Like 13

Lekaala le eku

1O ntini jya baari ayi na aduha nde jaa asi Ngalili, eli Pilaate ovusihi tohi le bo bɨla avwoŋi#13.1 Like obari otari, nde nkʉmu a Jide. atumi obuma asi Galili, ntini e bo ma mpihi Njyami avwoŋi. 2Jesu okaali na bo ndi: «Be lecimiŋa mbɨri asi Ngalili ma bumi mo osuumbu jwa, aki avʉli asi Ngalili maamo ambiini osa? 3Kali, me eduha be, ŋa be obɨsa okaala eku, be le eje okwa be aso mva bo. 4Ŋa baari a kuumi na mfwomo ma akwi o nculu e Silowe#13.4 Silowe, biri eli mbere onguundu o Jerusaleme. Eki na nculu okeri ama kuusa obaga enini., o ntini obaha owunihi, be lecimiha mbɨri bo aki avʉli asi Jerusaleme maamo ambiini osa? 5Kali, me eduha be, be obɨsa okaala eku, be leje okwa be aso mva bo.»

Ncincami oti ali i mpa mburu ni

6Ŋa Jesu oti bo ncincami ndi: «Balaha mo aki na oti a nkuumi figye#13.6 Figye oti ma kuniga mpili a Ajife. Mburu ewwana omboloho. nca nguunu e viinye#13.6 Viinye oti ampaha mburu e nkuumi rese, ma syaga mali a ba.. Nde oyeni na atolo mburu o figye, nde aka baha ni. 7Ŋa nde na ojanji a viinye ndi: “Mono esibi eya etari e me eya na otolo mburu, me i baha ni. Cebe oti a figye yu! Na kiila o nde asyaha o yula ncye ŋa onyaŋa!” 8Ŋa ojanji a viinye okaali na nde ndi: “Nkʉmu sa nyila nde osibi ki, me cima ncina nde me lehe ewuru. 9Leke osibi o vusu nde ampa mburu. Nde obɨsa ompa we cebi nde.”»

Jesu osalihi okaasi oleme, o cuhu mawuumaha

10Jesu aki ayisiha nca njo mavwonoho o cuhu mawuumaha. 11Okaasi omo aki na odidima obi, oma mpa nde onkoro esibi kuumi na mfwomo. Nde i buuna osiiha oki tele ni. 12Jesu omono okaasi jwa, ocwoli nde, na nde ndi: «We omi wuuma ma oleme o we.» 13Nde olehi jyala o yula nde. O nci na nci ŋa, nde osihi oya tele. Oya akuusa lekʉma le Njyami. 14Ŋa nkʉmu a njo mavwonoho obye nkala, ma obila o Jesu asalihi mvuuru o cuhu mawuumaha. Nde na lemvuuru ndi: «Ecuhu e janja esyami, bya ecuhu ma salaha baari. Le eya, asalaha be me ecuhu bya, ka o cuhu ma awuumaŋa ni!» 15Nkʉmu okaali na nde ndi: «Be na ompyele! Be leka nanaha ngoombo si kali aane o cuhu mawuumaha #13.15 Nca osangumu o Like amateende aane. Nyama a baari ma kumaha o yula nde ma ojye, na letehe la anja. lempi bo anja ni? 16Ŋa okaasi yu mwana Abraame. Jabɨri aki ama kura nde endi esibi kuumi na mfwomo, aki i buuna onaana nde endi o cuhu mawuumaha ni?» 17Ntini e nde awobihi abuha ma ombangu amoni okʉru, ŋa lemvuuru leso leki leswere, o maami ma ave a nde asihi.

Ncincami leviire

18Jesu ndi: «Onkani o Njyami owwana oma? Me oyelehe bo bɨla oma? 19Onkani o Njyami mva lemburu le otaade#13.19 Ma lefaala mutaade, nkuumi e mo seneve. Lemburu le nde nceeri, okuna nde, nde okirihi oti onini. Ma jyaha nde se o nca biila., le mvuuru akunaha nca nguunu e nde. Lekuli, lekirihi oti. Anywi acwi anjo o yulu entaha e nde.»

20Nde ovurihi oduhi ndi: «Me oyelehe Onkani o Njyami bɨla oma? 21Bo mva leviire le okaasi ayaha, ovusihi bɨla fariini a kuna#13.21 Ekuumi jyele na akilo ataani a fariini., jo eso ekumi.»

Osuumbu ma onyunuha nca Onkani o Njyami

22Jesu ayirihi ma enguundu na ampuhu na oyisaha. Nde ayenihi mpili onguundu o Jerusaleme. 23Mvuuru opɨsi nde ndi: «Ee Nkʉmu, baari ma aje ovuuha ma aje oka nceeri?» Jesu okaali bo ndi: 24«Lesa mpari ma onyunuha, ma onywa a njo okyehe. Me eduha be, kuna ma aje osaha onyunuha, ŋa ma aka aje obuuna ni.

25Ŋa ntini e nkʉmu a njo aje otemehe, obiinda odibihi, be osiila o nji, be lebaana okʉruha njo mo oduha ndi: “Nkʉmu, naana bisi,” ŋa nde aje okaala na be ndi: “Be asi kuni?” 26Ŋa be le eje oduha nde mbɨri: “Bisi lema aja, lema anywa bɨla we. We ama yisiha nca ewoombo ema enguundu e bisi.” 27Ŋa nde ovuriha okaala be ndi: “Be asi kuni? Lecyehe o paani e me, be aso lesyaha maami ma abi!” 28Be leje oka ma olili leja mii, o ntini e be leje omono Abraame bɨla Isaake na Jakobe, na awobi a mbari e Njyami aso nca Onkani o Njyami. Ŋa be, atuna o nji! 29Ŋa baari ma aje owa na mpili e tari etemehe, na mpili e yo evwaha, na ntaana bɨla mbere. Bo ma aje oyaha biri o tanda, nca Onkani o Njyami. 30Ŋa mo vwa, ma ali lembɨsa ma aje oka levusu, ma ali levusu ma aje oka lembɨsa.»

Jesu aselehe oje na mpili e Jerusaleme

31O ŋiŋa Afarisi ake aciini mpili e Jesu ndi: «Cyehe o ŋa, aje la, Erode Atipaase asaha obuma we.» 32Jesu oduhi na bo ndi: «Leje na aduha na obahi jwa mbɨri: “Me ecuura edidima me ebi, me esalaha baari, na lobi na osuuha, ŋa mbɨsa osuuha#13.32 Nca osangumu o Like, mbɨsa osuuga oma kaha cuhu o tari: ncomi cuhu e nde akwa o Jerusaleme. Si kali cuhu o tari e nde aya onyusaha. me mana janja e me.” 33Ŋa ove me yeni na vusu, na lobi na osuuha, na cuhu nkɨma. Mo oma owobi a mbari e Njyami i kwa la na Jerusaleme ni.»

34«Jerusaleme, Jerusaleme, we abumaŋa awobi a mbari e Njyami. We abuma ma akele a Njyami atumi we. Antini kuna me ema dya okusaha baana a we, mva okari a ncusu akusaha baana ma ncusu ncina apaabi a nde, ŋa be leka adya ni! 35Ŋa ma aje osuba njo e be kalihi. Ŋa me eduha be, be leka aje omono me ni, tii ngo ntini e be leje oduha mbɨri: “Andosoho aka na mvuuru aya o nkuumi e Nkʉmu!”»

Currently Selected:

Like 13: MDT

Highlight

Copy