Luc 12

Baari ma yalaha Zezi

1O ntini dzia, lemvuuru le kuna ledzenihi Zezi. Bo ma dzaraha nyiili ma abuha. Zezi obaani owobo na aluoni ndi: «Be lesi ayiba ma leviire#12.1 Leviire kiila ma lehe o fariini ma okuusa lo, ntini ma sa mpeembe. le Afarizi, lo oma kaha ompiele o bo. 2Maami a ma adzisihi aso ma adze otsuuha, a ma adzisihi aso se ma adze oyaa. 3Kia obila eli maami aso a be le edze oduha ntsa lempiibi, ma adze oyuha na mui. A be le edze oduha ma awawa otsui le buha ntsa otini o ndzo, ma adze otsuuha o mua mpuhu.»

Mvuuru ma abuuna onyiima

4Me eduha be ma andihi a me, lekaa monoho vuoho o baari ma bumaha akabi ni. Ongula ŋa bo i buuna osa dzaa nkima ni. 5Me eduha be, mvuuru a be lebuuna onyiima Ndziami. Nde na mpari ma otuma be ntsa biri ampasi, ngula leku. Ee me eduha be, nde mvuuru a be lebuuna onyiima!

6«Ma buuna otehe baana ma anyui ataani ma adoro vuele? Okoroho Ndziami i limiha si omo ni. 7Na mfu eli ma etsui e be, ama tala yo. Lekaa monoho vuoho ni, be levuli baana ma anyui a kuna mvunu!»

8«Me eduha be: mpini mvuuru adze oyalaha me o miisi a baari, Muana Mvuuru se adze oyalaha nde o miisi ma abaandzi a Ndziami. 9Ŋa mvuuru abisa me o miisi a baari, Muana mvuuru se adze obisa nde o miisi ma abaandzi a Ndziami. 10Mvuuru owobo mbari e mbi o Muana mvuuru, ma adze oboloho nde. Ŋa atuha Oduduma Santi ma aka adze oboloho nde ni. 11Ntini ma adze obira be ntsa andzo ma avuonoho ma opama be, o miisi ma ankumu na ankani, be lekaa monoho vuoho mo mbari e be le edze owobo na a be le edze oduha ni. 12Obila Oduduma Santi adze oyisiha be o ŋiŋa dzaa e be le edze oduha.»

Zezi aduha ntsintsami e balaha eli na ndzala osolo

13Mvuuru omo o ntsa lemvuuru na Zezi ndi: «E Nkumu, duha na okulu a me okaba wanda e saande.» 14Zezi okaali nde ndi: «Ama tsuusa me ŋa ma opama maami na le kaba la osolo a be na?» 15Emana nde oduhi na bo ndi: «Be lesi ayiba! Leka siaha ndzala biibi kuna ni. Lebihi le mvuuru ka mvuuha ni, si nde avula osolo.»

16Nde oti bo ntsintsami ndi: «Balaha mo e nga osolo evuusi biila kuna ma anguunu a nde. 17Nde atsimiha ntsa otima ndi: “Me osa buni? Me biri otsuusa biila kali?” 18Ŋa nde ndi: “Me yaa osuumbu a me esa. Me tsala etala, me tuha ma evuli onini. Ŋa me lehe mburu#12.18 Mburu oma kaha ble ma siaha fariini bla lempeembe. e me eso, na biibi e me ekema. 19Ŋa me eduha na Oduduma a me mbri we na mvuuha kuna, ma esibi kuna. Wuuma, dza, nyua, suere.” 20Ŋa Ndziami na nde ndi: “We odzili! Ma lempiibi le lobi li me eyaha owuru a we. Ŋa eso e we ama yeese ma etala, asiila na dzo na?”» 21Zezi oluusi ndi: «Mono maami ma aya o mvuuru asaha osolo a nde anku, nde osolo o miisi a Ndziami kali.»

Lelehe tari o Ndziami

22Emana Zezi oduhi na aluoni a nde ndi: «Dzia biri e me eduha be mbri, be leka monoho onguo ma lebihi le be, na kiila o be ledza, bla amfa ma olaasa ni. 23Obila lebihi levuli biila, ŋa nyuru evuli amfa. 24Lekeese enkuaŋa, dzo i kuna ni, dzo i kiele mburu ni, okoroho Ndziami abunuŋa dzo. Be levuli anyui mvunu. 25O mpanihi e be abuuna oluusa etsuhu ntsa lebihi le nde obila ma onguo na? 26Yuhu be i buuna osa maami ma akiehe ni, ŋa be lemonoho onguo o maami maamo buni? 27Lemono mva ekulaha wula efuuma ma anguunu, yo i dzandza ni, i tua amfa ni. Okoroho me eduha be ntini e nkani Salomon aki na osolo a nde aso, nde aka laasa amfa ma awali ma vuli wula si mo ni. 28Ndziami alaasa efuuma ma anguunu lobi ma adze otsuha osuuha, ŋa nkusa na be? Be oyalihi ntseeri! 29Ŋa be i ma saha kiila o be le edze odza na onyua ni, be i ma mono onguo ni. 30Bya eso osahi dzo antini aso, baari a yula ntsie ma ali i yaa Ndziami ni. Ŋa taara a be oyaa ndi be na kaama. 31Lesa saha Onkumu o Ndziami o yula be, ŋa ma emo oma luusa be lembisa.»

32«Be leka monoho vuoho ni, dziimi le ekiehe. Obila taara a be amono ove ma ompa be eve ma Onkani o nde. 33Letehe biibi ma eli na be, lempa anga owuha adoro. Lesaha osolo a mbumbu, osolo oli i wa o yulu ni. Mpili eli odzibi i tsiina ni, antsieri i dza ni. 34Ŋa biri eli osolo a be, biri edze oka etima e be.»

Adzandzi ma amoho

35Leka ma amfa a dzandza, be lekiele abaami ma mbaa a be aka ma onama. 36Be leki mva adzandzi ma adila nkumu awa tsinda e baala. Ntini e nde adze oya, na o nde adze okuruha, onaani nde ndzo. 37Osuere oka na adzandzi ma ali nkumu oya, obasihi bo ma amoho! Sisiele me eduha be, nde adze oselehe amfa, olehe bo o tanda, omana ompa bo biila. 38Nde oya na avuruha o mua otima lempiibi, si kali ma etsihi e tsuhu, nde obasihi bo muo, osuere oka na bo!

39«Be leyaa mbri: o nga ndzo aki ma oyaa ntini edziaha odzibi, kaa nde aka nyila nde onyunihi o ndzo e nde ni. 40Be se le deli, ma oma Muana Mvuuru adze oya o ntini e be le eli i yaa ni.»

Odzandzi ali tele na oyeri

41Piere na nde ndi: «E Nkumu, we ata ntsintsami dzi ŋa o bisi atu, si o baari aso?» 42Nkumu okaali na nde ndi: «Dzua odzandzi ali tele na oyeri a nkumu ama tsuusa ma okiele ndzo na lempa la abuha biila antini aso na? 43Osuere oka na odzandzi ali nkumu oya na avuruha, nde obasihi nde asa dzandza! 44Me eduha be sisiele: Nde adze ompa odzandzi onkumu o yula osolo a nde aso. 45Ŋa odzandzi otsuomo na otsimiŋa ntsa otima a nde ndi: “Nkumu a me aka aya paraabu ni”, ŋa nde oya abeere adzandzi maamo, ma abalaha na ma akaasi. Nde odzi, onyui, okoli. 46Ŋa nkumu odzandzi dzua adze oya o tsuhu na tari e nde ali i yaa ni. Nkumu adze otsuura nde na leliisa le nde, mva baari ma ali ka tele ni. 47Ŋa odzandzi adziabi ediŋii e nkumu a nde, omana nde i ma sa mva e nkumu adii ni, mbaa nkumu adze obeere nde ekatsi e kuna. 48Ŋa odzandzi ali i yaa ediŋii e nkumu ni, asa maami ma abi, ma adze obeere nde ekatsi ntseeri. Ma adze opisa kuna na mvuuru ma ama mpa kuna. Ma ama ampa kuna, ma adze oselehe opisa nde kuna.»

Zezi ndi baari ma adze obaha abuha o nde

49«Me eyi na mbaa o yula ntsie. Me ndzala yo enama! 50Ove me yahi ateeme#12.50 Ateeme kuuni oma kaha ampasi a Zezi aya omono., onguo osa me yuhu me kini yaha mo ni. 51Be letsima mbri me eyi ŋa na ampa oduusu o yula ntsie? Kali, me eduha be me eyi na ombayi. 52Ŋa ma obaana o lobi baari ataani o ndzo ma baha abuha. Atari ma dzuana na vuele, vuele ma dzuana na atari. 53Taara abele muana a balaha, muana a balaha abele taara, nguhu abele muana okaasi, muana okaasi abele nguhu, nguhu olumi abele okari a muana, okari a muana abele nguhu olumi.»

Ove leyaa andiimi a Ndziami

54Nde aselehe oduha na lemvuuru ndi: «Ntini e be lemono yulu emipiina mpili e tari evuaha, be mbri: “Mvula lobi anoho”, nde se onohi. 55Ntini e be lemono piebi ewa na mbere eya na ntaana, be leduhi mbri: “Lobi na ndzuusi”, yo se eyi. 56Be anga ompiele! Be leyaa maami ma yira o yulu bla ntsie, ŋa ma yira ma antini ma, be i yaa ni?»

57«Be i paama be anku osuumbu osa maami a tele ni? 58Ntini e mvuuru abanaŋa we, omana be leyeni ososo, ove be leyeesi o ndzila, ma oduma be oto kua, opami oma mpa we na oworo, olehe we ongeneŋe. 59Me eduha we, we i buuna otsuuha ma ongeneŋe yuhu we kini wura obiimi#12.59 O ŋa le wura le obiimi tii doro okiehe. oso ni.»

Currently Selected:

Luc 12: MDT

Highlight

Copy