लूका 4

शैतान यीशु परीक्षा नेण

मत्ती 4:1-11; मरकुस 1:12-13

1यीशु यरदन दरेउ केआं शुची आत्माई जुए भरी कइ वापिस एई गा। त से शुची आत्माई बेलि अरुणि धार जे नी गा। 2तठि चढ़ी रोज तकर शैतान#4:2 शैतान प्रेती के राजा भो। पेहले से परमेश्वरे खिलाफ भुआ त परमेश्वरे से स्वर्ग केआं फटाई छड़ा। तपल केआं खड़ से परमेश्वरे हर कमी के खिलाफ असा। तस लचेरता रेहा। तेन्हि रोजी यीशु कुछ नेओथ खओ। त जपल से रोज पूरे भुए त तस ढुक लगी।

3त शैताने तस जे बोलु, “अगर तु परमेश्वरे कुआ भो त इस घोड़ जे बोल कि रौठि बण!” 4यीशु तस जे बोलु, “धरमे कताब अन्तर लिखो असु:

‘मेह्‍णु सद रौठि बइ ना जीन्ता।’#विधि 8:3”

5त शैतान से खड़िया नीआ त यक म्नट अन्तर पूरे मतोके राज्य हराले। 6-7होर तेन तस जे बोलु, “अगर तु उटेऊ में खुर बिन कइ में पूजा कराल, त एन्हि सोब राज्ये हक त शान अउं तेन्धे देन्ता। किस कि ए सोब मेन्धे दुतो असे त अउं जेस चहूं तसे धे दी सकता।” 8यीशु तस जे बोलु, “धरमे कताब अन्तर लिखो असु कि

‘तु सद प्रभु अपु परमेश्वरे सेवा कर त हमेशा तसेरी पूजा कर।’”#विधि 6:13

9तोउं शैतान से नी कइ यरुशलेम देहरे पुठे कुणे पुठ खड़ियेर छड़ा। त तेस जे बोलु, “अगर तु परमेश्वरे कुआ भो, त अपफ इठिआ उणिहां टऊ दी छड़; 10किस कि धरमे कताब अन्तर लिखो असु:

‘से तोउ केईं जे अपु स्वर्गेदूत लंघान्ता कि तें रक्षा करे,

11त से तोउ अपु कल्हाई कइ छते

ताकि घोड़े बइ तें खुर ना लगियेल।’”#छुआंरी 91:11-12

12त यीशु तेस जे बोलु, “ई बि त लिखो असु ना कि ‘तु अपु प्रभु परमेश्वर न परख।’”#विधि 6:16; निसुणे 17:3; गिणणे 21:5; छुआंरी 78:18-19,41,56; छुआंरी 5:9; 1 कुरिन्थ 10:9

13जपल शैताने यीशु सम्हाई परीक्षा नी त सही टेमे एणे तकर से तसे भेएड़ केआं नश गा।

यीशु सेवाई कम शुरु करण त चेला बणाण

(4:14—6:49)

यीशु अपु सेवाई कम शुरु करण

मत्ती 4:12-17; मरकुस 1:14-15

14तोउं यीशु शुची आत्माई ताकत जुए भरी कइ गलील राज्य जे वापस एई गा त तसे बोके अपु नीड़े भेएड़े इलाके अन्तर पुजी। 15से तेन्के अराधनालय#4:15 अराधनालय जेठि यहूदी मेह्‍णु बिश कइ बोक विचार कतेथ त परमेश्वरे वचन शुणतेथ। अन्तर घेई कइ शिचालताथ त सोब तस जे खरु बोतेथ।

यीशु पुठ नासरत ग्रां मेह्‍णु विश्वास ना करण

मत्ती 13:54-58

16पता यीशु नासरत ग्रां जे आ, जेठि से जीओ धरो थिआ, त अपु रिवाज हेसाब जोई, भक्ति करणे#4:16 भक्ति करणे रोज यहूदी के यक शुचा रोज असा। हफ्ते सतूं रोज जे भक्ति करणे रोज बोते। शुरुवात 2:2-3 इस रोज मेह्‍णु कोई बि कम ना कते बरन अराम कते। पर फरीसी त धर्मशास्त्री इस जुए होरे सुआ नियम बणाई कइ सुआ कमी पुठ रोक लओ थी, जे मेह्‍णु मानणे एन्तेथ। ए शुकरे ब्यादि केआं शिण्हेचर ब्यादि तकर भुन्ता। निसुणे 20:8-11 रोज अराधनालय जे गा। तठि तेन्के बोलुण पुठ धरमे कताब पढ़ूं जे खड़ भुआ। 17तसे धे यशायाह भविष्य वक्ते कताब#4:17 तेन्हि दिनि, कागजी के कताब ना भुन्तीथ। त मेह्‍णु जानवरी के शुकी छोड़ी पुठ लिखतेथ त तस लपेटी कइ शुकी जगाई रखतेथ। दिती। त तेनि तस खोल कइ ईं पढ़ु जेठि लिखो असु:

18“प्रभु परमेश्वरे आत्मा में अन्तर असी।

किस कि तेन अउं गरीब मेह्‍णु खुश खबरी शुणाण जे नियुक्त किओ असा।

त अउं इस लिए लंघो असा कि जे कोउं शंकीड़ी बेलिए बन्हिए असे, तेन्हि खोलणे,

त जे अन्हे असे तेन्हि सारेरणे खुश खबरी प्रचार करुं

त जे मेह्‍णु के भुंजो असे तेन्हि सुख दिउं,

19त परमेश्वर मेह्‍णु बचाणे घड़ी बारे प्रचार करुं।”

20तोउं तेनि धरमे कताब बन्न कर कइ, जे सेवक थिआ तसे धे दिती त भीं बिशा। त जे मेह्‍णु अराधनालय अन्तर थिए से सोब तसे धे हेरण लगो थिए। 21त तेन तेन्हि जे बोलु, “आज जे बि मेईं तुसी जे पढ़ु, से तुं सामणे सच्चु भु।”

22सम्हाई मेह्‍णु तस जे खरु बोलु त तेन जे बोक बोलो थी से शुण कइ से सोब हैरान भुए त बोलु लगे, “ए कि यूसुफे कुआ ना भो ना?” 23त यीशु तेन्हि जे बोलु, “तुस जरूर मोउं पुठ ए ऊजवाण बोते कि ‘ए वैदा, पेहले अपफ ठीक भो! जे सोब चमत्कार कफरनहुम शेहर अन्तर करण असी शुणो असे, तेन्हि इठि अपु ग्रां अन्तर बि कर।’” 24त तेन हउ बि बोलु, “केसे बि भविष्य वक्ते अपु देश अन्तर इज्जत ना मेती।#यूहन्ना 4:44#4:24 यीशु बोलुणे मतलब इ असु कि “गीहे कुकुड़, दाड़ बराबर भुन्ति”। 25पर सच्चाई त अउं तुसी जे बतान्ता कि एलिय्याह भविष्य वक्ते टेम, जपल सढ़े टाई साल तकर मेघे ना लगी, त पूरे देश अन्तर अकाल थिआ। तेन्हि रोजी इस्राएल अन्तर सुआ विधवा थी। 26पर एलिय्याह भविष्य वक्ता तेन्हि बुच केसेरी गी ना लंघा। सद सैदा राज्ये सारफत ग्रांए विधवा केईं लंघा। 27त एलीशे भविष्य वक्ते टेम बि इस्राएल अन्तर सुआ कोढ़ी थिए, पर सीरियाई मेह्‍णु नामान#2 राजा 5:1-14 छड़ कइ होर कोई शुचा नेओथ किओ।”

28इ बोक शुण कइ तेस अराधनालय अन्तर जतु मेह्‍णु थिए सोब लेहरी कइ लाल भोई गे, 29त तेन्हि सोबी खड़ भुई कइ से फाटे जिन्‍घाल जे नीआ, जेस फाट पुठ तेन्के ग्रां बसो थिउ, ताकि तस तठिआ बुन्ह फटाल। 30पर से तेन्हि केआं छुड़क कइ तठिआ नश गा।

यीशु दुष्ट आत्माई भुंजो यक मेह्‍णु ठीक करण

31तोउं से गलील राज्ये, कफरनहुम शेहर गा त हर भक्ति करणे रोज मेह्‍णु शिचालताथ। 32से सम्हाई तसे शिक्षा शुण कइ हैरान भोई घेन्तेथ, किस कि से पूरे हक जुए शिक्षा देन्ताथ।#मत्ती 7:28,29

33यक लिंगि, तेस अराधनालय अन्तर दुष्ट आत्माई बेलि भुंजो यक मेह्‍णु थिआ। तेन जोरी जुए बोलु, 34“ए नासरत ग्रांए यीशु, तु असी बुच किस अओ असा? कि तु असी खतम करण जे अओ असा ना? अस सोब तोउ जाणता कि तु कोउं भो। तु परमेश्वरे शुचा मेह्‍णु भो।” 35यीशु तस दुष्ट आत्मा डराई कइ बोलु, “चुप बिश त एसे अन्तरा नश गा!” तपल दुष्ट आत्माई से बुच फटा, त बगैर कोई कष्ट दी कइ तसे अन्तरा नश गई। 36ईं हेर कइ सोब हैरान भोई गे त से अपफ बुच बोलुण लगे, “ई की बोक असी? किस कि से ताकत त शक्ति जुए दुष्ट आत्मा जे निआंग देन्ता त से नश घेन्ति।” 37ई भोई कइ चोहरो कना तसे बारे बोक भुण लगी।

शमौन पतरसे शशु ठीक करीण

मत्ती 8:14-17; मरकुस 1:29-34

38पता यीशु अराधनालय केआं खड़ भोई कइ शमौने गी गा। शमौने शशु सुआ सेक चढ़ो थिआ त तेन्हि तस ठीक करण जे यीशु जे हथ जोड़े। 39त यीशु तसे भेएड़ खड़ भोई सेक डरा त सेक झट मुक गा। त से तिखेईं खड़ भोई कइ तेन्के सेवा पाणि करण लगी।

40त दिस ओलुणे टेम जेसे जेसे गी बीमार मेह्‍णु थिए, से यीशु भेएड़ अण्हे त तेन तेन्हि सोबी पुठ हतेउ रख कइ से सुसुरेरि छड़े। 41होर त होर, यीशु सुआ जेईं केआं दुष्ट आत्मा नशाणि। से लियार दी दी त ईं बोते बोते कि “तु परमेश्वरे कुआ भो” सुआ मेह्‍णु अन्तरा नश गई। पर से तेन्हि डरान्ताथ त बोलुण ना देन्ताथ, किस कि तेन्हि तसे बारे पता थिआ कि से मसीह भो।

42त पथवारी ईं यीशु खड़ भोई कइ यक रुण घेई गा। सुआ मेह्‍णु तस तोपते तोपते तस केईं पुजे त तस रोकुण लगे कि असी छड़ दी कइ ना गा। 43पर तेन तेन्हि जे बोलु, “मोउं होर ग्रां बि घेई कइ परमेश्वरे राज्य एणे बारे खुश खबरी शुणाण असी, किस कि तोउं त परमेश्वरे अउं लंघो असा।” 44त से तठिआ घेई कइ पूरे यहूदिया राज्ये अराधनालय अन्तर शिचालते रिहा।

Currently Selected:

लूका 4: pgg

Highlight

Copy