युहन्ना 18
18
येशुला जुम्क्योक
(मत्ती २६:४७-५६; मर्कुस १४:४३-५०; लुका २२:४७-५३)
1येशुइ एःन्डुले प्रार्थना पेःमीःजीक राःङगीइ योबाक्या ङीमु कीद्रोन लाःकेन उपत्यकाइ फार्केनला एःक्योक बगैंचाला काःल्सी ओःले ओः नाःङ्ला स्युःसी। 2ओः ठाउँ येशुला जुम्दी तेर्केन यहुदालाङ टेःम्बा एःके चीलेलाःना येशु राःङगीइ योबाक्या ङीमु ओःला डोगेन्दी पेःउके। 3ओः तेःकासु चीङ थेक्या ओःले छेस्यो पुजाहारीक्या रा फारीसीक्याइ ताङ्क्योक कोन्ज्योइ मन्दीर ह्रुङेन कोःरालुक्याला ख्योङ्दी यहुदा ओः बगैंचा नाःङ्ला ओःङ्सी। खुङक्याइ पुल्ठोक्या, छेमीक्या ओःले टीःक्या खुर्ती एःके।
4राःङखाला ओःङ्जे चाल्क्योक थाम्जेर ताम येशुइ छोर्ती एःके। ओः सोङ्गारा, तोःङ्ला काःल्दी खुङगीइ ओः मीःक्याला टीःसी, “ख्याक्याइ सुला छोल्देरा एःपा?” 5खुङक्याइ येशुला लाःसी, “नासरतकीइ येशुला।” येशुइ खुङक्याला लाःसी, “ओःखो ङाः इःङे।” ओःले खुङला जुम्दी तेर्केन यहुदाङ खुङक्या ङीमुरा लाःङ्दी तेःती एःके। 6येशुइ खुङक्याला, “ङाः ओःखोरा इःङे।” लाःकासुना खुङक्या क्याःपछ्योले सर्तीसी, ओःले साला रीःल्सी। 7फीर्च्या येशुइ खुङक्याला टीःसी, “ख्याक्याइ सुला छोल्देरा एःपा?” खुङक्याइ लाःसी, “नासरतकीइ येशुला।” 8येशुइ लाःसी, “ङाःइ ख्याक्याला लाःसी ले, ङाः ओःखोरा इःङे। ओः सोङ्गारा, ख्याक्याइ ङाःला छोल्देरा एः लाःना दी मीःक्यालादी डोजे तेर।” 9“ख्याइ ङाःला तेर्क्योकक्या नाःङ्ला चीगलाङ ङाःइ गुमाइ माती” लाःती खुङगीइ लाःक्योक ताम छाङ्ज्युक लाःती दीखो काःल्सी।
10सीमोन पत्रुसकीइ राःङ ङीमु एःक्योक तरवार तेङ्दी छेस्यो पुजाहारीइ लाबुला क्याःप्सी ओःले खोइ च्याःबु नाम्ज्यो तुप्ती चेतेर्सी। ओः लाबुइ मीःन माल्खास एःके। 11येशुइ पत्रुसला लाःसी, “तरवार स्युपला लुदो। ची ङाःला आबाइ तेर्क्योक तुःक्पुइ मेःन्ज्यालाःम्ले मीःथुङ्जे ले?”
हन्नासकीइ तोःङ्ला येशु
12ओः तीङ्ला थेक्या, खुङक्याइ कप्तान ओःले कोन्ज्योइ मन्दीर ह्रुङेनक्याइ येशुला जुम्सी ओःले खुङला ताःम्सी। 13तोःङ्ला खुङक्याइ येशुला हन्नाससाःला खेर्सी, खुङदी ओः लोःइ चोइ पुजाहारी कैयाफाइ क्याःल्बु एःके। 14दी कैयाफाइरा, “थाम्जेर मीःक्याइ साटो मेःन्दा चीग मीः सीजे याःबु इःङे” लाःती यहुदीक्याइ छेस्योक्याला लाःती एःके।
पत्रुसकीइ येशुला ङोःमेसेए लाःक्योक
(मत्ती २६:६९-७०; मर्कुस १४:६६-६८; लुका २२:५५-५७)
15सीमोन पत्रुस ओःले राःङ्सा मेःराङ चीग योबा येशुइ तीङ तीङ्ला काःल्सी। ओः राःङ्सा योबाइ चोइ पुजाहारीला याःबु पेःदी ङोःसेउके। ओः सोङ्गारा, खुङ येशु ङीमु चोइ पुजाहारीइ खीमगीइ इल्दोकला स्युःसी। 16इःनाङ पत्रुस फीला गेटला लाःङ्दी तेःती एःके। ओः राःङ्सा योबा फीला थेङ्दी गेटला ह्रुङ्दी तेःक्योक पेःन्पीःजा ङीमु ताम लाःती पत्रुसला नाःङ्ला ख्योङ्सी। 17ओः पेःन्पीःजाइ पत्रुसला टीःसी, “ची ख्योङ ओः मीःइ योबा मीःङे ले?”
पत्रुसकीइ लाःसी, “ङाः मीःङे।”
18ख्यारी एःक्योक सोङ्गारा ओःला लाबुक्या ओःले पालेक्या मेः तुःदेरा लाःङ्दी तेःती एःके। ओःले पत्रुससाङ खुङक्या ङीमु लाःङ्दी मेः तुःगाला स्युःसी।
चोइ पुजाहारीइ येशुला टीःक्योक
(मत्ती २६:५९-६६; मर्कुस १४:५५-६४; लुका २२:६६-७१)
19चोइ पुजाहारीइ येशुला खुङगीइ योबाक्याइ बारेला ओःले खुङगीइ लोप्क्योक तामक्याइ बारेला टीःसी। 20येशुइ खुङला लेःन लोदी लाःसी, “ङाःइ थाम्जेरकीइ तोःङ्ला लाःसीःङ्दी एः। थाम्जेर यहुदीक्या जोम्ङेन जोम्साखीमक्याला ओःले कोन्ज्योइ मन्दीरला ङाःइ तेन्दुरा लोप्ती एः। ङाःइ खाजुम्माले चीङ लाःती म्याः। 21ङाःला ख्याइ चीले टीःदेरा एःपा? ङाःइ लोप्क्योक कोःगेनक्यालारा टीःदो ना। ङाःइ लाःक्योक तामक्या दीखुङक्याला टेःम्बा एः।” 22येशुइ दी तामक्या लाःकासुना थामाला लाःङ्दी तेःक्योक पालेक्या नाःङ्ला मेःराङ चीगकीइ खुङला प्याःर्तुङ तेर्सी ओःले एःन्डु लाःसी, “ची चोइ पुजाहारीला एःन्डुले लेःन तेर्कुबा?” 23येशुइ ओःखोला लाःसी, “ङाःइ गल्ती लाःती एः लाःना ओःन्डु लोःप, इःनाङ ङाःइ डीक्पु लाःती एः लाःना ङाःला चीले रोप्कुबा?” 24ओः तीःजी थुपाङ येशुला ताःम्दीरा ज्यादी एःके, ओःले हन्नासकीइ येशुला ओःन्डुलेरा चोइ पुजाहारी कैयाफासाःला ताङ्तेर्सी।
पत्रुसकीइ फीर्च्या येशुला ङोःमेसेए लाःती लाःक्योक
(मत्ती २६:७१-७५; मर्कुस १४:६९-७२; लुका २२:५८-६२)
25ओः तीःजी थुपाङ सीमोन पत्रुस लाःङ्दी मेः तुः तेःती एःके। खुङक्याइ पत्रुसला लाःसी, “ची खुङगीइ योबाक्या नाःङ्ला मेःराङ चीग ख्योङ मीःङे ले?” पत्रुसकीइ इन्कार पेःदी लाःसी, “ङाः मीःङे।”
26मेः तुःदी तेःकेनक्या नाःङ्ला पत्रुसकीइ नाम्ज्यो तुप्ती चेतेर्क्योक मीःइ छ्योरी चीग ओःला एःके। खुङङाङ चोइ पुजाहारीइ लाबु एःके। ओःले खुङगीइ पत्रुसला लाःसी, “ङाःइ ख्योला ओः मीः ङीमु बगैंचाला थोङ्क्योक, मीःङे ले?” 27पत्रुसकीइ फीर्च्याङ मीःङे लाःती लेःन तेर्सी। ओःले ओः तेःकासुरा च्याःबु प्रेःसी।
येशु पीलातसकीइ तोःङ्ला
(मत्ती २७:१-२,११-३१; मर्कुस १५:१-२०; लुका २३:१-५,१३-२५)
28ङामु नाःम्सुङलारा खुङक्याइ येशुला कैयाफाइ खीमलाःम्ले रोमी हाकीमगीइ क्याःल्खाङला खेर्सी। यहुदीक्या क्याःल्खाङ नाःङ्ला माःस्यु चीलेलाःना नीस्तार मेःलीगीइ डेन साःजे मेःज्योरए लाःती खुङक्याइ राःङला चाङ्मा ज्याउके।#१८:२८ पीलातसदी यहुदी म्याःके, ओः सोङ्गारा, यहुदीक्या खुङगीइ क्याःल्खाङला मीःस्युक्योक। खुङक्याइ ठीमला खुङक्या राःङ्सा क्युःपाइ मीःक्याइ खीमला स्युःसी लाःना खुङक्या असुद्ध ओःङ्गुए लाःकुके। 29ओः सोङ्गारा, पीलातस फीला थेङ्दी खुङक्यासाःला काःल्सी ओःले टीःसी, “दी मीःइ वीरुद्धला ख्याक्याइ चीइ माःताक्पा च्याःङ्दी एःपा?”
30खुङक्याइ लाःसी, “दी मीःइ माःताक्पा माःबेक्योक एःना, चीले ख्यासाःला ख्योङ्जे एःके ले?”
31पीलातसकीइ खुङक्याला लाःसी, “ख्याक्या राःङ्रा दीखोला खेर, ओःले ख्याक्याइ राःङगीइ छ्येइ ठीम च्योःङ्राले दीखोला ठीम पेःदो।”
यहुदीक्याइ खुङला लाःसी, “काःन्दीङ मीःला मृत्युदण्ड तेर्केन आङ्ज्या ङीःला म्याः।” 32राःङ काःन्डुले सीकोःन्दी इःङे लाःती येशु राःङगीइरा लाःक्योक ताम छाङ्जेला एःन्डुबा काःल्योक इःङे।
33पीलातस नाःङ्ला काःल्सी ओःले येशुला केक्याःप्ती टीःसी, “ची ख्यो यहुदीक्याइ क्याःल्बु इःङे?”
34येशुइ लाःसी, “ख्या राःङगीइ एःन्डु लाःक्योक इःम्बा की राःङ्सा सुइ ख्याला ङाःइ बारेला लाःक्योक इःङे?”
35पीलातसकीइ लाःसी, “ची ख्योइ ङाःला यहुदी इःङे लाःती टेःम्बा साल्गुबा? ख्योइ राःङगीइ क्युःपाइ मीःक्या ओःले छेस्यो पुजाहारीक्याइरा ख्योला ङाःइ लाःक्पाला तेर्ती एः। ख्योइ ची माःताक्पा पेःदी एःपा?”
36येशुइ लाःसी, “ङाःइ क्याःल्खाप नी दी जाम्बुलीङगीइ क्याःल्खाप च्योःङ्रा मीःङे। ङाःइ क्याःल्खाप दी जाम्बुलीङगीइदी च्योःङ्रा इःङे लाःना नी ङाःला ब्य्राङेनक्याइ ङाःला यहुदीक्याइ लाःक्पालाःम्ले सेनच्युजेला राःगाम क्याःप्चेके। इःनाङ ङाःइ क्याःल्खाप दी जाम्बुलीङगीइदी मीःङे।”
37पीलातसकीइ खुङला टीःसी, “ओःन्डु इःङे लाःना ख्यो क्याःल्बुरा इःङे?”
येशुइ लेःन लोदी लाःसी, “ङाः क्याःल्बु इःङे लाःती ख्या राःङगीइरा लाःतेरा एः। ङाः तेःन्दामगीइ ताम लाःचेलारा दी जाम्बुलीङला केक्योक इःङे। तेःन्दामगीइ ताम सेम थेकेनक्या थाम्जेरकीइ ङाःइ ताम कोःउए।”
38पीलातसकीइ खुङला टीःसी, “तेःन्दम ची इःम्बा?”
एःजे लाःती खुङ यहुदीक्यासाःला फीला थेङ्दी काःल्सी, ओःले खुङक्याला लाःसी, “ङाःइ दण्ड तेर्चेला दी मीःला नी चीङ माःताक्पारा माःफ्रे। 39ख्याक्याइ रीमठीम अनुसार लोःरी टाःङ्मा नीस्तार मेःलीङला मेःराङ चीग कैदीला ख्याक्याइ लागी पोःर्कुए। ओः सोङ्गारा, ङाः ख्योक्याइ लागी दी पालो ची ओः यहुदीक्याइ क्याःल्बु लाःकेन्दीला पोःर्तेर्का?”
40इःनाङ खुङक्या एःन्डु लाःतेरा केताङ्सी, “दीखोला मीःङे! बारब्बाला पोःर्तेर!” बारब्बादी बीद्रोही एःके।
Currently Selected:
युहन्ना 18: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
