युहन्ना 19
19
1ओः तीङ्ला पीलातसकीइ येशुला खेर्सी ओःले कोर्रा क्योःप लाःती थेक्याला हुकुम तेर्सी। 2थेक्याइ छेर्माङगीइ मुकुट चीग जोसी ओःले येशुइ गोला केङ्तेर्सी, ओःले खुङक्याइ बैजनी रङ्गगीइ क्याःल्बुइ केःङेनच्योङ्रा केःला खुङला केःङ्तेर्सी। 3ओःले ओः थेक्या खुङगीइ थामाला ओःङ्सी ओःले लाःसी, “यहुदीक्याइ क्याःल्बु, टासीदेले!” ओःले खुङक्याइ खुङला थाल्जे तेर्सी।
4पीलातसकीइ फीर्च्या खेप चीग फीला थेङ्दी मीःक्याइ पोर्चोमला लाःसी, “तादो, ङाःइ दी मीःला दण्ड तेर्कोःन माःताक्पारा माःफ्रे। दी ताम ख्याक्याइ छोर्च्युक लाःती ङाःइ खुङला ख्याक्याइ तोःङ्ला ख्योङ्देरा एः।” 5ओः सोङ्गारा, येशु छेर्माङगीइ मुकुट ओःले बैजनी रङ्गगीइ केःला केङ्दीरा फीला ओःङ्सी। पीलातसकीइ खुङक्याला लाःसी, “लो तादो, दी मीःला!”
6छेस्यो पुजाहारीक्या ओःले कोन्ज्योइ मन्दीर ह्रुङेनक्याइ येशुला थोङ्लुङम्याःपा ङाङ्रे तेङ्दी लाःसी, “ओःखोला क्रुसला प्याङ्दो, ओःखोला क्रुसला प्याङ्दो!”
पीलातसकीइ खुङक्याला लाःसी, “ख्याक्याइरा दीखोला खेर्ती क्रुसला प्याङ्दो, चीलेलाःना ङाःइ दीखोला चीङ माःताक्पा माःफ्रे!”
7यहुदीक्याइ खुङला लेःन लोदी लाःसी, “ङीःइदी छ्येइ ठीम चीग एः, ओःले ओः ठीम अनुसार दीखोइ राःङला कोन्ज्योइ पुः इःङे लाःती लाःक्योक सोङ्गारा दीखोला सेराकोःउए।”
8ओःन्डुबा ताम कोःदी पीलातस ताःरुङ जीसी। 9खुङ फीर्च्या क्याःल्खाङ नाःङ्ला स्युःसी ओःले येशुला टीःसी, “ख्यो काःलाइदी इःङे?” इःनाङ येशुइ चीङ लेःन मातेर। 10पीलातसकीइ खुङला लाःसी, “ङाः ङीमु चीले ताम मेःलाःप्पा? ख्योला पोःर्तेकेन आङ्ज्या ङाः ङीमु एः, ओःले ख्योला क्रुसला प्याङेन आङ्ज्याङ ङाः ङीमु एः लाःती ख्योइ छोर्ती म्याःपा?”
11येशुइ लेःन लोदी लाःसी, “ख्याला कोन्ज्योइ आङ्ज्या मातेर्क्योक एःना ख्याइदी ङाःखाला चीङ आङ्ज्या ओःजे म्याःके। ओः सोङ्गारा, ङाःला ख्याइ लाःक्पाला तेर्केन्दीला ताःरुङ छ्योम्बो लाःयोइ माःताक्पा क्याःप्केन एः।”
12दी ताम कोःमीःजीक पीलातसकीइ फीर्च्या येशुला पोःर्तेर्चे छोल्सी। इःनाङ यहुदीक्याइ एःन्डु लाःतेरा केताङ्सी, “ख्याइ दी मीःला पोःर्तेर्सी लाःना ख्या कैसरकीइ रोः मीःङे। राःङला क्याःल्बु इःङे लाःती दाबी पेःगेन्दी काःन्दीङ मीः कैसरला टाः पेःक्योक ओःङ्गुए।”
13पीलातसकीइ दी ताम कोःदी येशुला फीला ख्योङ्सी, ओःले खुङ तोः तीङ्क्योक ठाउँला एःक्योक ठीम पेःगेन ठाउँला तेःसी। (ओः ठाउँला तोः तीङ्क्योक सोङ्गारा हीब्रु तामला गब्बथा लाःकुए। गब्बथा लाःक्योक हीब्रु तामला “तोः तीङ्क्योक” लाःती ङोःसेउए।) 14ओः ङीःमा नीस्तार मेःलीङ ओःङ्जे भन्दा ङीःमा चीग तोःङ्ला एःके। ओः तीःजी ङीःमाइदी तेःमेइ चीङ्ङी बज्तीदी एःके। पीलातसकीइ यहुदीक्याला लाःसी, “तादो, ख्याक्याइ क्याःल्बु!”#१९:१४ दी कुःङ्सेइ तीःजीलादी यहुदीक्याइ लुःककीइ रीःउला कोन्ज्योइ मन्दीरला नीस्तार मेःलीङगीइ लागी डेन जोजेला सेकुके।
15इःनाङ खुङक्याइ एःन्डु लाःतेरा ङाङ्रे तेङ्सी, “खेर, खेर, ओःखोला क्रुसला प्याङ्दो!”
पीलातसकीइ खुङक्याला टीःसी, “ची ङाः ख्याक्याइ क्याःल्बुला क्रुसला प्याङ्गा?”
छेस्यो पुजाहारीक्याइ लेःन तेर्सी, “कैसरबाहेक उःइदी राःङ्सा क्याःल्बु म्याः।”
16ओः ओःङ्गारा पीलातसकीइ येशुला क्रुसला प्याङ्जेला खुङक्याइ लाःक्पाला तेर्सी।
येशुला क्रुसला प्याङ्क्योक
(मत्ती २७:३२-४४; मर्कुस १५:२१-३२; लुका २३:२६-४३)
ओः सोङ्गारा, थेक्याइ येशुला खेर्सी, 17ओःले खुङ राःङगीइ क्रुस राःङगीइरा खुर्ती रीःसीलगीइ ठाउँ लाःकेन ठाउँला काःल्सी। (ओः ठाउँला हुब्रु तामला गलगाथा लाःकुए।) 18ओःला खुङक्याइ येशुला क्रुसला प्याङ्सी ओःले खुङ ङीमु राःङ्सा मेःराङ ङीलाङ क्रुसला प्याङ्सी, चीगला खुङगीइ च्याबुछ्योले ओःले राःङ्सादीला योमाछ्योले, ओःले येशुलादी खुङक्याइ कील्ला प्याङ्सी। 19मीःक्याइ येशुला माःताक्पा च्याःङ्क्योक ताम पीलातसकीइ पाङ्लेक चीगला प्रुःच्युसी ओःले क्रुसखाला ज्याच्युसी। ओःखोला एःन्डुबा प्रुःदी एःके, “नासरतकीइ येशु, यहुदीक्याइ क्याःल्बु।”
20माःङ्बुरा यहुदीक्याइ दी प्रुःक्योक तामला टोःसी, चीलेलाःना येशु क्रुसला प्याङ्क्योक ठाउँ क्याःसाइ थामालारा एःके। ओः प्रुःक्योक ताम हीब्रु, ल्याटीन ओःले ग्रीक तामला प्रुःदी एःके। 21छेस्यो पुजाहारीक्याइ पीलातसला लाःसी, “‘यहुदीक्याइ क्याःल्बु’ लाःती मीःङे, इःनाङ ‘दीखोइ ङाः यहुदीक्याइ क्याःल्बु इःङे लाःसी’ लाःती प्रुःदो।” 22पीलातसकीइ लेःन तेर्सी, “ङाःइ ची प्रुःनाङ प्रुःसी।”
23थेक्याइ येशुला क्रुसला प्याङ्मीःजीक खुङगीइ केःला लेःङ्दी थाम्जेर थेक्याला बो रेः रेः ओःङेन पेःदी बो सीः जोसी। खुङक्याइ खुङगीइ फीछ्योइ केःलाङ लेःङ्सी, इःनाङ ओः केःलादी चेम्बु म्याःक्योक युःमीःजीक वाःथुपरा थाक्योक ज्वाक्रा एःके। 24ओः सोङ्गारा, खुङक्याइ चीगकीइ राःङ्साला लाःसी, “दीदी माराल्गा, इःनाङ दी सुइदी ओःङेन्दी लाःती चीट्ठा लुगा।” छ्येइ पेज्याइ एःन्डुले प्रुःक्योक ताम छाङ्ज्युक लाःतीरा दी काःल्दी एःके,
“खुङक्याइ ङाःइ केःला राःङ-राःङला केःसी, ओःले फीइ केःलाइ लागीदी चीट्ठा लुसी।”#भजन २२:१८
ओः सोङ्गारा, थेक्याइ दी लेःगा पेःसी। 25येशुइ क्रुसकीइ सुःरला खुङगीइ आमा, चीःची, क्लोपासकीइ पेःमे मरीयम ओःले मरीयम मग्दलीनी लाःङ्दी तेःती एःके। 26येशुइ राःङगीइ आमा ओःले राःङगीइ च्याःम्बु पेःक्योक योबाला थामालारा लाःङ्दी तेःक्योक थोङ्दी राःङगीइ आमाला लाःसी, “तादो आःमा, दीखो ख्याइ पुः इःङे।” 27ओःले खुङगीइ ओः योबाला लाःसी, “तादो, खुङ ख्योइ आःमा इःङे।” ओः ङीःमामीःजीक ओः योबाइ येशुइ आमा मरीयमला राःङगीइ खीमला खेर्सी।
येशु सीक्योक
(मत्ती २७:४५-५६; मर्कुस १५:३३-४१; लुका २३:४४-४९)
28येशुइ राःङगीइ थाम्जेर ताम ताः पेःदी सीःङ्सी लाःती छोर्सी ओःले छ्येइ पेज्याला प्रुःक्योक ताम छाङ्ज्युक लाःती एःन्डु लाःसी, “ङाःला कोम्जे लाःङ्सी।”#भजन ६९:२१; २२:१५ 29ओःला कीर्पु अङ्गुरकीइ नीःङ्गारकीइ काःङ्क्योक नेकी चीग एःके। ओः सोङ्गारा, कीर्पु अङ्गुरकीइ नीःङ्गार रुवाला पादी हीसप लाःकेन पुःङ्माइ याःल्गा चीगला ज्यादी खुङक्याइ येशुइ खाला ज्यातेर्सी। 30ओःले येशुइ ओः कीर्पु नीःङ्गार थुङ्सी, ओःले खुङगीइ लाःसी, “ताः ङाःइ लेःगा सीःङ्सी।” ओःले खुङगीइ गो कुःदी खुङ सीसी।
येशुला क्यामक्यामला भालाइ च्योक्योक
31दी ङीःमादी यहुदीक्याइ थाङ सोगेन ङीःमाइ तोःङ्गीइ ङीःमा एःके। ङार्तो च्योःङ्रादी थाङ सोगेन ङीःमा ओःले नीस्तार मेःलीःङ एःके, ओःले यहुदीक्याइ छेस्योक्याला ओः फुम्बुक्या ओः ङीःमाला क्रुसला ज्याजे सेम माःबे। ओः सोङ्गारा, खुङक्याइ पीलातसला ओः फुम्बुक्याइ काङ्बा च्यादी फुम्बुक्याला माःर्ला पाप्चेला वासी पेःसी।#१९:३१ काःन्दीङ मीःला क्रुसला प्याङ्मीःजीक खुङ उ स्याःङ्खुजेला राःङगीइ काङ्बाला लाःङ्कोःउके। ओः सोङ्गारा, मीःला गेबुरा सीच्युजेला खुङक्याइ ओः प्याङ्क्योक मीःक्याइ काङ्बा च्यातेर्कुके। 32ओः सोङ्गारा, थेक्या ओःङ्दी येशु ङीमुरा क्रुसला प्याङ्क्योकक्याइ काङ्बा च्यासी, तोःङ्ला चीगकीइदी, ओः तीङ्ला राःङसाइदी पेःदेरा च्यासी। 33इःनाङ खुङक्या येशुसाःला ओःङ्सी ओःले खुङगीइ काङ्बा ज्याजे छोल्गासुना खुङ नी तोःङ्लारा सीसीःङ्क्योक थोङ्सी ओःले खुङगीइ काङ्बा माच्या। 34इःनाङ थेक्या नाःङ्ला मेःराङ चीगकीइ खुङगीइ क्यामक्यामला भालाइ च्योसी, ओःले खेप चीगलारा क्यामक्यामले ठा रा छ्यु थेङ्सी।
35(ख्याक्याइयाङ सेमल्हुक लुखुज्युक लाःती दी थोङेन मीःइ दी तामक्या लाःतेर्ती एः। खुङगीइ लाःक्योक दी ताम तेःन्दाम इःङे ओःले खुङगीइ तेःन्दाम लाःतेरा एः लाःती सेदी एः।) 36“खुङगीइदी काःन्दीङ रेःकोक मेःछ्यागेन एः”#प्रस्थान १२:४६; गन्ती ९:१२; भजन ३४:२० लाःती छ्येइ पेज्याला प्रुःक्योक ताम छाङ्ज्युक लाःती दी ताम काःल्सी। 37ओःले छ्येइ पेज्याइ राःङ्सा ठाउँला एःन्डुबा प्रुःदी एः, “भालाइ चोक्योक मीःला खुङक्याइ तगेन एः।”#जकरीया १२:१०
येशुला तुःर्साला ज्याक्योक
(मत्ती २७:५७-६१; मर्कुस १५:४२-४७; लुका २३:५०-५६)
38ओः तीङ्ला अरीमाथीया क्याःसाइ योसेफकीइ येशुइ फुम्बुला खेर्चे ज्योर्का लाःती वासी पेःसी। खुङ याहुदीक्याइ जीबाइ पेःगासुना सुइयाङ मेःछोर्केन पेःदी खाजुम्बाले येशुइ योबा काःल्दी एःके। पीलातसकीइ खुङला येशुइ फुम्बु खेर्चे तेर्क्योक सोङ्गारा खुङ ओःङ्दी ओःखोला खेर्सी। 39येशुला तोःङ्ला कुःङ्मु फ्रेकाला डोगेन नीकोदेमससाङ खुङ ङीमुरा एःके। खुङगीइ मुर्र ओःले एलवाइ पुःङ्मालाःम्ले जोक्योक याःबु टीःमा तेर्केन खाल सुम रा सुम कीलोजे अत्तर ख्योङ्दी ओःला ओःङ्सी। 40खुङक्याइ येशुइ फुम्बुला यहुदीक्याइ रीमठीम अनुसार याःबु टीःमा तेर्केन अत्तर टुःल्दी सुतीइ केःलाला तुम्सी। 41येशुला क्रुसला प्याङ्क्योक ठाउँला बगैँचा चीग एःके। ओः बगैँचाला नाःमाङ सुङलाङ माःतीःप्क्योक सेम्बा तुर्सा चीग एःके। 42यहुदीक्याइ थाङ सोगेन ङीःमादी छुजेरा छोल्दी एःके ओःले ओः तुःर्साङ थामालारा एःक्योक सोङ्गारा खुङक्याइ येशुइ फुम्बुला ओःला ज्यासी।
Currently Selected:
युहन्ना 19: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
