युहान्ना 15
15
येसु चाइबानऎ आङ्गुरामि बोटा
1“चाइबानऎ आङ्गुरामि बोटा चाइ काङान हाङ् काम् आपा चाइ आक्क बोटा खाङ्खुबा रेम। 2हाङ् काबि चुऎ उम्चा आसिखुबा चोब्न हाँगा खोसॆ बॽलाङ्कु हाङ् उम्चा सिखुबा चोब्न हाँगा चाइ आक्खा हाँगाऎ होइढा डिरिक् उम्चा सिसुर कामानुङ् नुःर खगुकु। 3हाङ् आन्ना आसिॽन कॆ लोमिम्पा खानावाँबाङ् खःक्सिखॆडानि हाङ् सॆङ्सॆङॆ लिखॆडानि। 4हाङ् आन्ना कानुङ् लिसानॆ हाङ् काङा आन्नानुङ् लिःॽङा। मान्टहाङ् हाँगाऎ बोटाबि मालिबा उम्चा सिहिसुनि। आक्रहाङ्न आन्ना स कानुङ् मॆलिसानि हाङ्ग उम्चा सिहिसाम्निनि।
5“आङ्गुरामि बोटा चाइ काङान हाङ् आन्ना चाइ काम् हाँगा यो। आसा चाइ कानुङ् लि, हाङ् काङा खोनुङ् लिःॽङा, आक्कसॆ डिरिक् उम्चा सिकु। मान्ठाभनॆ काबाङ् फाॽलिङ्खॆॽमानुङ् आन्नॆ माङ्स लॆहिसाम्निनि। 6हाङ् हाम्पॆ याॽमि चाइ कानुङ् लिनि, आक्क याॽमि हाँगा बगिन्ट बॽलाङ् हाङ् आक्क सोप्खॆ। आक्रहा हाँगा याॽमिचिऎ कोबुकुचि हाङ् मिःबि टिकुचि हाङ् आक्क हिॽलिङ्खॆ। 7हाङ् आन्ना कानुङ् लिसानि हाङ् काम् खानावाँ आन्नानुङ् लिसा हाङ्ग, आन्नॆ माङ् ङागुकाम्नॆ म कॆ पिकानि। 8हाङ् आन्नॆ डिरिक् उम्चा सिमानुङ् काम् टिङ्खुबाचि कामानुङ् खाङ्मिटाम्नि हाङ्ग आक्कसॆ काम् निवाँहाङ् आपामि ढ्या निङ्लावा लि।
9“मान्टहाङ् काम् आपॆ काङा नाम्नाम् पिस्सिडिङ्, मरहाङ्न कॆ आन्ना नाम्नाम् पिस्सिडानि। आन्ना काम् नाम्नाम् पिसिॽमाबि लिढाङ्सानॆ। 10हाङ् मान्टहाङ् कॆ काम् निवाँहाङ् आपाऎ लोमिम्पा खानावाँ खेम्से खोम् नाम्नाम् पिसिॽमाबि लिढाङ्ङा, मरहाङ्न आन्नॆ स काम् खानावाँ खेम्से मरहाङ्न पाइटानि हाङ्ग काम् नाम्नाम् पिसिॽमाबि लिढाङ्कानि। 11हाङ् काम् हाङ्हाङ् आन्नाबि लिर हाङ् आम्नि हाङ्हाङ् चाइ आम्नि हिङ्खामाबि चेप्खॆटुर कामानुङ् इघा खानावाँ कॆ आन्ना लोडानि।
12“कॆ आन्ना लोमिम्पा खानावाँ चाइ ग यो, मान्टहाङ् कॆ आन्ना नाम्नाम् पिस्सिडानि, मरहाङ्न आन्नामि लुम्पि एक्कसॆ होइक नाम्नाम् पिस्सिपे चुआनॆ। 13हाङ् टाङ्पाम् लाङ्काम्चिम् लागि टाङ्पाम् हिङ्खामा पिॽमॆ योम्पक्न चोब्बाङ् ढ्या नाम्नाम् पिसिॽमॆ खानावाँ यो। 14हाङ् कॆ आन्ना माङ् लोकानि, म खानावाँ खेमाम्नि हाङ्ग आन्ना काम् लाङ्काम्चि रेम। 15हाङ् हयॆबाङ् मरक् कॆ आन्ना योम्पक् मुखुबा लोसानिनि, मान्ठाभनॆ योम्पक् मुखुबॆ ग उम् टुङ्घङ्पॆ माङ् लॆकुवॆ म खानावाँ लेसुनि। टर कॆ आन्ना लाङ्काम् लोडानि मान्ठाभनॆ कॆ काम् निवाँहाङ् आपाबाङ् माङ्माङ् खेम्डुङ् चोब्न इसिडानि। 16हाङ् आन्नॆ काङा मासॆःक्ङानि, टर काङॆ आन्ना खारानॆ हाङ् हानाम्स लिढाङ्खुबा उम्चा सिसाम्नॆ कामानुङ् सॆगानि। मसॆ आन्नॆ काम् निङ्पि माङ् ङागुकाम्नि, काम् आपॆ आन्ना पिकानि। 17ह कॆ आन्ना लोकानि, आन्नामि लुम्पि एक्कसॆ होइक नाम्नाम् पिसिपे चुआनॆ।
18“बाखाटेम्पिहा याॽमिचिऎ आन्ना सिच्चाआमि हाङ्ग, खोचिऎ याॽल काङा सिच्चाइङ्मि कामानुङ् मिॽलापाम्नॆ। 19हाङ् आन्ना ग बाखाटेम्पिऎ याॽमि हाङ्ग, याॽमिचिऎ टाङ्पाम् याॽमि कामानुङ् नाम्नाम् पिसिटानि हला। टर आन्ना ग बाखाटेम्पिऎ याॽमि हॆॽनि। हाङ्न कॆ आन्ना ग बाखाटेम्बाङ् सॆगानि। मसॆ बाखाटेम्पिहा याॽमिचिऎ आन्ना सिच्चाकानि। 20हाङ् ‘योम्पक् मुखुबा याॽमि चाइ खोम् टुङ्घङ्पाबाङ् ढ्या लिनि’ कामानुङ् कॆ लोमिम्पा खानावाँ मिॽलापाम्नॆ। खोचिऎ काङा डुखा पिट्टिङ्मि हाङ्ग आन्ना ग डुखा पिकानिन। हाङ् खोचिऎ काम् खानावाँ खेमुचि हाङ्ग आम्नि खानावाँ स खेम्कुचि। 21हाङ् काम् निङ्पि खोचिऎ इघा चोब्न योम्पक् आन्ना सक्पि लॆकानि, मान्ठाभनॆ खोचिऎ काङा पाङ्हाङ्खुबा निवाँहाङ् आपा लेसुचिनि।
22“काङा मॆटामिम्पा हाङ् आक्खाचिनुङ् मॆयामुमिम्पा हाङ्ग खोचिबि उम्चि हिङ्वामि आब्डिक् आसिक्खुबा लॆटा। टर ह ग खोचिनुङ् उम्चि हिङ्वा टेम्हाङ्मॆ माङ्स खानावाँ माआ। 23हाङ् आसॆ काङा सिचाङा, आक्कसॆ काम् निवाँहाङ् आपा सङ्क सिच्चाकु। 24हाङ् काङॆ आसॆस मायिक्हिमिम्पा योम्पक् आक्खाचिम् लुम्पि मायिक्मिम्पा हाङ्ग, खोचिबि उम्चि हिङ्वामि आब्डिक् आसिक्खुबा लॆटा, टर खोचिऎ कॆ यिक्मिम्पा आक्खॆॽमाहा योम्पक् खाङ्डुचि हाङ् काङानुङ् काम निवाँहाङ् आपा सिच्चाकिङ्का। 25टर ग उम्चि यायेॽमाबि गरहाङ् साप्मिम्पा खानावाँ लिसिखॆॽल कामनुङ्न लिडॆ रेम, ‘खोचिऎ काङा मरक्न सिच्चाइङ्मि।’#खोम्मिम्पासाम् ३५:१९; ६९:४
26“हाङ् काङॆ आपाबाङ् आन्ना पाइबाक्खुबा चाइबानऎ लावा आन्नाबि पाङ्हाङ्कुङ। हाङ् खोसॆॽन काम् बारेबि चुमॆक्सङ् पिःकु। 27हाङ् काङानुङ् याॽलऎ बाङ्न चुखुबा आन्ना स काङाम् चुमॆक्सङ् पिक्खुबाचि रेम।”
Currently Selected:
युहान्ना 15: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
