, a suŋnín. Màŋgòŋ wáa yu, a ker gháʼ. 15Ámóʼó nèn a suúy kév jii, «Wù jum anyùy bèn, a fó *Beseber wo dzəə̀n fon anyùy vitaáví shó, bo wù wáa jùm.» 16Aámóʼó ghíʼ Jesus ghíʼín ji wù yii ri a kiŋgaʼnìn ke kinyò ke kí wáa dìn rú ji vitaáví və́ ví lo fo Nyùy. 17Jesus kiíy ji á kù yíi a kìnèn, e sùúy jii, «A woŋe lò, e jàvsìn, a taŋ kóy, bo bó yòʼ dzə̀ wú wìy tìím. A kfə́ə lò, e jàvsìn, a taŋ kóy, bo yí bvəə̀rí ne. 18Dzə̀ sá réŋréŋ mo ké Satan ki dzəə̀n. A wír vəə́ lò, e jàvsìn, a taŋ kóy, sáʼ rəə́ wìy tìím e le? A m suuy bèn, bìʼ fo vèn suuy ji m sə́ vitaáví a dzə̀ á fo Beseber, e bó a jùm anyùy. 19Mo vén vee wíri kù jum sa, a dzə̀ ji m sə́ vitaáví fo Beseber, e bó a jùm, bo áwune sə́ kév fo la? A vèn yèn ji á sə́ fo Nyùy, bo dzə̀ sá fo m sə́. 20Wáa dzə, a m jum rú anyùy a dzə̀ é vitaaví vé Nyùy, bo dzə̀ ji sáʼ Nyùyi kèʼ ne lèn e nsay e sén see ghán sí.

21«Vèn kì sá jii, a ntav bàʼtí vifá və́ vé rər, a shìy láʼ rə́, bo bó yòʼ dzə̀ kifá, kí sə̀ʼ kifá kfə́. 22Yii bèy, a wìr wo wù tavin, e shaà wun wìy, bo wù yíi ghaʼ wun, e faàsì vifá və́ vé rər ve wù wáy shilív shó vìy, e kuúy vifá, é wùn à ŋkar sə́ sí jav. 23Vèn wáa kiíy jii, a wìr tèn fó a tiy e mǒ kinyò, bo ŋgaàŋ bívir bìvìrín. Wìr tén fó sə mo, aá wáa lì wíri e Nyùy wùn, bo ŋgaàŋ táʼar kfə́ tàʼàrín.

24«Kù dzə̀ moo ké wìr wo *nyùy wùmòʼ jívirì, á júm fo wùn wó, wù dú é kwaʼ, a tàʼ fó beè. Wù taʼ ntéŋ, wù nèn rə̀m jii, wun‑éè wáa kfən fo wun‑eè fəən. 25Wù lóo kfən, yén, a lav tíy kisáŋ, aá siíy ne, e yèr, e nàŋsín, 26wù nèn dù, e bàʼtí anyùy ámóʼó saàmbà ve á birin, e shaà wun, wùn áwune nèn nə̀ə́, e sìysì wún é lav fèy. Kinyo ki nèn màysì, e fòy e wìr və̀y kitu, e shaà mo kí‑iì dzəə̀n fó mbìy.»

Kishéʼrì ke ru kí

27Jesus suúy kinyo kìn, wiíy wùmòʼ shúsín fo màŋgòŋ mvəm, e sùúy sho jii, «Kishéʼrì ki dzə̀ ké wiíy wo wù‑uù dzəən wò, e kfə̀n nyòór.» 28Jesus bìnèr jii, «Wír ve á kér kishéʼrì ke kuʼùn kií dzə̀ ve á yú kinyo ke Nyùy, yii mo kí dzəə̀n.»

Jesus beemè wír ve á taʼ kisəəm é ŋgeʼ

(Matio 12.38‑42)

29Wù wáa fèr vinyo vìn, màŋgòŋ wáa baʼtí e wùn ghaŋ, wù nèn lò, a suúy jii, «Ŋgwàʼ yee lèn rə̀n dzə̀ ŋgwàʼ ye bi. Á taʼ kisəəm ké vitaaví vé Nyùy e ŋgeʼ, a bó yòʼ dzə̀ féyì, m dìn. Á ku lì kisəəm a dzə̀ ké Jona. 30Mo Nyùy‑iì yiìn, Jona wáa dzə kisəəm ke kí‑iì dìnèn vitaáví və́ e wír veé Ninevèe, kù dzə̀ mo wù wíy yiì sa, é ŋgaà wo yírí dzəə̀n *Wanwìr wáa dzə kisəəm fo ŋgwàʼ yee lèn. 31Wíy lòo dzə e kishiíy ke Nyùy wíy a tinén nsaʼ, é Yaà wo wù sáʼ woŋ Sheba wáa roòmè ŋgwàʼ yee lèn rə̀n ji vé‑eè lo jày á feyì. Wù‑uù yù ji Solomon kér vifií ve gháʼán ví, e nèn lò fo ndzəywoŋ, a wìy ji wun yén e sí rəə́. Wùmòʼ woo wír wíy lèn, a və́ vee vifií ví shaá vé Solomon, la á yòʼ a yen. 32A wír veé Ninevèe kfə̀n wíy a roòmè sa ŋgwàʼ yee lèn rə̀n e kishiíy fóo fèy, bìʼ fo áwune‑eè yuun kinyo ke Jona fiʼtì, e bìnèr melív mev. Wìr wùmòʼ wáa dzə fèn lèn, a kfə́ kee kinyo ki shaà ké Jona, a bó á yòʼ yuúri.

Jesus dzə̀ kikaʼày ke Nyùy sə̀ʼə̀n

(Matio 5.15; 6.22‑23)

33«A bó wìr yòʼ yii səʼ lam, wù wày a dzə̀ é buu, a bó yòʼ dzə̀ wù kfə̀n lì mbìʼ, e sùm sho. Wù kù yii tiir a dzə̀ é kitu ke kifa ji wíri lóo nəə́ e lav, á wàa yen fó. 34Sí wìri nén a dzə kifá ke wìr yén rán yee shooy sho. Sí wìri lóo dzə, a yí rán e mbòŋ, bo dzəʼə̀m rəə́ rán ránén e dzə̀m. Yí lóo səəné, bo dzə̀ mo dzəʼə̀m rəə́ sə́n sənén e dzə̀m. 35Wìr ku nèn a leéy ji wun sà kù yòʼ ghán rú é mvə̀m ran, mo wun ghán a dzə̀ é ndzə ye sənér á? 36A wù ghán rú é mvə̀m ran, léʼ ndzə ye sənér léʼén, wù nèn a yen virə́ʼ ghán sidzə̀m réŋréŋ moo lam wo wú lóo ban, wú wàa fo rán e wíri.»

Jesus beemè aŋgàa yeʼéy ji á semèr kinyo ke Nyùy

(Matio 23.1‑36; Maak 12.38‑40)

37Jesus yiì màysì kisúŋnìn kfə́, wìr woó mbìv *Farasi wùmòʼ jàŋ ji wù ku wìy, e yìkír e wùn lav. Wù nèn dù, wùn wun wáa yikír, 38a bó Jesus yoʼ lò sù virə́ʼ mo áwune yii yii. Wìr Farasi və̀y leéy, kí tárír wun. 39Taàtá Jesus suúy shó jii, «Ven vee wír vee Farasi, vinyo ve bi ví wùn à bvə̀mkúʼ rùn e věn meliv moo bàr wùn à kighín ke á suùn ndzə ndzə, a mvə̀m kóʼoyì. 40Vèn dzə̀ viyúŋ. Bó Nyùy wo wù bomen kifá yòʼ‑oò bòm mvə́m, e bòm wún kifa kee shooy à? 41Ke vèn kì yíi a yiì ki dzə̀ jii, vèn wáa jàv vifá ve vèn kérí e vé ŋgeʼe, é melív men mè nèn a ran ranén vinyo vidzə̀m.

42«Yìiy, ven vee Afarasi, ŋgeʼ dzə̀ yéen. Vèn li mefarìn me á kéŋ, náŋsin nyóo shó, á kfə̀n ŋèvtì kirə́ʼ e ghvə̀m, e bóo fo kee kimòʼón ji ké Nyùy. Vèn yii bèy, nèn laysìn fó a yiì kinyo ke ru kí e wíri, kfə̀n laysìn fó a kòŋ Nyùy. A dzə̀ vèn kù a ŋèvtì mefarìn mee shoon bèn, yii bèy, e làa yòʼ a làysìn vinyo ve ví dzəə̀n é shií.

43«Yìiy, ven vee Afarasi, ŋgeʼ dzə̀ yéen. Vèn kù yii koŋ a dzə̀ vitú ve antaʼ e ŋgày se bùnrì, kfə̀n koŋ ji wíri wáa shàʼtì ven é virə̀ʼ vé way, a bèsìn. 44Yìiy, ŋgeʼ dzə̀ yéen. Vèn dzə̀ moo say se bó sí yòʼ yénsinè, wìr lóo shaà e kitu wo, la wù yòʼ a kiíy.»

45Jesus suúy vinyo vìn bèy, wìr wo wù‑uù duŋrì nsər Nyùy wùmòʼ nèn sàyín jii, «Ŋgaà Yèʼey, à suuy bèy, aà shoor sa a dzə̀ ver.» 46Jesus bìnèr jii, «Yìiy, ven ve á duŋrì nsər Nyùy vìn, ŋgeʼ dzə̀ sá yéen. Vèn fó kibeʼèy, a kí gháʼ wíri, a bó yòʼ dzə̀ vèn wàa mùm ji á tóm, a fə̀m dzə̀ e wàn kiwo. 47Ŋgeʼ wíy a dzə rú yéen. Atàr véné‑eè yúyri *aŋgàa ntum Nyùy, vèn siíy, a naŋsín say si, a bom, a meŋ vinyo vév. 48Vèn yii bèy, tómri a dzə̀ kinyo ke atàr véné‑eè yii. Vé‑eè yùyrí aŋgaà ntum Nyùy, vèn siíy, a bom a dzə̀ say si. 49Á kinyo ke kí‑iì yiìn, bo Nyùy woo Taà Vifiì suúy jii, ‹M wíy tum aŋgàa ntum vém fo áwune, aá yúyrí ámóʼó, a nə̀ʼsì ámóʼó.› 50A Nyùy wíy a dzər dzə́n sé aŋgaà və́ ntum ve vé‑eè yúyri, e kèʼ mo ndzə‑əə̀ kèʼèn, a dzə̀ fo ŋgwàʼ yee lèn. 51Wù wíy kèʼ dzə́tí a dzə̀ fo dzə́n Abeli, e dù meé e yé Sekariya wo vé‑eè yuyrin é shùu lav cùu, e bǎm kiy wo á cu Nyùy sho, e bó a nəə́ e lav cù. A m suuy e vèn féyì jii, Nyùy kù wíy a dzətí dzə́n sé wìr vee shooy a dzə̀ e ŋgwàʼ yee lèn.

52«Yìiy, ven ve á duŋrì nsər Nyùy, ŋgeʼ dzə̀ rú yéen. Vèn lìtì ne kimbàʼ ke kí mvəʼ shúu lav wo dzə̀ wìr shaà shó, e bóo kiíy kinyo ke dzəə̀n ké ru kí. Vèn tèn e wún wóné fó shaà sho, e nèn a shèm wír ve á taʼ ji á shaa shó.»

53Jesus lò, e lòo dù, wír ve á duŋrì nsər Nyùy wùn à veé mbìv Farasii ŋáʼáy é wùn wó, a dzətí vinyo sho vinín, a yùtì shúu və́. 54A vé‑eè wooy wun woóyín ji wù yíi lòo bìnèr, aá koó kinyo fo shuù wo.

Currently Selected:

Luk 11: LNB

Highlight

Copy