युहान्ना 13
13
येसुऎ खोम् टिङ्खुबाचिम् लाङ् सःक्मिम्पा
1हाङ् फाक्मा लोमॆ चाडा याॽल येसुऎ ह खोम् ग बाखाटेम्बाङ् निवाँहाङ् आपाबि खाइमॆ ल टाआ कामानुङ् वाप्टकु। हाङ् खोसॆ बाखाटेम्पि चुक्मिहा खोम् याॽमिचि नाम्नाम् पिसिम्पा लॆटुचि हाङ् खोसॆ आक्खाचि डॆङ्पिढारिन नाम्नाम् पिसिटुचि।
2हाङ् युटाऎ चाम् चामॆ पाइमार साइटानऎ सिमोन इस्कारियोट लोमॆ याॽमिमि पासा याहुडामि निवाँबि येसु बङ्सिॽमॆ खानावाँ टिसिबिॽमिम्पा लॆटु। 3हाङ् येसुऎ निवाँहाङ् आपाऎ चोब्न खानावाँ खो पिडु हाङ् खो निवाँहाङ्बाङ् टाडा हाङ् निवाँहाङ्बिॽन ऎन्खॆ लोमॆ खानावाँ लेॽमिम्पा लॆटु। 4हाङ् येसु चाठाम्पा पगाहाङ् खोम् खाम्मॆ चे युङु हाङ् उम् मिचिक्पि एक्क टुःक्ठाम् चे नॆःरु। 5हाङ् खोसॆ एक्क कक्नाम्पि योवा डॆन्टु। हाङ् टिङ्खुबाचिम् लाङ् सःक्से खोसॆ नॆःॽमिम्पा टुःक्मॆ चेऎ आक्खाचिम् लाङ् टुःक्पिॽमा परकुचि। 6हाङ् येसु सिमोन पाट्रुसमि लाङ् सःक्सि टाआ। हाङ् पाट्रुसऎ खो लोसु, “पारभु, माल् आनॆ काम् लाङ् सःग्पिङानॆ?”
7हाङ् येसुऎ पाट्रुस लोसु, “काङा माङ् लॆःॽमॆ पाइङॆ लोमॆ खानावाँ आनॆ हन ग वाबुनानि। टर डॆङ्पि वाबुकुना।”
8हाङ् पाट्रुसऎ खो लोसु, “आनॆ हानाम्स काम् लाङ् सःक्मा फॆन्नि।” हाङ् येसुऎ खो लोसु, “कॆ आनाम् लाङ् मासग्पिना हाङ्ग, आना काम् याॽमि हॆॽनॆ।”
9हाङ् सिमोन पाट्रुसऎ लोसु, “मरहाङ्ग पारभु, काम् लाङ् टेःन हॆॽने, टर काम हुक् नुङ् निङ्टवाँ स सःग्पिॽङॆ।”
10हाङ् येसुऎ खो लोसु, “नुहालिसिम्पा याॽमिऎ खोम् लाङ्बाङ् होइक माङ्स सःग्मा पाब्नि खोम् चोब्न सालुङ् काम्नुऎ लि। हाङ् आन्ना सॆङ्सॆङॆ लॆकानि, टर आन्ना चोब्न चाइ हॆॽनॆ यो।” 11मान्ठाभनॆ येसुऎ काङा आसॆ चाइ बङ्सिॽमा परक्डिङ् लोमॆ वाप्सिम्पासॆ आन्ना चोब्न चाइ सॆङ्सॆङॆ लॆटानिनि यो लोमिम्पा लॆटा।
12हाङ् येसुऎ आक्खाचिम् लाङ् सःक्सिटुहाङ् खोम् खाम्मॆ चेः खामुहाङ् फेरि खोम् ठालब्न पेना हाङ् टिङ्खुबाचि गर कामानुङ् सिमुचि, “काङॆ आन्नामि लागि माङ् लॆटुङॆ लोमॆ खानावाँ आन्नॆ वाबाम्नॆ? 13हाङ् आन्नॆ काङा चिन्खुबा नुङ् पारभु लोङानि। आन्नॆ नुऎन लोसाम्नि मान्ठाभनॆ काङा मन। 14मसॆ काङा आम्नि पारभु हाङ् चिन्खुबा लॆःॽङा हाङ्स आम्नि लाङ् सगुङ। गरहाङ्न आन्नॆ स एक्कसॆ होइकमि लाङ् सःग्मा लॆ। 15मान्ठाभनॆ आन्नॆ स काङॆ लॆटिन्टॽन लॆटानॆ कामानुङ् कॆ आन्ना लाम्फु खाङ्मिडानि। 16चाइबान कॆ आन्ना लोकानि, योम्पक् मुखुबा याॽमि टुङ्घङ्पाबाङ् ढ्या लिनि। हाङ् खानावाँ टॆःखुबा चाइ खानावाँ पाङ्हाङ्खुबाबाङ् ढ्या लिनि। 17हाङ् इघा खानावाँ वाबाम्नि हाङ् मरहाङ्न पाइटानि हाङ्ग, निवाँहाङ्ऎ आन्ना आसिका पिकानि।
येसु लाप्मिखुबा चाइ खोम् टिङ्खुबान
(मट्टि २६:२०-२५; मारकुस १४:१७-२१; लुका २२:२१-२३)
18“काङॆ आन्ना चोब्नमि बारेबि लोमिम्पा हॆॽनॆ। काङॆ सॆःक्मिम्पा याॽमिचि कॆ लेकुङ्चि। टर निवाँनेन् साब्चिराबि ‘काम् चारेपा चाखुबॆॽन काङा किनिङ्’#खोम्मिम्पासाम् ४१:९ कामानुङ् साप्मिम्पा खानावाँ लिखॆॽमाम् लागि ग लिमिम्पा रेम। 19हाङ् ग लिमाबाङ् याॽलन हन कॆ आन्ना लोडानि। मान्ठाभनॆ आक्क खानावाँ लि हाङ् आन्नॆ काङा खिरिस्टङा कामानुङ् लेःॽङानि। 20हाङ् चाइबान कॆ आन्ना लोकानि, कॆ पाङ्हाङ्पा याॽमि नुःर लॆखुबॆ काङान नुःर लॆःॽङा। हाङ् काङा नुःर लॆखुबॆ काङा पाङ्हाङ्खुबा निवाँहाङ् आपा न नुःर लॆकु।”
21येसुऎ आक्खा खानावाँ इसिटु हाङ् खो निवाँबि ऎट्टान चाइखॆटु हाङ् चुमॆक्सङ् पिट्टु, “चाइबान कॆ आन्ना लोकानि, आन्नामि लुम्पाङ् एक्कसॆ काङा बङ्सिङा।” 22हाङ् खोम् टिङ्खुबाचि चाइ खोसॆ आसा चाइ लोमिम्पा हला मिन्मानुङ् एक्कसॆ होइक खाङ्पॆ चुपकामि। 23हाङ् खोम् टिङ्खुबाचिबाङ् येसुऎ ऎट्टान नाम्नाम् पिसिकुवॆ टिङ्खुबा#१३:२३ येसुऎ नाम्नाम् पिसिम्पा टिङ्खुबा चाइ ग साब्चिरा साप्खुबा युहान्ना लॆटा। चाइ येसुमिबि नॆचाढाङ्पा लॆटा। 24मसॆ सिमोन पाट्रुसऎ खो सिमॆम कामानुङ् टॆरुहाङ् सिमु, “खोसॆ आसाम् बारेबि खानावाँ इमिम्पा?” 25मसॆ आक्क टिङ्खुबा स येसु पोट्टा नॆन्से सिमु, “पारभु, आक्क याॽमि आसार?” 26हाङ् येसुऎ लोसु, “आसा चाइ कॆ चारेपा चगुकुङ् हाङ् पिकुङ् खोन।” हाङ् येसुऎ एक्क योप्मिम्पा चारेपा चगुहाङ् सिमोन इस्कारियोटमि पासा याहुडा पिट्टु। 27हाङ् याहुडाऎ आक्क चारेपा लामा अक्सि उम् निवाँ हङ्सि साइटान भॆना। हाङ् येसुऎ याहुडा लोसु, “आनॆ माङ् योम्पक् यिक्मा ठाबाक्डुना, म सॆॽलन यिक्यिटॆ।” 28आक्कुबि चामा चासि पेन्खुबा याॽमिचिऎ आसॆस येसुऎ मान्ठा गरक्मा खानावाँ इसुवॆ कामानुङ् मॆन्वाबुचि। 29मान्ठाभनॆ याहुडाऎ चाइ याङ्मि बॆक्खा खिन्युक्सु मसॆ ऎॽवाचिऎ चाइ येसुऎ खो चाडामि लागि पाबुहा ठका इल्लापॆ अठावा माङ्स माआमिहा याॽमिचि माङ्माङ् पिट्टॆचॆ लोमिम्पा हला कामानुङ् मिॽलाउचि। 30हाङ् याहुडा चाइ योप्मिम्पा चारेपा लामा अक्सि आक्कबाङ् आम्पक्मानुङ् खाइटा। आक्रल नाम् किक्खॆमिम्पा लॆटा।
येसुऎ एक्क उम्चङ् खानावाँ लोमिम्पा
31हाङ् याहुडा आक्कबाङ् खाइमा अक्सि येसुऎ लोसुचि, “ह याॽमिमि पासा खोम् निङ्लावाबि भॆन्मॆ ल टाडा, हाङ् खोबाङ् निवाँहाङ्मि निङ्लावा लि। 32आक्क डॆङ्पि पासाबाङ् निवाँहाङ्ऎ निङ्लावा लाकु हाङ् खोसॆ पासा सङ्क सॆॽलन निङ्लावा नुङ्मा मुकु।
33“ओ काम् पासाचि, काङा आन्नानुङ् ह ऎच्छक्म टे लिःॽङा। हाङ् कॆ याहुडिचि लोसिन्टक्न आन्ना स लोकानि, ‘आन्नॆ काङा यःङानि, हाङ् काङा हाम्पि खॆःॽङा आक्कुबि आन्ना टाहिसानिनि।’ 34हाङ् कॆ आन्ना एक्क उम्चङ् खानावाँ लोकानि, एक्कसॆ होइक नाम्नाम् पिसिपे चुआनॆ। कॆ मान्टहाङ् आन्ना नाम्नाम् पिसिटानि, मरहाङ्न आन्नॆ स एक्कसॆ होइक नाम्नाम् पिसिपे चुआनॆ। 35हाङ् आन्नॆ एक्कसॆ होइक नाम्नाम् पिसिपे चुआनि हाङ्ग चोब्न याॽमिचिऎ आन्ना काम् टिङ्खुबाचि कामानुङ् लेःक्मि।”
येसुऎ पाट्रुस आनॆ काङा लेॽङानि लोःॽङाना लोमिम्पा
(मट्टि २६:३१-३५; मारकुस १४:२७-३१; लुका २२:३१-३४)
36हाङ् सिमोन पाट्रुसऎ खो सिमु, “पारभु, आना हाम्पि खॆॽमॆ पाइनॆ?” येसुऎ खो लोसु, “काङा हाम्पि खॆॽमॆ पाइङा, गरक्ल आनॆ काङा टिङ्हिङानिनि, टर डॆङ्पि चाइ आनॆ टिङ्ङाना।”
37हाङ् पाट्रुसऎ लोसु, “पारभु, मान्ठा काङॆ आना ह टिङ्हिनानॆ? काङा ग आनाम् लागि सिखॆॽमा स हेकुङ्!”
38हाङ् येसुऎ खो लोसु, “काम् लागि सिखॆॽमा स हेकुना हेम? चाइबान कॆ आना लोक्ना, वेन्डा नाम्स हॆॽवा ओक्माबाङ् याॽल आनॆ काङा खो सुम्चि खेपा लेनलेङानि कामानुङ् लोःॽङाना।”
Currently Selected:
युहान्ना 13: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
