Luc 13

Lekaala le eku

1O ntini dzia baari ayi na aduha nde dzaa asi Ngalili, eli Pilaate ovusihi tohi le bo bla avuoŋi#13.1 Like obari otari, nde nkumu a Zide. atumi obuma asi Galili, ntini e bo ma mpihi Ndziami avuoŋi. 2Zezi okaali na bo ndi: «Be letsimiŋa mbri asi Ngalili ma bumi ma osuumbu dzua, aki avuli asi Ngalili maamo ambiini osa? 3Kali, me eduha be, ŋa be obisa okaala eku, be le edze okua be aso mva bo. 4Ŋa baari a kuumi na mfuomo ma akui o ntsulu e Silowe#13.4 Silowe, biri eli mbere onguundu o Zerizaleme. Eki na ntsulu okeri ama kuusa obaga enini., o ntini obaha owunihi, be letsimiha mbri bo aki avuli asi Zerizaleme maamo ambiini osa? 5Kali, me eduha be, be obisa okaala eku, be ledze okua be aso mva bo.»

Ntsintsami oti ali i mpa mburu ni

6Ŋa Zezi oti bo ntsintsami ndi: «Balaha mo aki na oti a nkuumi figie#13.6 Figye oti ma kuniga mpili a Azife. Mburu ewwana omboloho. ntsa nguunu e viinye#13.6 Viinye oti ampaha mburu e nkuumi reze, ma siaga mali a ba.. Nde oyeni na atolo mburu o figie, nde aka baha ni. 7Ŋa nde na odzandzi a viinye ndi: “Mono esibi eya etari e me eya na otolo mburu, me i baha ni. Cebe oti a figie yu! Na kiila o nde asiaha o yula ntsie ŋa onyaŋa!” 8Ŋa odzandzi a viinye okaali na nde ndi: “Nkumu sa nyila nde osibi ki, me tsima ntsina nde me lehe ewuru. 9Leke osibi o vusu nde ampa mburu. Nde obisa ompa we tsebi nde.”»

Zezi osalihi okaasi oleme, o tsuhu ma awuumaha

10Zezi aki ayisiha ntsa ndzo ma avuonoho o tsuhu ma awuumaha. 11Okaasi omo aki na odidima obi, oma mpa nde onkoro esibi kuumi na mfuomo. Nde i buuna osiiha oki tele ni. 12Zezi omono okaasi dzua, otsuoli nde, na nde ndi: «We omi wuuma ma oleme o we.» 13Nde olehi dziala o yula nde. O ntsi na ntsi ŋa, nde osihi oya tele. Oya akuusa lekuma le Ndziami. 14Ŋa nkumu a ndzo ma avuonoho obie nkala, ma obila o Zezi asalihi mvuuru o tsuhu ma awuumaha. Nde na lemvuuru ndi: «Etsuhu e dzandza esiami, bia etsuhu ma salaha baari. Le eya, asalaha be ma etsuhu bia, ka o tsuhu ma awuumaŋa ni!» 15Nkumu okaali na nde ndi: «Be na ompiele! Be leka nanaha ngoombo si kali aane o tsuhu ma awuumaha #13.15 Ntsa osangumu o Like ama teende aane. Nyama a baari ma kumaha o yula nde ma odzie, na le tehe la andza. lempi bo andza ni? 16Ŋa okaasi yu muana Abraame. Dzabri aki ama kura nde endi esibi kuumi na mfuomo, aki i buuna onaana nde endi o tsuhu ma awuumaha ni?» 17Ntini e nde awobihi abuha ma ombangu amoni okru, ŋa lemvuuru leso leki lesuere, o maami ma ave a nde asihi.

Ntsintsami leviire

18Zezi ndi: «Onkani o Ndziami owuana oma? Me oyelehe bo bla oma? 19Onkani o Ndziami mva lemburu le otaade#13.19 Ma lefaala mutaade, nkuumi e mo seneve. Lemburu le nde ntseeri, okuna nde, nde okirihi oti onini. Ma dziaha nde se o ntsa biila., le mvuuru akunaha ntsa nguunu e nde. Lekuli, lekirihi oti. Anyui atsui andzo o yulu entaha e nde.»

20Nde ovurihi oduhi ndi: «Me oyelehe Onkani o Ndziami bla oma? 21Bo mva leviire le okaasi ayaha, ovusihi bla fariini a kuna#13.21 Ekuumi dziele na akilo ataani a fariini., dzo eso ekumi.»

Osuumbu ma onyunuha ntsa Onkani o Ndziami

22Zezi ayirihi ma enguundu na ampuhu na oyisaha. Nde ayenihi mpili onguundu o Zerizaleme. 23Mvuuru opisi nde ndi: «Ee Nkumu, baari ma adze ovuuha ma adze oka ntseeri?» Zezi okaali bo ndi: 24«Lesa mpari ma onyunuha, ma onyua a ndzo okiehe. Me eduha be, kuna ma adze osaha onyunuha, ŋa ma aka adze obuuna ni.

25Ŋa ntini e nkumu a ndzo adze otemehe, obiinda odibihi, be osiila o ndzi, be lebaana okuruha ndzo ma oduha ndi: “Nkumu, naana bisi,” ŋa nde adze okaala na be ndi: “Be asi kuni?” 26Ŋa be le edze oduha nde mbri: “Bisi lema adza, lema anyua bla we. We ama yisiha ntsa ewoombo ema enguundu e bisi.” 27Ŋa nde ovuriha okaala be ndi: “Be asi kuni? Letsiehe o paani e me, be aso lesiaha maami ma abi!” 28Be ledze oka ma olili ledza mii, o ntini e be ledze omono Abraame bla Izaake na Zakobe, na awobi a mbari e Ndziami aso ntsa Onkani o Ndziami. Ŋa be, atuna o ndzi! 29Ŋa baari ma adze owa na mpili e tari etemehe, na mpili e yo evuaha, na ntaana bla mbere. Bo ma adze oyaha biri o tanda, ntsa Onkani o Ndziami. 30Ŋa mo vua, ma ali lembisa ma adze oka levusu, ma ali levusu ma adze oka lembisa.»

Zezi aselehe odze na mpili e Zerizaleme

31O ŋiŋa Afarizi ake atsiini mpili e Zezi ndi: «Tsiehe o ŋa, dze la, Erode Atipaase asaha obuma we.» 32Zezi oduhi na bo ndi: «Ledze na aduha na obahi dzua mbri: “Me etsuura edidima ma ebi, me esalaha baari, na lobi na osuuha, ŋa mbisa osuuha#13.32 Ntsa osangumu o Like, mbisa osuuga oma kaha tsuhu o tari: ntsomi tsuhu e nde akua o Zerizaleme. Si kali tsuhu o tari e nde aya onyusaha. me mana dzandza e me.” 33Ŋa ove me yeni na vusu, na lobi na osuuha, na tsuhu nkima. Ma oma owobi a mbari e Ndziami i kua la na Zerizaleme ni.»

34«Zerizaleme, Zerizaleme, we abumaŋa awobi a mbari e Ndziami. We abuma ma akele a Ndziami atumi we. Antini kuna me ema dia okusaha baana a we, mva okari a ntsusu akusaha baana ma ntsusu ntsina apaabi a nde, ŋa be leka adia ni! 35Ŋa ma adze osuba ndzo e be kalihi. Ŋa me eduha be, be leka adze omono me ni, tii ngo ntini e be ledze oduha mbri: “Andosoho aka na mvuuru aya o nkuumi e Nkumu!”»

Currently Selected:

Luc 13: MDT

Highlight

Copy