युहन्‍ना 20

तोङ्‍राङ तुःर्सा

(मत्ती २८:१-८; मर्कुस १६:१-८; लुका २४:१-१२)

1साताइ तोःङगीइ ङीःमा ङामु नाःम्सुङ एःकासुनारा मरीयम मग्दलीनी तुःर्सा एःक्योक फुकला ओःङ्सी, ओःले खुङगीइ फुककीइ खालाःम्‍ले तोः तेङ्सीःङ्क्योक थोङ्सी। 2खुङ सीमोन पत्रुस ओःले येशुइ च्याःम्बु पेःगेन राःङ्सा योबासाःला छ्‍योङ्दी काःल्सी ओःले खुङक्याला लाःसी, “खुङक्याइ प्रभुला तुःर्सालाःम्‍ले तेङ्दी खेर्तु, ओःले खुङला काःला ज्यादी एःपा ओःखो ङीः मेसे।” 3ओः सोङ्‍गारा, पत्रुस ओःले राःङ्सा योबा तुःर्साछ्‍योले काःल्सी। 4ओः ङीक्‍कार ङीमु ङीमुरा छ्‍योङ्सी, इःनाङ राःङ्सा योबा पत्रुसला क्याःल्दी तुःर्साला तोःङ्ला लेप्सी। 5तुःर्सा नाःङ्ला कुःदी तासुना, खुङगीइ सुतीइ केःलाक्या चीग्रा थोङ्सी, इःनाङ खुङ नाःङ्ला माःस्युः। 6सीमोन पत्रुस खोइ तीङ तीङ्ला ओःङ्सी, ओःले तुःर्सा नाःङ्ला स्युःसी ओःले खुङगीइयाङ सुतीइ केःलाक्या चीग्रा थोङ्सी। 7खुङगीइ गोला ताःम्क्योक केःलादी सुतीइ केःलाक्या ङीमु म्याःके, इःनाङ राःङ्सा ठाउँ चीगला पाटारतीदी ज्यादी एःके। 8ओःले तोःङ्ला तुःर्साला लेप्केन राःङ्सा योबाङ नाःङ्ला स्युःसी, ओःले ओःखो थोङ्दी खुङगीइ सेमल्हुक लुसी। 9(चीलेलाःना खुङक्याइ येशु सीक्योकलाःम्‍ले सोम्बो काःल्दी लाःङ्‍कोःउए लाःक्योक छ्‍येइ पेज्याइ ताम ओः तीःजी थुपाङ सेदी म्याःके।) 10ओः तीङ्ला ओः योबाक्या राःङगीइ खीमला लोःसी।

येशु मरीयम मग्दलीनीसाःला थोङ्क्योक

(मत्ती २८:९-१०; मर्कुस १६:९-११)

11मरीयम तुःर्साइ फीला ङुःदेरा लाःङ्दी तेःती एःके। खुङगीइ ङुःदेरा तुःर्साछ्‍योले कुःदी तासी, 12ओःले येशुइ फुम्बुला जाक्योक ठाउँला कार्मु केःला केःङ्क्योक मेःराङ ङी स्वर्गदुतक्याला थोङ्सी, मेःराङ चीगला गोछ्‍योले ओःले राःङ्सादीला काङ्बाछ्‍योले तेःक्योक खुङगीइ थोङ्सी। 13स्वर्गदुतक्याइ खुङला लाःसी, “ख्या चीले ङुःदेरा एःपा?” खुङगीइ स्वर्गदुतक्याला लाःसी, “खुङक्याइ ङाःइ प्रभुला खेर्तु, ओःले खुङक्याइ खुङला काःला ज्यादी एःपा ङाःइ छोर्ती म्याः।”

14खुङगीइ दी लाःसीःङ्मीःजीक खुङ क्याःपछ्‍योले लोःसी ओःले खुङगीइ येशुला लाःङ्दी तेःक्योक थोङ्सी, इःनाङ खुङगीइ ओःखो येशुरा इःङे लाःती ङोःमासे।

15येशुइ खुङला लाःसी, “ए आजी, ख्या चीले ङुःदेरा एःपा? ख्याइ सुला छोल्क्योक?”

खुङगीइ ओः मीःला बगैँचाला लेःगा पेःगेन मीः इःङेन दुबा लाःती ठीवा साल्सी ओःले लाःसी, “हजुर, ख्याइ खुङला दीलाःम्‍ले खेर्क्योक इःङे लाःना, काःला ज्यादी एःपा ङाःला लोःप, ओःले ङाः खुङला खेर्के।”

16येशुइ खुङला लाःसी, “मरीयम!” खुङ येशुछ्‍योले लोःसी ओःले हीब्रु तामला लाःसी, “रब्बोनी!” दीखो लाःक्योक “लोबेन” इःङे।

17येशुइ खुङला लाःसी, “ङाःला माःदे, चीलेलाःना ङाः ताःसेथुप आबासाःला याःरला काःल्दी म्याः। इःनाङ ङाःइ योबाक्यासाःला काःल्दी लाःतेर, ‘ङाः ङाःइ आबा रा ख्याक्याइ आबा, ङाःइ कोन्ज्यो रा ख्याक्याइ कोन्ज्योसाःला डोदेरा एः।’”

18मरीयम मग्दलीनी काःल्सी ओःले योबाक्याला लाःसी, “ङाःइ प्रभुला थोङ्दी एः!” ओःले खुङगीइ येशुइ लाःक्योक ताम योबाक्याला लाःतेर्सी।

येशु योबाक्यासाःला थोङ्क्योक

(मत्ती २८:१६-२०; मर्कुस १६:१४-१८; लुका २४:३६-४९)

19साङीःमाइ कुःङ्सेला योबाक्या यहुदीक्याइ गोछेस्योक्याइ जीबाइ पेःगासुना कोःक्याला दीमीक क्याःप्‍ती एःके। येशु खेप चीगलारा खुङक्याइ कील्‍ला थोङ्सी ओःले खुङक्याला लाःसी, “ख्याक्याला खाम्साङा काःल्ज्युक!” 20एःजे लाःती येशुइ खुङक्याला राःङगीइ लाःक्पा ओःले क्यामक्याममाङ तेङ्तेर्सी।#२०:२० येशुइ लाःक्पाला तीःप्क्योक काँटीइ डोपक्या ओःले खुङगीइ क्यामक्यामला सुप तोल्क्योक थोङ्ज्युक लाःती एःन्डु पेःसी, ओः सोङ्‍गारा, खुङक्याइ येशु तेःन्दामरा खुङरा इःङेन दुबा लाःती छोर्च्युक लाःती पेःसी। प्रभुला थोङ्दी योबाक्या माःङ्बुरा केःदाङ काःल्सी। 21ओःले येशुइ फीर्च्या खुङक्याला लाःसी, “ख्याक्याला खाम्साङा काःल्ज्युक। ङाःला आबाइ ताङ्क्योक च्योःङ्‍रारा, ङाःयाङ ख्याक्याला ताङ्देरा एः।” 22ओःले एःजे लाःमीःजीक येशुइ खुङक्याखाला फुदेरा लाःसी, “चाङ्मा ला लेःङ्दो। 23ख्याक्याइ मीःक्याइ लाःयो क्षमा पेःसी लाःना, खुङक्याइ लाःयो क्षमा ओःङ्‍गुए। ख्याक्याइ खुङक्याइ लाःयो क्षमा माःबे लाःना खुङक्याइ लाःयो क्षमा मेःयुङेन एः।”

येशु थोमासाःला थोङ्क्योक

24येशु ओःङ्‍गासुना मेःन्दा चीङ्‍ङी योबाक्या नाःङ्ला जाँउले लाःकेन थोमादी खुङक्या ङीमु म्याःके। 25ओः सोङ्‍गारा, राःङ्सा योबाक्याइ खुङला लाःसी, “ङीःइ प्रभुला थोङ्दी एः।” इःनाङ थोमाइ खुङक्याला लाःसी, “ङाःइ प्रभुइ लाःक्पाला तीःप्क्योक काँटीइ डोप माःथोङ्थुप, ओः काँटीइ डोपला ङाःइ थेबु मालुफुप, ओःले खुङगीइ क्यामक्याम नाःङ्ला ङाःइ लाःक्पाइ माःदेथुप, ङाः सेमल्हुक मीलु।”

26ङीःमा केः तीङ्ला खुङगीइ योबाक्या फीर्च्या खीम नाःङ्लारा एःके। थोमाङ खुङक्या ङीमु एःके। कोःक्याला दीमीक क्याःप्‍ती एःके, इःनाङ येशु नाःङ्ला स्युःसी, ओःले खुङक्याइ कील्‍ला लाःङ्दी लाःसी, “ख्याक्याला खाम्साङा काःल्ज्युक!” 27ओःले खुङगीइ थोमाला लाःसी, “ख्योइ थेबु दीला ज्यो, ओःले ङाःइ लाःक्पाक्या तादो। ख्योइ लाःक्पा स्याःङ्दी ङाःइ क्यामक्यामला लुदो। पाःकेन माःबे, इःनाङ सेमल्हुक लुदो।”

28थोमाइ खुङला लाःसी, “ङाःइ प्रभु ओःले ङाःइ कोन्ज्यो!” 29येशुइ खुङला लाःसी, “ख्योइ ङाःला थोङ्क्योक सोङ्‍गारा ङाःखाला सेमल्हुक लुदी एः, इःनाङ ङाःला माःथोङ्बारा ङाःला सेमल्हुक लुगेनक्याइ मोलाम ज्योर्ती एः।”

दी पेज्या प्रुःक्योक कारण

30येशुइ राःङ्सा माःङ्बुरा चुःन्डुलक्या योबाक्याइ तोःङ्ला पेःदी एःके, ओःखोदी दी पेज्याला प्रुःदी म्याः। 31इःनाङ ख्याक्याइ येशुरा थार्च्युगेन ख्रीष्ट ओःले कोन्ज्योइ पुः इःङे लाःती सेमल्हुक लुखुज्युक, ओःले खुङखाला सेमल्हुक लुदी ख्याक्याला मीःली ज्योर्च्युक लाःती दी तामक्या प्रुःक्योक इःङे।

Currently Selected:

युहन्‍ना 20: SYW

Highlight

Copy