પ્રેરિત કેલે કામે 9

શાઉલ ઇસુપે વિશ્વાસ કેહે

1શાઉલ જો આમી લોગુ, પ્રભુ ઇસુ ચેલાહાને ધમકાવુલુ આને માય ટાકુલો ધમકી આપતલો, આને તોઅ મહાયાજકુહી ગીયો. 2આને કેલ્લો બી આદમી નેતા બાય, ઇસુ પંથુ મીલે, તીયાહાને બાંદીને યરુશાલેમ શેહેરુમે લી જાય, તીયા ખાતુરે તીયાહા દમષ્ક શેહેરુ સભાસ્થાનુ નાવુપે મંજુરી કાગલે લેખી માગ્યે. 3જાંહા શાઉલ આને તીયા આર્યા, ચાલતા-ચાલતા દમષ્ક શેહેરુ જાગે પોચ્યા, તાંહા અચાનક જુગુમેને શાઉલુ ચારુવેલે ઉજવાળો ચોમક્યો, 4આને તોઅ તોરતીપે ટુટી પોળ્યો, આને પરમેહેરુ આવાજ ઉનાયો, “ઓ શાઉલ, ઓ શાઉલ, તુ માને કાહા સતાવી રીયોહો?” 5શાઉલુહુ ફુચ્યો, “ઓ પ્રભુ, તુ કેડો હાય?” તીયાહા આખ્યો, “આંય ઇસુ હાય; જીયાલે તુ સતાવોહો. 6પેન આમી તુ ઉઠ આને શેહેરુમે જો, આને એગુહુ આખી દી કા તુલે કાય કેરુલો હાય.” 7જે લોક તીયા આરી આથા તે થાકાજ રી ગીયા; કાહાકા આવાજ તા ઉનાતલા, પેન કેડાલુજ નાય હેતલા. 8તાંહા શાઉલ તોરતીપેને ઉઠયો, પેન જાંહા તીયાહા ડોંઆ ખોલ્યા, તાંહા તીયાલે કાયજ નાય દેખાયો, આને તીયા આરી આથા, તે લોક તીયા આથ તીને દમષ્ક શેહેરુમે લી ગીયા. 9આને તોઅ તીન દિહ હુદી નાય હી સેક્યો, આને તીયાહા કાયજ ખાદો નાય આને પીદો નાય.

શાઉલુ બાપ્તીસ્મો

10દમષ્ક શેહેરુમે અનન્યા નાવુ એક ચેલો આથો, તીયાલે પ્રભુ ઇસુહુ, દર્શન આપીને આખ્યો, “ઓ અનન્યા!” તીયાહા આખ્યો, “આંય ઓ રીયો પ્રભુ.” 11તાંહા પ્રભુ તીયાલે આખ્યો, “ઉઠીને સીદી નાવુ ગલીમે જો, આને યહુદા કોમે તાર્સસ શેહેરુ શાઉલ નાવુ માંહાલે તપાસ કે; કાહાકા તોઅ પ્રાર્થનાકી રીયોહો, 12આને તીયાહા દર્શનુમે હેયોહો કા, અનન્યા નાવુ એક માંહાહા આવીને તીયાપે આથ થોવ્યો, કા તોઅ ફાચો હી સેકે.”

13અનન્યાહા જવાબ દેદો, “ઓ પ્રભુ, આંય ઈયા માંહા વિશે ખુબ લોકુકી ઉનાયોહો, કા ઇયાહા યરુશાલેમ શેહેરુમે તોઅ પવિત્ર લોકુ આરી ખુબ સતાવણી કેયીહી; 14આને ઇહી બી મુખ્યો યાજકુપેને અધિકાર મીલ્યોહો, કા જે લોક તોપે વિશ્વાસ કેતાહા, તીયા બાદાહાને બાંદીને યરુશાલેમ શેહેરુમે લી જાય.” 15આને પ્રભુહુ તીયાલે આખ્યો, “પેન તુ જો; કાહાકા માઅ સેવા કેરા ખાતુર, અન્યજાતિહીને આને રાજાહાને, આને ઇસ્રાએલી લોકુહુને માઅ વિશે પ્રચાર કેરા ખાતુર માયુહુ તીયાલે પસંદ કેયોહો. 16આને આંય તીયાલે દેખાવેહે, કા લોકુહુને માઅ વિશે આખુલુ લીદે, કાય-કાય દુઃખ વેઠા પોળી.” 17તાંહા અનન્યા જીહી શાઉલ આથો, તીયા કોમે આલો, આને તીયાપે પોતા આથ થોવીને આખ્યો, “ઓ માઅ પાવુહુ શાઉલ, તુ ઇહી આવતલો, તાંહા વાટીપે તુલે દર્શન આપનારો, ઇસુ એટલે પ્રભુ, જીયાહા માને મોકલ્યોહો, કા તુ ફાચો હી સેકો, આને પવિત્રઆત્માકી ભરપુર વી જાંવ.” 18આને તુરુતુજ તીયા ડોંઆમેને સોતરા જેહેડો કાવીહી નીગી પોળ્યો, આને તોઅ હેરા લાગ્યો, આને ઉઠીને બાપ્તીસ્મો લેદો. 19ફાચે માંડો ખાય તીયાલે ગોતી આલી,

આને તોઅ થોડાક દિહી દમષ્ક શેહેરુ ચેલાં આરી રીયો.

શાઉલ ઇસુ ખ્રિસ્તુ વિશે પ્રચાર કેહે

20આને તોઅ તુરુતુજ દમષ્ક શેહેરુ સભાસ્થાનુમે પ્રચાર કેરા લાગ્યો, કા ઇસુજ પરમેહેરુ પોયરો હાય. 21આને બાદે ઉનાનારે માંહે ચકિત વીને આખા લાગ્યે, “જીયા યરુશાલેમ શેહેરુમે જે ઇસુ ખ્રિસ્તુપે વિશ્વાસ કેતલે, તીયાહાને ઓ માય ટાકતલો, કાય ઇ તોજ માંહુ નાહ? આને ઇહી બી ઇયાજ ખાતુર આલ્લો, કા તીયાહાને બાંદીને મુખ્યો યાજકુહી લી જાય.” 22પેન શાઉલુહુ વાદારે શક્તિશાલી રુપુકી પ્રચાર કેરા શુરુ કેયો, આને ઇસુજ ખ્રિસ્ત હાય, ઈયુ ગોઠી સાબિતી આપી-આપીને દમષ્ક શેહેરુ રેનારા યહુદી લોકુ મુયે બંદ કેતો રીયો. 23જાંહા શાઉલુલે દમષ્ક શેહેરુમે રેતા ખુબ દિહી વીતી ગીયા, તાંહા યહુદી લોકુહુ એકઠા વીને તીયાલે માય ટાકા નક્કી કેયો. 24પેન તીયા લોકુ કાવત્ર શાઉલુલે માલુમ પોળી ગીયો: તે તીયાલે માય ટાકા ખાતુરે રાત-દિહી ફાટકાહી ચોકી કેતલા. 25પેન શાઉલુ ચેલા તીયાલે રાતી એક ડોગળા ઉચી દીવાલુપે લી ગીયા, જે શેહેરુલે ઘેરેહે, તાંહા તીયાહા દીવાલુ એક ખુલ્લા ભાગુમેને દોંળા ઉપયોગકીને, એક મોડા છીબલામે બોહાવીને તીયાલે એઠાં ઉતાવ્યો, ઈયુ રીતીકી શાઉલ દમષ્ક શેહેરુમેને વાચાયને નીગી ગીયો.

યરુશાલેમ શેહેરુમે શાઉલ

26શાઉલ યરુશાલેમે ગીયો, આને તીહી તીયાહા ચેલાં આરી જોળાય જાંઅ કોશિશ કેયી, પેન તે બાદે તીયાલે બીતલે, કાહાકા તીયાહાને વિશ્વાસ નાય વેતલો, કા તોઅ બી ઇસુ ચેલો બોની ગીયોહો. 27પેન બર્નાબાસ શાઉલુલે પોતા આરી લી જાયને ચેલાહાને આખ્યો, કા ઇયાહા દમષ્ક શેહેરુમે જાવુલી વાટીમે પ્રભુ ઇસુલે હેયો, આને ઇસુહુ ઈયા આરી ગોઠયા કેયા; ફાચે ઇયાહા હિમત રાખીને કેહકી દમષ્ક શેહેરુમે ઇસુ નાવુ પ્રચાર કેયો. 28ઈયા ખાતુર શાઉલ યરુશાલેમ શેહેરુમે રોકાય ગીયો, આને આખા યરુશાલેમ શેહેરુમે જાયને હિંમત રાખીને ઇસુ વિશે પ્રચાર કેરા લાગ્યો. 29આને ગ્રીક ભાષા ગોગનારા યહુદી લોકુ આરી ગોઠયા આને વાદ-વિવાદ કેતલો; પેન તે તીયાલે માય ટાકા કોશિશ કેરા લાગ્યા. 30ઇ જાંયને તીયા આર્યા વિશ્વાસી પાવુ તીયાલે કૈસરિયા શેહેરુમે લી આલા, આને તીહીને તીયાલે જાહાજુમે બોહાવીને તાર્સસ શેહેરુ એટલે તીયા પોતા શેહેરુમે મોકલી દેદો. 31આને ઈયુ રીતી બાદા યહુદીયા વિસ્તારુ, ગાલીલ વિસ્તારુ, આને સમરુન જીલ્લા મંડળી લોકુહુને શાંતિ મીલી, આને તીયાં લોકુ ઉન્નતી વેતી ગીયી; આને પ્રભુ બીખુમે આને પવિત્રઆત્મા મારફતે ઉત્સાહિત વેતા ગીયા, આને ખુબુજ લોકુહુ પ્રભુ ઇસુપે વિશ્વાસ કેયો.

પિત્તર એનીયાસુલે હારો કેહે

32ફાચે એહકી વીયો, કા પિત્તર તીયા બાદા વિસ્તારુમે ફીરતો-ફીરતો, લુદા શેહેરુમે રેનારા પરમેહેરુ લોકુહુને મીલા ગીયો. 33તીહી તોઅ એનીયાસ નાવુ એક માંહાલે મીલ્યો, જો લોખવાવાલો આથો, આને તોઅ આઠ વોર્ષ લોગુ ખાટલામે પોળલો આથો. 34પિત્તરુ તીયાલે આખ્યો, “ઓ એનીયાસ ઇસુ ખ્રિસ્ત તુલે હારો કેહે, ઉઠ, તોઅ ફાતારી ઉખલી લે” તાંહા તોઅ તુરુતુજ હારો વીને ઉબી રીયો. 35લુદા આને શારોન શેહેરુ રેનારા બાદા લોકુહુ તીયાલે હીને, તીયા લોકુહુ પ્રભુ ઇસુપે વિશ્વાસ કેયો.

દરકાસ નાવુ બાયુલે જીવન દાન

36યાફા શેહેરુમે ટબીથા નાવુ એક વિશ્વાસી બાય આથી, (તીયુ નાવ ગ્રીક ભાષામે દરકાસ હાય, આને તીયા અર્થ હાય, “એક હરણ”) તે ખુબુજ ભોલો કામ, આને ગરીબ લોકુહુને મદદ કેતલી. 37તીયા સમયુલે જાંહા પિત્તર લુદા શેહેરુમે આથો, તીયા દિહુમે ટબીથા બિમાર વીને મોય ગીયી; આને તીયુ આરી બાયુહુ તીયુલે ઉંગાવીને માલા ઉપરી એક ખોલીમે થોવી દેદી.

38ઈયા ખાતુર કા લુદા શેહેર યાફા શેહેરુ પાહીજ હાય, આને યાફા શેહેરુ ચેલા એહકી ઉનાયા કા, પિત્તર લુદા શેહેરુમે હાય, તાંહા તીયાહા બેન માંહાને મોકલીને, તીયાલે વિનંતી કેયી કા, “આમાહી આવા ખાતુર વા માઅ લાગવોહો.” 39તાંહા પિત્તર તુરુતુજ તીયાં આરી ગીયો, આને જાંહા તોઅ પોચી ગીયો, તાંહા તે લોક તીયાલે ઉપરી ખોલીમે લી ગીયા, આને બાધ્યા વિધવા બાયા રોળત્યા-રોળત્યા પિત્તરુહુ આવીને ઉબી રીયા, આને દરકાસ જીવતી આથી તેહેડામે તીયુહુ જે ડોગલ્યા, આને ઝોબ્બા બોનાવલા, તે પિત્તરુલે દેખાવા લાગ્યા. 40તાંહા પિત્તરુહુ લોકુહુને બારે કાડી થોવ્યે, આને ઘુટણે પોળીને પરમેહેરુલે પ્રાર્થના કેયી; આને મુર્દા વેલ હીને આખ્યો, “ઓ ટબીથા, ઉઠ” તાંહા તીયુહુ પોતા ડોંઆ ખોલ્યા; આને પિત્તરુલે હીને ઉઠીને બોઠી. 41પિત્તરુહુ આથ દિને તીયુલે ઉઠવી, આને પરમેહેરુ પવિત્ર લોકુહુને આને વિધવા બાયુહુને હાદીને તીયાં આગલા જીવતી દેખાવી. 42એ ગોઠ આખા યાફા શેહેરુમે ફેલાય ગીયી; આને ખુબુજ લોકુહુ પ્રભુ ઇસુપે વિશ્વાસ કેયો. 43આને પિત્તર યાફા શેહેરુમે શિમોન નાવુ ચાંબળા ધંધો કેનારાહી, ખુબુજ દિહી લોગુ રીયો.

Currently Selected:

પ્રેરિત કેલે કામે 9: DUBNT

Highlight

Copy