युहान्ना 16
16
1“कॆ इघा चोब्न खानावाँ आन्नामि निवाँयुङ् ऎमाखॆॽल कामानुङ् लोमिम्पा रेम। 2हाङ् याॽमिचिऎ आन्ना याहुडिचि खोम्ठाम् खिम्बाङ् लाराङ्कानि। चाइबान लोमार गरक्मा ल टा, आन्ना सेक्खुबॆ ‘कॆ निवाँहाङ् चुङ्मे पाइकुङ्’ कामानुङ् मिनुकु। 3हाङ् आक्खाचिऎ आक्रहा योम्पक् यिगुक्मि मान्ठाभनॆ खोचिऎ निवाँहाङ् आपा नुङ् काङा लेसुचिनि। 4टर आक्खा खानावाँ लिमार आन्नॆ ‘इघा चोब्न खानावाँ लि कामानुङ् खोसॆ काङ्का याॽलन लोमिम्पा लॆटा’ कामानुङ् मिॽलाकाम्नि कामानुङ् लोडानि। काङा आन्नानुङ्न लिमिम्पासॆ कॆ इघा खानावाँ याॽल मालोमिम्पा लॆटानि।
सॆङ्सॆङॆ लावामि योम्पक्
5“टर ह चाइ का काङा पाहाङ्खुबाबि खॆॽमॆ सिङा, टर ‘आना हाम्पि खॆॽमॆ पाइनॆ?’ कामानुङ् आन्नॆ आसॆस सिम्ङानिनि। 6टर कॆ आक्खा खानावाँ लोमिम्पासॆ एट्टान आम्नि निवाँ टुक्डा। 7टर चाइबान कॆ आन्ना लोकानि, काङा खॆॽमान आन्नामि लागि नुऎ लि। मान्ठाभनॆ काङा माखॆॽङा हाङ्ग आन्ना पाइबाक्खुबा सॆङ्सॆङॆ लावा आन्नाबि टानि, टर काङा खारिङ् हाङ्ग कॆ खो आन्नाबि पाहाङ्पिकानि। 8हाङ् खो टाहाङ् खोसॆ बाखाटेम्पिहा याॽमिचिम् हिङ्वामि आब्डिक्, निवाँहाङ्मि चाइबानऎ लाम् हाङ् न्यायॆमि खानावाँ खाङ्मिकुचि। 9हाङ् काङा निवाँयुङ् आलॆःॽमान हिङ्वा लॆःॽमॆ यो लोमॆ खाङ्मिकुचि। 10हाङ् माङ् चाइ निवाँनेन् खानावाँ यो कामानुङ् खाङ्मिकुचि, मान्ठाभनॆ काङा आपाबि खॆॽमॆ पाइङा। हाङ् आन्नॆ काङा फेरि खाङ्टङानिनि। 11हाङ् खोसॆ न्यायॆ लोमॆ माङ्र लोमॆ खाङ्मुकु मान्ठाभनॆ ग बाखाबाटेम्पिऎ हाङ् चाइ न्यायॆबि सिक्खॆडा।
12“कॆ आन्ना लोमा ग डिरिक् चु, टर गरक्ल आन्नॆ आक्खा चोब्न खानावाँ वाप्हिसाम्निनि। 13टर हानाम् चाइ चाइबानऎ लावा टा, खोसॆॽन आन्ना चोब्न चाइबानऎ खानावाँबि लाम्ढुमिकानि। हाङ् खो चाइ खोम् निवाँबाङ् हॆॽनॆ टर माङ् खेमुकु म खानावाँ आन्ना लोकानि। हाङ् डॆङ्पि माङ् लिऎ लोमॆ खानावाँ इकानि। 14हाङ् खोसॆ कॆ इमिम्पा खानावाँन आन्ना इसे काम् निङ्लावा लॆकु। 15हाङ् निवाँहाङ् आपानुङ् चुहा चोब्न खानावाँ काम् यो मसॆ आक्खा खानावाँ लावाऎ काबाङ् लाकुहाङ् खोसॆ आन्ना इकानि लोमिम्पा रेम।
टिङ्खुबाचिम् मिॽवा हाङ्हाङ् लिडॆ
16“आन्नॆ काङा ऎच्छक्मि लागि खाङ्टॽङानिनि हाङ् ऎच्छक् डॆङ्पि होइखेपा खाङ्टःॽङानि।” 17हाङ् खोम् एक्क हिप्पा टिङ्खुबाचि उम्चि टाङ्पा टाङ्पाबि गर कासामि, “हॆॽनि खोसॆ ‘ऎच्छक् डॆङ्पि आन्नॆ काङा खाङ्टॽङानिनि’ हाङ् ‘ऎच्छक् डॆङ्पि फेरि खाङ्टःॽङानि, मान्ठाभनॆ काङा निवाँहाङ् आपाबि खॆॽमॆ पाइङा’ लोमिम्पा चाइ माल?” 18हाङ् खोचि कासामि, “ऎच्छक्म लोमिम्पा चाइ माल? खोसॆ माङ् खानावाँ इमिम्पा काङ्कॆ ग वाबुङ्कानि।”
19हाङ् येसुऎ खोचिऎ खो सिम्मा मिॽमिम्पा उम्चि निवाँबिऎ खानावाँ वाप्टकुहाङ् लोसुचि, “माल् आन्ना कॆ ‘आन्नॆ काङा ऎच्छक्हाङ् खाङ्टॽङानिनि हाङ् ऎच्छक्हाङ् फेरि खाङ्टःॽङानि’ लोमिम्पा खानावाँबि बारेबि खानावाँ इमे पाइकानिहा हॆॽनॆ? 20चाइबान कॆ आन्ना लोकानि, आन्ना हाबुकानि हाङ् निवाँ टुगुकानि, टर बाखाबाटेम्पिहा याॽमिचि चाइ चेन्चाक्मि। आन्नामि निवाँ टुगुक, टर आम्नि टुक्मिम्पा निवाँ चेन्चामाबि ऎन्टा। 21एक्क मेॽनुङ्मामि खोम् चाचा टक्मॆ लः टामार डिरिक् डुखा आङ्कु, टर चाचा टगुकुहाङ् चाइ खोसॆ बाखाटेम्पि एक्क चाचा टाडा मिन्मानुङ् खोम् चोब्न डुखा मिखॆॽमानुङ् चेन्चाक्। 22हाङ् आक्रहाङ्न ह आन्ना निवाँ टुक्माबि चुकानि, टर काङॆ आन्ना फेरि खाङुकानि हाङ् आम्नि निवाँ हाङ्हाङ्बि ऎन्टा। हाङ् आम्नि निवाँबिऎ हाङ्हाङ् आसॆस ङाप्फॆहिसुचिनि। 23आक्रल चाइ आन्नॆ काङा माङ्स सिम्ङानिनि। चाइबान कॆ आन्ना लोकानि, आन्नॆ काम् निड्पि माङ् ङागुकाम्नि, आपॆ म आन्ना पिकानि। 24हढारि ग आन्नॆ काम् निङ्पि माङ्स माङाक्टिटानि। ङागानॆ हाङ् आन्नॆ टक्चाकाम्नि हाङ् खेःॽल आन्नॆ हाङ्हाङ् टक्चाकाम्नि।
बाखाटेम् हेचामॆ खानावाँ
25“ह चाइ काङा आन्नानुङ् काठाबाङ् यामुमॆ पाइङा, टर गरक्मा ल टामेपाइ आक्रल चाइ काठाबि हॆॽनॆ टर काम् निवाँहाङ् आपामि बारेबि आन्नॆ वाप्मेगारि खानावाँ गरमर मालॆरे इकानि। 26आक्रल आन्नॆॽन काम् निङ्पि ङागुकाम्नि। हाङ् काङॆ आन्नामि लागि निवाँहाङ् आपानुङ् ङाःग्मा पाब्नि। 27मान्ठाभनॆ आपॆ आन्ना नाम्नाम् पिसिडानि मन्ठाभनॆ आन्नॆ काङा नाम्नाम् पिसिडिङ्नि हाङ् काङा निवाँहाङ् आपाबाङ् टाडिङॆ कामानुङ् निवाँयुङ् लॆडिङ्नि। 28हाङ् काङा निवाँहाङ्बाङ् ग बाखाटेम्पि टाइङ् हाङ् ग बाखाटेम् याइमानुङ् फेरि आपाबिॽन खॆॽमॆ पाइङा।”
29हाङ् येसुमि टिङ्खुबाचिऎ लोसुचि, “ह आना काठाबि हॆॽनॆ, टर काङ्कॆ वाप्मॆ गारि यामुमे पाइना। 30ह चाइ काङ्कॆ वाबुङ्का, आनॆ चोब्न खानावाँ लेकुना। हाङ् आसॆस आना खानावाँ सिम्मा पाब्नि। मसॆ आना निवाँहाङ्बाङ् टाडानॆ रेम कामानुङ् निवाँयुङ् लॆकुङ्का।” 31हाङ् येसुऎ आक्खाचि लोसुचि, “ह चाइ आन्नॆ निवाँयुङ् लॆकाम्नॆ? 32खाङानॆ, गरक्मा लः टामेपाइ, चाइबान लोमार टाखॆडा। आन्ना काबाङ् पिल्लिङ्खॆकानि हाङ् टाङ्टाङ्पाम् खिम्पि खाइहाङ्कानि हाङ् काङा उङ्टाङ्पे म याइडाङानि। हाङ्स काङा उङ्टाङ्पे लिङानि मान्ठाभनॆ काम् निवाँहाङ् आपा कानुङ् चु।
33“इघा खानावाँ कॆ आन्ना काबि चुमार सान्टि टक्चाआम्नॆ कामानुङ् लोमिम्पा रेम। बाखाटेम्पि चुमार आन्नॆ डुखा आङ्काम्नि, टर आन्ना चॆकुवॆ याॽमि लिसानॆ मान्ठाभनॆ कॆ बाखाटेम् हेचाइखॆडुङ।”
Currently Selected:
युहान्ना 16: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
