लूका 2

यीशु जमुण

मत्ती 1:18-25

1तेन्हि दिनि रोमी सम्राट अगुस्तुस कैसर#2:1 रोम देशे सम्राट जे “कैसर” बोतेथ। तपल रोमी सम्राट, पूरी युरोप महाद्वीप त अफ्रिका त पश्चिम एशिया पुठ राज कताथ। अपु सम्राज्ये सोबी मेह्‍णु के जनगणना करणे निआंग दिती। 2ए सीरिया देशे#2:2 “सीरिया” रोम सम्राज्ये तेस देशे नओं असु, जेस अन्तर गलील त यहूदिया राज्य थिए। राज्यपाल क्विरिनियुस अपु राज अन्तर पेहली बार जनगणना करो थी। 3त सोब मेह्‍णु अपु अपु नओं चढ़ाण जे अपु अपु पुरखी के ग्रां घेण लगे।

4त किस कि यूसुफ दाऊद राजे ऊड़ी थिआ त से बि गलील राज्ये नासरत ग्रां केआं यहूदिया राज्ये राजा दाऊदे ग्रां बैतलहम जे गा, 5ताकि अपु जुएली मरियम जोई साते, जे कि गभुरवाल थी नओं लिखुं। 6तेन्के तठि बिशोरे मरियमे सूणे टेम भोई गा। 7तेन अपु जेठे कुआ जमाणा। त से गुहापड़ी अन्तर लपेट कइ कुठली अन्तर रखा, किस कि तेन्हि केसे बि सराई अन्तर बिशुण जे जगाह नेओथ मेओ।

पुहाली यीशु मीण जे घेण

8त तेस इलाके अन्तर कत पुहाल थिए जे की रात धार अन्तर बिश कइ अपु ढडुड़ु के पेहरा देन्तेथ।#2:8 यहूदिया राज्य यक रेगिस्थानी इलाका असा त से अपु गुओरु जे घास तोपते तोपते घुमतेथ। दिसाई पुहाल अपु जानवर बाहर पधरी चरान्तेथ त ब्यादि तेन्के पेहरा देण जे तेन्हि जुए साते बिशतेथ। 9त अजगता प्रभु यक स्वर्गेदूत तेन्के सामणि निसा। होर प्रभु लौई बइ चोहरो कना एतु टगड़ु भु कि से सुआ डर गे। 10त स्वर्गेदूते तेन्हि जे हिम्मत दी कइ बोलु, “डरे नउ, किस कि अउं तुसी यक बोडी खुश खबरी शुणान्ता, जेस शुण कइ सम्हाई मेह्‍णु खुश भोई घेन्ते: 11आज दाऊद राजे ग्रां, बैतलहम अन्तर तुं लिए यक बचाणे बाड़ा जमो असा त सेईंए मसीह प्रभु भो। 12तुसी इस बारे तोउं पता लगता कि तुसी यक मठुड़ कुआ गुहापड़ी अन्तर लपेटो कुठली अन्तर छोओ मेता।”

13तपल अजगता, तेस स्वर्गेदूत जुए होरे स्वर्गेदूती के यक सुआ बोडा हुसुड़ा तेन्के समाणि निसा, जे परमेश्वरे गुणगान कर कइ ई बोलुण लगो थिए:

14“खड़िया अम्बर पुठ परमेश्वरे गुणगान लौतु भुओ,

होर धरती पुठ जेन्हि हेर से खुश असा, तेन्हि शान्ति लौती मेओ।”

15जपल स्वर्गेदूत पुहाली केईआं स्वर्ग जे घेई गे, त तेन्हि पुहाली अपफ बुच बोक विचार की कि “चले, बैतलहम ग्रां घेई कइ तेन्हि सोब बोकी के पता कते, जेसे बारे प्रभु असी बताओ असु।”

16त से तिखेईंए घेई गे त तेन्हि मरियम, यूसुफ त से मठुड़ कुआ काआ, जे कुठली अन्तर रखो थिआ। 17तस हेरण केआं पता, तेस कोईये बारे जे जे बोक स्वर्गेदूत तेन्हि पुहाली जे बोलो थी, तेन्हि से सोबी जे बोलुण लगे। 18त सोब शुणणे बाड़े तेन्के बोक शुण कइ हैरान भोई घेन्तेथ। 19पर मरियम ई सोब बोक अपु मन अन्तर रख कइ सोचती रेही। 20त से पुहाल परमेश्वरे गुणगान त धन्यवाद कते-कुते वापस घेई गे, किस कि तेन्हि बिलकुल तिहांणि शुणो त काओ थिउ, जी स्वर्गेदूत तेन्हि जे बोलो थिउ।

यीशु नओं रखुंण त यरुशलेमे देहेर जे नेण

21अठूं रोजे जपल तेस कोईये खतना भुआ त तसे ईये बोउए तस कुआ नउ “यीशु” रखु, जीं स्वर्गेदूत तेन्हि पेहलाई सुझौ थिउ।

22जपल मूसे लिखो नियम हेसाब जोई से शुचे भुणे रोज पूरे भुए#पुजारोठि 12:6-8 त से कुआ यरुशलेमे देहेर अन्तर प्रभु सामणि पेश करण जे अण्हता। 23प्रभु नियम अन्तर बि ईं लिखो असु कि “हर जेठा कुआ प्रभु जे शुचा असा त प्रभु जे दीण असा।”#निसुणे 13:2,12,15 24त प्रभु नियम जीं जेठा कुआ बचाण जे “यक जोड़ा अलण या फि यक जोड़ा चखुरु बच्ची” के भकत देणे बोता,#पुजारोठि 12:8 तीं तेन्हि बि भकत दिती।

शमियोने घीत

25यरुशलेम शेहर अन्तर शमियोन नओएं यक मेह्‍णु थिआ, जे धर्मी त परमेश्वरे भक्त थिआ। शुची आत्मा तस अन्तर थी त से ई भाड़ बिशो थिआ कि परमेश्वर कपल इस्राएली मेह्‍णु सुख शान्ति देन्ता। 26शुची आत्माई तस जे बोलो थिउ कि जपल तकर से मसीह ना केआल तपल तकर तस मौत ना एन्ती। 27जपल मरियम त यूसुफ देहेर अन्तर यीशु घिन आए ताकि विधि विधान जुए तसे पुजापाठ करे, तिखेईं शुची आत्माई बोलुण पुठ शमियोन देहेर आ। 28त शमियोने यीशु अपु कल्हाई नी कइ परमेश्वरे धन्यवाद दी कइ ई बोलु:

29“ए मालिका, अभेईं तेईं अपु बोक हिसाब जुएई अपु भक्त शान्ति जुए मरण दिए।

30किस कि मेईं अपु टीरे बेलि तुं बचाणे बाड़ा हेरो असा।

31जे कि तेईं सम्हाई जाति मेह्‍णु जे बणो असा।

32से यक टगड़ियारी ईं होर जाति मेह्‍णु परमेश्वर हरालता,

त तें प्रजा इस्राएली के शान बणता।”#यशायाह 49:6

33जे बि बोके शमियोने तेस कोईये बारे बोलु तेन्हि शुणी कइ तसे ई त बोउ हैरान भोई गे। 34तपल शमियोने तेन्हि अशुश दी कइ तसे ईया मरियम जे बोलु, “हेर, परमेश्वरे ए कुआ इस्राएली सुआ कमजोर मेह्‍णु सुसुर खड़ करण जे त सुआ घमण्डी मेह्‍णु के कियाड़ी उन्न लाण जे ठीक किओ असा। ए यक निशाण ईं भुन्ता कि मेह्‍णु तेसे बारे बुरु बोते। 35इस कोईये कम त बोकी के बेलिए मेह्‍णु परमेश्वरे बारे की सोचते, तस पता लगता। हाँ, मेह्‍णु तसे धे जे कष्ट देन्ते तस हेर कइ तोउ बि ईं कष्ट भुन्ता, जीं तलवार दिले आर पार भुण असी।”

हन्ने उगाही

36अशेर#2:36 इस्राएले बाराह ऊड़ी बुच यक नओं अशेर असु। ए याकूबे अठूं कुआ थिआ, जेसे ई जिल्पा थी। शुरुवात 30:12,13 ऊड़ी अन्तर फनूएले कुई हन्नाह नओएं यक भविष्य वक्तिणी थी। ब्याह केईआं पता सद सात साल से अपु धाणि जुए बिशो थी, तोउं से विधवा भोई गई। 37से चौरासी साले बुढी थी, त देहेर छड़ कइ कोठि न घेन्तीथ। बल्कि से दन भइ ब्रत त प्रार्थना कर कइ परमेश्वरे पूजा अराधना कती रेहन्तीथ। 38त से तपल तठि एई कइ परमेश्वरे धन्यवाद देण लगी त जत बि मेह्‍णु इस्राएली#2:38 मूल भाषा अन्तर इठि “यरुशलेम” लिखो असु। के बचणे भाड़ बिशो थिए, तेन्हि जे तेस कोईये बारे बोलुण लगी।

39जपल मरियम त यूसुफ प्रभु नियमे हिसाब जोई सोब पुजापाठ की त गलील राज्य अपु गी नासरत ग्रां जे वापिस घेई गे।#मत्ती 2:23 40त जीं दन बीतते गे तीं तीं से कुआ मोटीण लगा त तसे अक्ल बि तेज भुन्ति गई। त परमेश्वरे कृपादृष्टि तस पुठ थी।

धरमे पण्डित जोई मठुड़ कुआ यीशु

41प्रभु यीशु ई बोउ हर साल बचणे त्योहार#2:41 बचणे त्योहार यक धार्मिक त्योहार असा, जेस यहूदी मेह्‍णु, परमेश्वर तेन्हि मिस्र देशे गुलामी केआं छुड़काणे याद अन्तर हर साल मनान्ते। त इस्राएले पूरी प्रजा यक जगाह, यरुशलेम शेहर अन्तर किठि भुन्ति। ए त्योहार सत रोज तकर चलता। (निसुणे 12, विधि 16:5-8) मनाण जे यरुशलेम शेहर घेन्तेथ। 42जपल प्रभु यीशु बाराह साले भुआ त से रीति हिसाब जोई त्योहार मनाण जे यरुशलेम शेहर गा। 43जिखेईं त्योहार खतम भुआ त तसे ई बोउ अपु गी जे वापस एण लगे। पर तसे ईया बोउ पता न थिआ कि यीशु यरुशलेम शेहर रेही गा। 44से ई सोच कइ कि यीशु होर जातुरु जुए भोल, से यक रोज बथ हंट गे। त पता से अपु रिश्तेदारे त अपु भेयाड़ अन्तर तस तोपुण लगे। 45जपल से ना मेआ त तोपते तोपते दुबारी यरुशलेम शेहर वापिस ए। 46त तस तोपते तोपते टाई रोज पता यीशु देहेर अन्तर धर्मशास्त्री जुए बिशो, तेन्के शुणते त सवाल पुछते तेन्हि मेआ। 47त सोबी धर्मशास्त्री त जतर मेह्‍णु तसे बोक शुणी, से सोब तसे अक्ल त जवाबे बेलि हैरान भोई गो थिए। 48तसे ई बोउ बि तस देहेर अन्तर हेर कइ भे घेई गई त तसे ईये बोलु, “कोईया! तेईं असी जोई ईं किस किउ? हेर तें बोउ त अउं कतु परेशान भोई कइ तोउ तोपुण लगो थिए?”

49तेन तेन्हि जे बोलु, “तुस मोउं किस तोपुण लगो थिए? तुसी पता नेओथ ना कि मोउं अपु बोउए गी बिशुण जरूरी असु?” 50पर जे बोके तेन तेन्हि जे बोली, से तेन्हि समझ ना एई।

51तोउं से तेन्हि जुए गा, अपु गी नासरत ग्रां जे आ, त तेन्के सम्हाई बोक मनी कइ रेहा। त तसे ईये ई सोब बोके अपु मन अन्तर रखी।#लूका 2:19

52प्रभु यीशु बुद्धि त शक्ति जुए होर परमेश्वरे त मेह्‍णु के ट्यारा बण कइ बोडीण लगा।

Currently Selected:

लूका 2: pgg

Highlight

Copy