युहन्ना 17
17
येशुइ प्रार्थना पेःक्योक
1दी ताम लाःसीःङ्मीःजीक येशुइ नाःम्खालीङला तादी लाःसी, “ए आबा, ताः तीःनाम ओःङ्दी एः, ख्याइ महीमा तेङ्जे खुज्युक लाःती ख्याइ पुःला महीमीत जोदो। 2चीलेलाःना ख्याइ खुङला तेर्क्योक थाम्जेर मीःक्याला नाःमाङ मीसीगेन मीःजी तेर्च्युक लाःती ख्याइ खुङला थाम्जेर मीःक्याखाला आङ्ज्या तेर्ती एः। 3ख्या चीग्रा चीग तेःन्दामगीइ कोन्ज्यो ओःले ख्याइ ताङ्क्योक येशु ख्रीष्टला ङोःसेजेरा नाःमाङ मीसीगेन मीःजी इःङे। 4ख्याइ ङाःला तेर्क्योक लेःगा ङाःइ छाङ्च्युदी ख्याला साजाम्बुलीङला महीमा पेःदी एः। 5ताः आबा, जाम्बुलीङ जोजे तोःङ्ला ङाः ख्या ङीमु एःकासुना ङाःइ महीमा एःके, ओः महीमा फीर्च्या ख्या एःक्योक ठाउँला ङाःला ना।
6जाम्बुलीङलाःम्ले ख्याइ ङाःला तेर्क्योक मीःक्याला ङाःइ ख्याला ङोःसेच्युदी एः। खुङक्या ख्याइदीरा एःके, ओःले ख्याइ ङाःला तेर्सी। ओःले खुङक्याइ ख्याइ लोप्क्योक ङीःन्दी एः। 7ख्याइ ङाःला तेर्क्योक थाम्जेर ताम ख्यालाःम्लेरा ओःङ्क्योक इःङे लाःती ओःखो ताः खुङक्याइ छोर्ती एः। 8चीलेलाःना ख्याइ ङाःला तेर्क्योक लेःङ्गो ङाःइ खुङक्याला तेर्ती एः, ओःले खुङक्याइ ओःखोला ङीःन्दीङ एः। ङाः तेःन्दामरा ख्यालाःम्ले ओःङ्क्योक इःङे लाःती खुङक्याइ सेदी एः। ओःले ख्याइ ङाःला ताङ्क्योक इःङे लाःती खुङक्याइ सेमल्हुक लुदी एः।
9ङाः खुङक्याइ लागी प्रार्थना पेःगे, जाम्बुलीङगीइ लागी ङाः प्रार्थना मेःबे, इःनाङ ख्याइ ङाःला तेर्क्योक मीःक्याइ लागीरा प्रार्थना पेःगे चीलेलाःना खुङक्या ख्याइदीरा इःङे। 10ङाः ङीमु एःक्योक थाम्जेर ख्याइदीरा इःङे ओःले ख्याइदी थाम्जेर ङाःइदी इःङे, ओःले खुङक्यालाःम्ले ङाःइ महीमा काःल्दी एः। 11ताः ङाः ख्यासाःला ओःङ्देरा एः। ङाः माःङ्बुरा बेर दी जाम्बुलीङला मेःते, इःनाङ दीखुङक्या लाःना दी जाम्बुलीङला तेःकुए। चाङ्मा आबा, ख्याइ ङाःला तेर्क्योक ख्याइ मीःनगीइ ल्हेइ खुङक्याला थार्च्युदी ज्यो, ओःले उः चीग काःल्क्योक च्योःङ्रारा खुङक्याङ चीग काःल्ज्युक। 12खुङक्या ङीमु एःकासुना ख्याइ ङाःला तेर्क्योक ख्याइ मीःनगीइ ल्हे ङाःइ खुङक्याला थार्च्युदी ज्यासी। खुङक्या नाःङ्ला सीःङ्दा चेती डोगेन मेःन्दा चीग#१७:१२ चेती डोगेन मेःन्दा चीग दीखो लाःक्योकदी येशुला तुःक तेर्केन यहुदा इस्करीयोतकीइ बारेला लाःक्योक इःङे। बाहेक राःङ्साला ङाःइ सीःङ्दा चेती डोजे मातेर चीलेलाःना छ्येइ पेज्याला प्रुःक्योक ताम छाङ्जेला दीखो ओःङ्रा कोःउके।
13ताः ङाः ख्यासाःला ओःङ्देरा एः ओःले खुङक्याइ सेम ङाःइ खाम्साङाइ काःङ्ज्युक लाःती दी तामक्या जाम्बुलीङला एःकासुःरा लाःतेरा एः। 14ङाःइ खुङक्याला ख्याइ शीक्षा तेर्सी ओःले जाम्बुलीङगीइ मीःक्याइ खुङक्याला हेला पेःसी, चीलेलाःना ङाः च्योःङ्रारा खुङक्याङ दी जाम्बुलीङगीइदी मीःङे। 15ख्याइ खुङक्याला जाम्बुलीङलाःम्ले खेर लाःती ङाः वासी मेःबे, इःनाङ खुङक्याला शैतानलाःम्ले थार्च्युदी ज्यो। 16ङाः च्योःङ्रारा खुङक्याङ दी जाम्बुलीङगीइदी मीःङे। 17खुङक्याला तेःन्दामगीइ चाङ्मा जोतेर, ख्याइ ताम तेःन्दाम इःङे। 18ख्याइ ङाःला जाम्बुलीङला ताङ्क्योक च्योःङ्रा ङाःयाङ खुङक्याला जाम्बुलीङला ताङ्दी एः। 19ख्याइ तेःन्दामगीइ खुङक्या राःङ्लारा चाङ्मा जोखुज्युक लाःती ङाःइ खुङक्याइ लागी राःङलारा चाङ्मा जोसी।
20ङाः दीखुङक्याइ लागी चीग्रा प्रार्थना मेःबे, इःनाङ दीखुङक्याइ लेःङ्गो कोःदी ङाःला सेमल्हुक लुगेनक्याइ लागीङ प्रार्थना पेःदेरा एः। 21खुङक्या थाम्जेर चीग्रा डोजे खुज्युक लाःती ङाः वासी पेःदेरा एः। आबा, ख्या ङाः ङीमु ओःले ङाः ख्या ङीमु एःकारा उः चीग्रा काःल्योक च्योःङ्रारा खुङक्याङ चीग्रा डोजे खुज्युक ओःले ख्याइरा ङाःला ताङ्क्योक इःङे लाःती जाम्बुलीगीइ मीःक्याइ सेखुज्युक। 22ख्या रा ङाः चीग्रा काःल्क्योक च्योःङ्रारा खुङक्याङ चीग्रा काःल्ज्युक लाःती ख्याइ ङाःला तेर्क्योक महीमा ङाःइ खुङक्याला तेर्ती एः। 23ङाः खुङक्या ङीमु ओःले ख्या ङाः ङीमु एः। एःन्डुले खुङक्या पुरा रुपकीइ चीग्रा काःल्ज्युक। ओःले ङाःला ख्याइ ताङ्क्योक इःङे ओःले ख्याइ ङाःला च्याःम्बु पेःक्योक च्योःङ्रारा ख्याइ खुङक्यालाङ च्याःम्बु पेःउए लाःती जाम्बुलीगीइ मीःक्याइ सेज्युक।
24ए आबा, ख्याइ ङाःला तेर्क्योक मीःक्या ङाः काःला काःल्बा खुङक्या ङाः ङीमुरा ओःला तेःती ख्याइ ङाःला तेर्क्योक महीमा खुङक्याइ थोङ्जे खुज्युक लाःती ङाः वासी पेःगे। जाम्बुलीङ जोजे तोःङ्लारा ख्याइ ङाःला च्याःम्बु पेःक्योक सोङ्गारा ओः महीमा ख्याइ ङाःला तेर्ती एःके।
25ए ताःक्पा आबा, जाम्बुलीङगीइ मीःक्याइ ख्याला ङोःमेसेए, इःनाङ ङाः ख्याला ङोःसेउए ओःले ख्याइरा ङाःला ताङ्क्योक इःङे लाःती दी योबाक्याइ ङोःसेउए। 26ख्याइ ङाःला पेःक्योक च्याःम्बु खुङक्यालाङ एःच्युक ओःले ङाः खुङक्या ङीमु एःच्युक लाःती खुङक्याइ कील्ला ख्याला ङाःइ ङोःसेच्युसी ओःले ताःरुङ ङोःसेच्युदेरा तेःके।”
Currently Selected:
युहन्ना 17: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
