लूका 3

यूहन्ने प्रचारे कम शुरु करुण

मत्ती 3:1-6; मरकुस 1:2-6

1जपल सम्राट तिबिरियुस कैसर राज कते पंद्रहा साल भोई गो थिए, त यहूदिया राज्य पुठ पुन्तियुस पिलातुस, गलील राज्य पुठ हेरोदेस#3:1 ए हेरोदेस लूका 1:5 अन्तर लिखो हेरोदेस नेईं। से यीशु जमणे कुछ सालुं बाद मरी गो थिआ। बल्कि ए तसे कुआ भो। एसे पूरा नओं हेरोदेस आन्तिपास असु। , इतुरैया त त्रखोनीतिस राज्य पुठ तसे भाई फिलिप्पुस, होर अबिलेने राज्य पुठ लिसानियास राज्यपाल थिआ। 2तेस टेम हन्ना त काइफा बोडे पुजारे थिए। तपल परमेश्वरे संदेश जकराये कुआ यूहन्ना केईं अरुणि धार पुजा। 3त से यरदन दरेउए आर-पारी सोब इलाकी अन्तर घेई कइ प्रचार करण लगा कि मेह्‍णु अपु अपु मन बदिल कइ पुओणि अन्तर चुसिए, तोउं तेन्के पाप माफ भोई घियेल। 4यशायाह भविष्य वक्ते अपु कताब अन्तर यूहन्ना बारे ईं लिख कइ बताओ असु:

“अरुणि धार अन्तर कोई हक देण लगो असा कि

‘प्रभु जे बथ बणाण दिए

त तसे बथ सुसुर कइ बणाए।

5हर यक रैहि भरी घेन्ति

त हर फाट उन्न करी घेण असु,

त जे केना असा, से सुसुर त जे उन्न खड़ी असा, से खुली बथ बणती।

6त सम्हाई जेईं परमेश्वर मेह्‍णु बचान्ते हेरते।’”

7तस केईं दरेउ अन्तर चुसुण जे एन्ता हुसुड़े जे तेन बोलु, “ए जहरिले कीड़ी के गभुरुओ! तुस बि इरुह किस परमेश्वरे एणे बाड़ी लेहेर केईआं बचणे कोशिश करण लगो असे? 8किस ना तुस ईं कम करे जेसे बेलि पता लगाल कि तुसी सच्चे बि अपु मन बदलो असे। होर ईं सोच कइ धोखा ना खाए कि ‘हें बोउ अब्राहम भो; त असी मन बदलुणे कोई जरूरत नेईं।’ किस कि अउं तुसी जे बोता कि परमेश्वर अब्राहम जे घोड़ी अन्तरा बि गभुर किढ़ बटता। #रोमी 4:19; शुरुवात 18:14 9हेरे! अभेईं बि झेउठ बुटे जील रख छो असा ताकि जे बि बुटा खरा फल न देन्ता तेस काट कइ आग अन्तर छइ छते।”

10त हुसुड़े पुछु, “असी की करुं?” 11तेन तेन्हि जे बोलु, “अगर तुसी केईं दुई कमीर असी त जेस केईं यक बि नेईं तसे धे यक दिए। होर अगर तुसी केईं रौठि असी त तुस तेन्हि अपु खांजे खिलाए, जेन्हि केईं कुछ बि खांजे नेईं।”

12मामला नेणे बाड़े बि पाणि अन्तर चुसुण जे ए त तेन्हि तस केआं पुछु, “ए गुरु, असी की करुं?” 13तेन तेन्हि जे बोलु, “जतु तुं मामला बणता, तस केआं ज्यादा ना नेण।”

14सपाही बि तस केआं पुछु, “असी की करुं?” तेन तेन्हि जे बोलु, “केसे बि झूठ तंग ना करे। केसे पुठ झूठा दोष न लाए त अपु कमेई पुठ खुश बिशे।”

15तेस टेम, मेह्‍णु मसीह प्रकट भुणे भाड़ बिशो थिए। त से अपु अपु मन अन्तर सोचुण लगो थिए कि यूहन्ना मसीह त ना भो भला? 16त यूहन्ने तेन्हि सोबी जे बोलु, “अउं त सद पाणि अन्तर चुसुण लगो असा, पर जे एण बाड़ा असा से मोउं केआं बि ताकतवर असा। अउं त इस लेएक बि नेईं कि अउं तसे प्युल टाइ सकुं। से तुसी शुची आत्मा त आग अन्तर चुसता। 17अपु खला सुसुर साफ करण जे तसे फटण तसे हतेउ असु। से अपु अनाज केंचार अन्तर कठेरता, पर जे कऊ असा तेस आग अन्तर छता, जे कदी न हुशती।”

यूहन्ने यीशु चुसुण

मत्ती 3:13-17; मरकुस 1:9-11

18-22सोब मेह्‍णु पाणि अन्तर चुसुण केआं पता यीशु बि चुसा। तोउं से दुआ करुं लगो थिआ दे तपल अम्बर खुल गा, होर शुची आत्मा अलणी वेश अन्तर तस पुठ आई। त ई वाणि स्वर्ग केआं भुई “तु में ट्यारा कुआ भो। अउं तोउ जुए खुश असा।”#मत्ती 3:13-17; मरकुस 1:11; लूका 9:35

त यूहन्ने होरी बि शिक्षा दी दी कइ मेह्‍णु खुश खबर शुणान्ता रेहा। पर जपल तेन गलील राज्ये राज्यपाल हेरोदेस त तसे भाई फिलिप्पुसे जुएली हेरोदियास बुच नाजायज रिश्ता बारे बोताउ, त हेरोदेसे यूहन्ना जेहेल अन्तर छइ छड़ा।#मत्ती 14:3,4; मरकुस 6:17,18

यीशु मतोके ऊड़ी

मत्ती 1:2-17

23यीशु कोई तिह साले भो थिआ, जपल तेन अपु सेवाई कम शुरु किउ। मेह्‍णु ईं सोचतेथ कि से यूसुफे कुआ भो। यूसुफ एली कुआ थिआ। 24एली मत्ताते, त मत्तात लेवी, त लेवी मलिके, त मलकी यन्ने, त यन्ना यूसुफे कुआ थिआ। 25त यूसुफ मत्तियाहे, त मत्तियाह आमोसे, त आमोस नहूमे, त नहूम असल्याहे, त असल्याह नगोहे कुआ थिआ। 26त नगोह माते, त मात मत्तियाहे, त मत्तियाह शिमीए त शिमी योसेखे, त योसेख योदाहे कुआ थिआ। 27त योदाह योनान्ने, त योनान्न रेसे, त रेसा जरुब्बबिले, त जरूब्बाबिल शालतिएले, त शालतिएल नेरी कुआ थिआ। 28त नेरी मलकी, त मलकी अद्दी, त अद्दी कोसामे, त कोसाम इलमोदामे, त इलमोदाम एरे कुआ थिआ। 29त एरे येशू, त येशू इलाजारे, त इलाजार योरीमे, त योरीम मत्ताते, त मत्तात लेवी कुआ थिआ। 30त लेवी शमियोने, त शमियोन यहूदे, त यहूदा यूसुफे, त यूसुफ योनामे, त योनाम इलयाकीमे कुआ थिआ। 31त इलयाकीम मलेआहे, त मलेआह मिन्नाहे, त मिन्नाह मत्ताते, त मत्तात नाथाने, त नाथान दाऊदे कुआ थिआ। 32त दाऊद जिशे, त जिशा ओबेदे, त ओबेद बोआजे, त बोआज सलमोने, त सलमोन नहशोने कुआ थिआ। 33त नहशोन अम्मीनादाबे, त अम्मीनादाब अदमीने, अदमीन अर्नी, त अर्नी हिस्रोने, त हिस्रोन फिरिसे, त फिरिस यहूदे कुआ थिआ। 34त यहूदा याकूबे, त याकूब इसहाके, त इसहाक अब्राहमे, त अब्राहम तिरहे, त तिरह नाहोरे कुआ थिआ। 35त नाहोर सरूगे, त सरूग रऊ, त रऊ फिलिगे, त फिलिगे एबिरे, त एबिर शिलहे कुआ थिआ। 36त शिलह केनाने, त केनान अरफक्षदे त अरफक्षद शेमे, त शेम नूहे त नूह लिमिके कुआ थिआ। 37त लिमिक मथूशिलहे, त मथूशिलह हनोके, त हनोक यिरिदे, त यिरिद महललेले, त महललेल केनाने कुआ थिआ। 38त केनान एनोशे, त एनोश शेते, त शेत आदमे त आदम परमेश्वरे कुआ थिआ।

Currently Selected:

लूका 3: pgg

Highlight

Copy