युहान्ना 14
14
येसुऎ टिङ्खुबाचि निवाँ आटुगानॆ लोमिम्पा
1येसुऎ खोम् टिङ्खुबाचि लोसुचि, “आन्नामि निवाँ ऎटुक्ल। आन्नॆ निवाँहाङ् नुङ् काङा सक्पि निवाँयुङ् लॆटानॆ। 2हाङ् काम् आपामि खिम्पि डिरिक् पेन्ठाम ठाल चु। मरहॆॽनॆ हाङ्ग माल् कॆ आन्ना, आन्नामि लागि ठाल मुसि खॆॽमॆ पाइङा कामानुङ् लोकानिहॆ टा? 3हाङ् काङा खॆःॽङाहाङ् आन्नामि लागि ठावाँ मुसिकुङ् हाङ् होइखेपा सङ्क आन्ना चिःक्सि ऎन्टाङा। हाङ् काङा चुःॽङॆ ठालबि आन्ना स लाखॆकानि मरहाङ् आन्ना कानुङ्न लिकानि। 4हाङ् काङा हाम्पि खॆॽमॆ पाइङॆ लोमॆ खानावाँ ग आन्नॆ लेकाम्निन।”
5हाङ् ठोमाऎ येसु लोसु, “पारभु, आना हाम्पि खॆॽमॆ पाइनॆ कामानुङ् काङ्कॆ लेसुङ्कानि। हाङ् मान्टक्ल काङ्कॆ लाम्फु लेॽमॆ?”
6हाङ् येसुऎ लोसु, “काङान एक्क टे लाम्फु, चाइबानऎ हाङ् हिङ्खामाङा यो। काङा मॆड्डिङ् आसास निवाँहाङ् आपाबि टामा हेसुचिनि। 7मान्ठाभनॆ आन्नॆ काङा चाइबान लेसिङ्नि ग, काम् आपा स लेखुबा लॆटाम्नि। हःबाङ् मरक् आन्नॆ खो लेकाम्नि हाङ् आन्नॆ खो खाङ्डाम्नि।”
8हाङ् फिलिपऎ येसु लोसु, “पारभु, काङ्का आपा खाङ्मिचिमॆ। आक्रहाङ् काङ्का साप्खेकिङ्का।”
9हाङ् येसुऎ खो लोसु, “फिलिप, गरकॆ डिनाढारि काङा आन्नानुङ्न चुःॽङा, हाङ्स आनॆ काङा लेॽङानानॆ? आसॆ चाइ काङा खाङ्डिङ् आक्कसॆ निवाँहाङ् आपा सङ्क खाङ्डु। हाङ् मान्टक्ल आनॆ ‘काङ्का आपा खाङ्मिचिमॆ’ कामानुङ् काग्नॆ? 10माल् काङा आपाबि चुःङा हाङ् निवाँहाङ् आपा कानुङ् चु लोमॆ खानावाँबि निवाँयुङ् लॆःॽनानॆ? काङॆ आन्ना लोमिम्पा खानावाँ कॆ काम् निवाँबाङ् यामुमिम्पा हॆॽनॆ, टर का हङ्सि चुऎ काम् आपॆ खोम् योम्पक् यिक्मिम्पा रेटा। 11हाङ् काङा आपाबि चुःॽङा हाङ् निवाँहाङ् आपा चाइ काङाबि चु लोमॆ खानावाँबि काङा निवाँयुङ् लॆःॽङानॆ। हॆॽनॆ हाङ्स काङॆ यिक्मिम्पा योम्पक् खाङानॆ हाङ् निवाँयुङ् लॆटानॆ।
12“चाइबान कॆ आन्ना लोकानि, आसॆ चाइ काङा सक्पि निवाँयुङ् लॆकु, आक्कसॆ काङॆ यिक्मिम्पा योम्पक् यिगुकु। आक्कसॆ आक्कबाङ्स ढ्या योम्पक् यिगुकु मान्ठाभनॆ काङा निवाँहाङ् आपाबि खॆॽमॆ पाइङा। 13हाङ् आन्नॆ काम् निङ्पि माङ् ङागुकानि हाङ्स, पासाबाङ् निवाँहाङ् आपामि निङ्लावा लिर कामानुङ् कॆ आक्क लॆकुङ। 14हाङ् आन्नॆ काम् निङ्पि माङ् ङागुकानि, म कॆ पिख्खानि।
येसुऎ सॆङ्सॆङॆ लावामि खानावाँ इमिम्पा
15“आन्नॆ काङा नाम्नाम् पिस्सिङाॽनि हाङ्ग काङॆ लोमिम्पा खानावाँ खेम्कानि। 16हाङ् काङॆ आपानुङ् ङाग्पिकानि हाङ् खोसॆ आन्ना पाइबाक्माम् लागि होइक मुबाक्खुबा पाहाङ्पिकानि। हाङ् खो चाइ आन्नानुङ् हानाम्स लिढाङ। 17आक्क चाइ चोब्न याॽमिचि चाइबानऎ लाम्फुबि लाम्ढुमिक्खुबा सॆङसॆङॆ लावा यो। खो बाखाटेम्पिहा याॽमिचिऎ खोम् खानावाँ खेमुचिनि मान्ठाभनॆ आक्क खोचिऎ खासुखाङ्टकुचिनि हाङ् लेसुलेसुचिनि। टर आन्नॆ चाइ खो लेकाम्नि मान्ठाभनॆ खो आन्नानुङ् पेनुक्। 18काङॆ आन्ना टाङ्पा टे याइडाआनिनि। काङा आन्नाबि टाङा। 19ह ऎच्छ डॆङ्पि बाखाटेम्पिहा याॽमिचिऎ काङा हानाम्स खाङ्टॽङामिनि, टर आन्नॆ चाइ खाङ्टङानि। मान्ठाभनॆ काङा हिङ्पकिङ् हाङ् आन्ना स हिङ्पकानिहाछ। 20हाङ् काङा हिङ्पङॆ डिना काङा निवाँहाङ् आपाबि चुःॽङा हाङ् आन्ना काबि चुकानि हाङ् काङा चाइ आन्नाबि चुःॽङा लोमॆ खानावाँ वाप्टकाम्नि। 21हाङ् आसॆ चाइ काम् खानावाँ खेमुकुहाङ् म रक्न पाइ, आक्कसॆ चाइ काङा नाम्नाम् पिस्सिःॽङा। हाङ् आसॆ चाइ काङा नाम्नाम् पिसिःॽङा खो काम् आपॆ नाम्नाम् पिसिकु हाङ् आक्क कॆस नाम्नाम् पिसिकुङ् हाङ् आक्कनुङ् काङा खाङ्मुःॽङा।”
22हाङ् याहुडाऎ (खो याहुडा इस्कारियाट चाइ हॆॽनॆ) लोसु, “पारभु, मान्ठा आना बाखाटेम्पिहा याॽमिचि नुङ् हॆॽनॆ, टर काङ्कानुङ् टे खाङ्मुनॆ?”
23येसुऎ लोसु, “आसॆ चाइ काङा नाम्नाम् पिस्सिङा, आक्कसॆ काम् खानावाँ खेमुकु हाङ् काम आपॆ खो नाम्नाम् पिस्सिकु हाङ् काङ्का खोबि टाकिङ्काहाङ् आक्कनुङ् पेनुकिङ्का। 24हाङ् काङा नाम्नाम् ऎपिस्सिखुबॆ कॆ लोमिम्पा खानावाँ खेमुनि। हाङ् काङॆ आन्नॆ माङ् लोमॆ पाइकानि, म खानावाँ काम् हॆॽनॆ, टर काङा पाङ्हाङ्खुबा निवाँहाङ् आपाबाङ् टाडॆ खानावाँ यो।
25“इघा चोब्न खानावाँ काङा आन्नानुङ् चुःक्ङा रक्न लोडानि। 26टर काम् आपॆ आन्ना पाइबाक्माम् लागि सॆङ्सॆङॆ लावा पाङ्हाङ्कु। खोसॆॽन आन्ना चोब्न खानावाँ चिनुकानि। हाङ् कॆ आन्ना लोमिम्पा चोब्न खानावाँ मिॽलामिकानि।
27“काङा आन्नामि निवाँबि सान्टि वेड्डाकुङ। हाङ् कॆ पिॽमिम्पा सान्टि बाखाटेम्पिहा याॽमिचिऎ आन्ना पिॽहिसानिनि। मसॆ निवाँबि आचाइखॆटानॆ हाङ् आकिसिआनॆ। 28हाङ् ‘काङा खॆॽमॆ पाइङा हाङ् ऎन्टाङा’ लोमॆ खानावाँ ग आन्नॆ खेम्इडाम्नि। आन्नॆ काङा चाइबान नाम्नाम् पिसिम्पा हाङ्ग, काङा निवाँहाङ् आपाबि खॆॽमार आन्ना चेन्चाखुबा लॆटानि, मान्ठाभनॆ काङा बाङ्स टुङ्घङ्पा चाइ आपा यो। 29हाङ् इघा खानावाँ लिःमार आन्नॆ निवाँयुङ् लॆहिसाम्नॆ कामानुङ् आक्खा खानावाँ लिमाबाङ् याॽलन कॆ आन्ना लोसिडानि। 30ह काम् आन्नानुङ् खानावाँ इमॆ लः सॆॽलॽन लुक्खॆॽमॆ पाइ। मान्ठाभनॆ ग खाबाटेमपिऎ टुङ्घङ्पा#१४:३० ग बाखाटेम्बिऎ टुङ्घङ्पा चाइ साइटान रेम। काङाबि टामॆ पाइ। खोबि काङा माङ्स लॆहिमॆ चॆक्मावा माआ। 31टर बाखाटेम्पिहा याॽमिचिऎ ग खानावाँ लेॽमा लॆ, कॆ निवाँहाङ् आपा नाम्नाम् पिसिकुङ् हाङ् खोसॆ माङ् लोःॽङा म योम्पक् यिगुकुङ। डाबानॆ, लु कानि गबाङ् खाइटियॆ।”
Currently Selected:
युहान्ना 14: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
