लूका 5

पेहले चेले भिआण

मत्ती 4:18-22; मरकुस 1:16-20

1यक रोज, यीशु गन्नेसरत तथे#5:1 गन्नेसरत तथ जे गलीले तथ बि बोते। कफरनहुम शेहरे दखण दिशा अन्तर गन्नेसरत इलाका थिआ (मत्ती 14:34; मरकुस 6:53)। शयद एस बझई जोई एसे नउ गन्नेसरत तथ बि थिउ। औत पुठ परमेश्वरे वचन शिचालण लगो थिआ, त तस शुणुण जे सुआ हुसुड़ा तसे बियेर बइ कठा भोई गे।#मत्ती 13:1,2; मरकुस 3:9,10; 4:1 2तेन हेरु कि दुई नाव तथे औत खड़ खड़ असे त मछवारे तेनि पुठा भीं एई कइ अपु जाल धूण लगो असे। 3त तेन तेन्हि नाव बुचा यक जे शमौने थी, तस पुठ चढ़ गा त तेस जे नाव औत केआं थोड़ा दूर नेण जे बोलु। त तेन नाव पुठ बिश कइ तेन्हि मेह्‍णु जे शिक्षा दिती। 4जपल से बोक कइ बिठा त शमौन जे नाव तथे डुघो पाणि बुच नेण जे त अपु जाल फटाण जे बोलु ताकि मछली टाइ बटियेल! 5शमौने तस जे बोलु, “गुरुजी, असी पूरी रात मेहनत की तोउं बि कुछ ना टाइ बटु। फि बि अउं तुं बोलुण पुठ जाल छता।”#यूहन्ना 21:3 6जपल तेन्हि जाल छड़े त सुआ मछली जाल अन्तर फसी, त तेन्के जाल टुटुण लगा। 7ई हेर कइ तेन्हि अपु साथी जे, जे कि होर नाव पुठ थिए तेन्हि जे हथे बइ भाश की “एई कइ हें मदत करे”। त तेन्हि एई कइ दुई नाव ईं भरी कि से डूबणे भोई गई।

8ई हेर कइ शमौन पतरस यीशु खुरी पुठ बिठा त बोलु, “ए प्रभु, अउं यक पापी भो। में भेएड़ केआं ओ गा।” 9तेन ईं तोउं त बोलु, किस कि एती मछली टाणे बेलिए से त तसे साथी हैरान भोई गो थिए। 10त इरुह ईं जबदी कुआ याकूब त यूहन्ना, जे शमौन पतरसे साथी थिए हैरान भोई गे। तपल यीशु शमौन जे बोलु, “ना डर, अब तु परमेश्वर जे मेह्‍णु कठा कता।#5:10 मूल भाषा अन्तर “तु अब मेह्‍णु टान्‍ता।”” 11त जपल तेन्हि नाव औत पुठ अण्हती त सोब कुछ छड़ दी कइ यीशु पता पता गे।

यीशु यक कोढ़ी ठीक करण

मत्ती 8:1-4; मरकुस 1:40-45

12यक फेरि जपल यीशु केसे यक ग्रां अन्तर थिआ, तठि यक कोढ़ी मेह्‍णु#5:12 कोढ़ बीमार लगो मेह्‍णु जे कोढ़ी बोते। यहूदी मेह्‍णु कोढ़ी जे ना छुन्‍तेथ। त ए मेह्‍णु ग्रां केआं बाहर बिशतेथ। आ। यीशु हेर कइ से उटेऊ झड़ा त छनेअरे कते बोलु, “ए प्रभु, अगर तु चहाल त मोउं शुचा कइ सकता।” 13त यीशु अपु हथे बइ से छुआ त बोलु, “अउं बि ई चहन्ता कि तु शुचा भो” त तिखेईंए तसे कोढ़ मुक गा। 14तोउं, तेन तस जे निआंग दी कइ बोलु, “एसे बारे केसे जे बि ना बोलुण, पर घेई कइ अपु अपफ पुजारी हराल त शुचा भुण जे, जे भकत चढ़ाण जे मूसा बोलो असु तीं सोब कर, ताकि तस हेर कइ मेह्‍णु पता लगियाल कि तु शुचा भोई गो असा।”#पुजारोठि 14:2-32

15यीशु ठाकणे बावजूद बि तसे ताकती बारे चर्चा पेहले केईआं बि ज्यादी फैलती गई। त मेह्‍णु के सुआ हुसुड़ा तसे बोक शुणुण जे त अपु अपु बीमारी ठीक कराण जे तस केईं एण लगे। 16पर से हुसुड़ा छड़ दी कइ, अकेला अरुणि धार अन्तर घेन्ताथ त प्रार्थना कता रेहन्ताथ।#लूका 4:42-43

अदरंग मेह्‍णु ठीक करण

मत्ती 9:2-8; मरकुस 2:1-12

17यक रोज भु ईं कि यीशु परमेश्वरे वचन शिचालण लगो थिआ त तेस जुए बीमारी ठीक करणे परमेश्वरे शक्ति बि थी। होर गलील त यहूदिया राज्ये सुआ ग्राईं केआं त यरुशलेम शेहर केआं अओ फरीसी#5:17 फरीसी यक यहूदी मेह्‍णु के दल थिआ, जे बोतेथ कि मेह्‍णु ना सद मूसे दुतो नियम माने, बल्कि होरे सुआ नियम बि माने जे तेन्हि बड़ो थिए। मरकुस 7:6-8 त धर्मशास्त्री बि तठि थिए। 18तपल केहि मेह्‍णु डानी पुठ कर कइ यक मेह्‍णु अण्हतो थिए, जेस कि अदरंग थिआ। से तेस अन्तर जे घिन कइ यीशु सम्हाणि रखणे कोशिश अन्तर थिए। 19पर मेह्‍णु के हुसुड़े बझई जुओई जपल से यीशु भेएड़ ना पूज बटे त लहाड़ चढ़ कइ लहाड़ पुटे। तोउं तेन्हि से बीमार मेह्‍णु डानी समेत यीशु साम्हाणि रखा। 20यीशु तेन्के विश्वास हेर कइ तेस जे बोलु, “दोस्ता! तें पाप माफ भोई गे।”

21तपल धर्मशास्त्री त फरीसी अपफ बुच बोकी लगे “ए कोउं भो, जे परमेश्वरे बेज्जती करण लगो असा? परमेश्वर छड़ दी कइ कि कोउं पापे माफी दी सकता ना?” 22यीशु तेन्के मने बोक समझ कइ तेन्हि जे बोलु, “तुस इसे बारे अपु मन अन्तर ईं किस सोचुण लगो असे? 23करणे सुख्तु की असु, बोले: पाप माफ करणे, या ईं बोलुण कि ‘खड़ भो त हंटिण दे’? 24पर अउं तुसी ई हरालता कि मोउं, मनखे कुआ#5:24 मनखे कुआ जे परमेश्वर लंघो असा। यीशु अपफ जे ज्यादातर “मनखे कुआ” बोलताथ। यहूदी मेह्‍णु तस जे “मसीह” बोते। धरती पुठ पाप माफ करणे हक असा”। त तेन तेस अदरंग मेह्‍णु जे बोलु, “अउं तोउ जे बोता, खड़ भो त अपु डानी घिन कइ अपु गी जे गा।” 25से तपले तेन्के साम्हाणि खड़िया त जेस पुठ से अण्हतो थिआ तस टाइ कइ त परमेश्वरे गुणगान कते-कुते अपु गी जे गा। 26ईं हेर कइ सोब हैरान भोई गे त परमेश्वरे गुणगान करण लगे। से सुआ डर कइ ईं बोलुण लगे कि “आज असी यक अनोखी बोक हेरी!”

यीशु लेवी भिआण

मत्ती 9:9-13; मरकुस 2:13-17

27तढ़ेया पता शेहर केआं घेन्त पेंत यीशु लेवी#5:27 “लेवी” जे “मत्ती” बि बोते। लूका 6:15 नओएं यक मामला नेणे बाड़ा अपु दफतर बिशो का त तस जे बोलु, “में पता आई!” 28तिखेईंए से सोब कुछ छड़ दी कइ तस जुए घेई गा।

29त लेवी तस अपु गी यक बोडी धाम दिती। त मामला नेणे बाड़े त होरे सुआ मेह्‍णु बि यीशु जुए धाम खाण बिशो थिए। 30ईं हेर कइ फरीसी त धर्मशास्त्री यीशु चेली जे चरचर कर कइ बोलु, “तुस किस मामला नेणे बाड़े त पापी मेह्‍णु जुएई बिश कइ खाण पीण लगो असे?” 31यीशु तेन्हि जे बोलु, “वैद खरे त चंगे मेह्‍णु जे नेईं, बल्कि जे बीमार असे, तेन्हि जे असे। 32अउं जे अपु अपफ धर्मी समझते तेन्हि ना, बल्कि पापी मेह्‍णु मन बदलीणे बारे बोलुण जे अओ असा।”

ब्रत बारे सवाल

मत्ती 9:14-17; मरकुस 2:18-22

33पता कुछ मेह्‍णु यीशु जे बोलु, “यूहन्ने त फरीसी के चेले त घड़ी घड़ी ब्रत कते, होर प्रार्थना बि कते, पर तुं चेले त बस खांते पीन्ते रेहन्ते।” 34यीशु तेन्हि जे बोलु, “जपल तकर नोउआं लाड़ा म्हाराई जोई असा, तुस तेन्हि जे ई बोल सकते ना कि तुस ब्रत रखे? 35पर से रोज बि एन्ता जिएस कि नोउआं लाड़ा तेन्हि केआं केहरी छते त तिएस से बि ब्रत कते।”

36तोउं यीशु तेन्हि जे ई बोक लाई “कोई बि मेह्‍णु नोउए झिणे चीर कइ पुराणि झिणे पुठ टलि ना छता। ना त नोउए चीरी घेन्ते त पुराणे झिणि पुठ से टलि मेल बि ना खांती। 37होर कोई बि मेह्‍णु नोउआं सरा पुराणे खलोठु अन्तर ना छता, ना त नोउआं सरा पुराणे खलोठु चीर कइ बाहर निस घेन्ता त खलोठु बि खराब भोई घेन्तु। 38पर नउआं सरा नोउए खलोठु अन्तर रखो लौता। 39कोई बि मेह्‍णु पुराणा सरा पी कइ नोउआं ना मगता, किस कि से बोता ‘पुराणा अब्बल असा।’”

Currently Selected:

लूका 5: pgg

Highlight

Copy