Luc 14
14
Zezi asalaha obieri o tsuhu ma awuumaha
1Tsuhu ma awuumaha mo, Zezi oyeni na adza biila mpili e nkumu Afarizi omo. Baari ma aki ŋa ma keese nde. 2Ŋa balaha mo eki na ngaa ebiimaha nyuru. Nde aki o vusu o Zezi. 3Zezi oyahi mbari, na ayisihi ma angri bla Afarizi ndi: «Ma buuna osalaha obieri o tsuhu ma awuumaha, si kali?» 4Bo aya pi. Ŋa Zezi oyahi obieri, osalihi, onyili nde oyeni. 5Emana nde na bo ndi: «O mpanihi e be ali na muana si kali ngoombo a nde ova ntsa terihi, abisa otusaha nde asisari o tsuhu ma awuumaha ni na?» 6Bo aka buuna oyalaha ni.
Zezi atiba baari ma osuoloho ebiri ma lembisa
7Zezi ama mono ndi baari ma dziaha ma atsinda osuoloho ebiri ma levusu. Ŋa nde oti bo ntsintsami ndi: 8«Ntini e mvuuru atuolo we o tsinda e baala, we kaa kaha levusu ni. Ma oma, leke onga tsinda ama tuolo mvuuru okima avuli we okiimi, 9ŋa ntini onga tsinda atsuoli be aso a vuele, oya na aduha na we ndi: “Yisa nde biri”, we ama temehe ma odze biri e mbisa ŋa na okru oso. 10Ŋa ntini ma tuolo we o tsinda, dziehe na aka obiri lembisa, onga tsinda oma ya oduhi na we ndi: “E ndihi a me, dziaha na aka levusu.” O ŋa we omoni okiimi o mua baari ma ali bla we o tanda. 11Obila, ntini e mvuuru akuusa nyuru nde anku, avuuri nde ntsi, ŋa mvuuru avuriha ntsi, akuusi nde.»
Zezi atiba ma ompa anga owuha
12Nde se oduhi na mvuuru atuoli nde ndi: «Ntini e we atuolo baari ma odza, ka atuoloho andihi na baana ma anguhu, na nkuono e we, na anga osolo ma ali o paani e we ni. Tsaaki bo se atuoli we na adza, bo avuuri we ma lemihi le we ampi bo. 13Ŋa ntini e we asa tsinda, tuolo anga owuha na ebuka, na eleme na baari ma ali i mono ni. 14Ŋa we adze omono ove obila bo kiila ma buuna ovuura we onyaŋa. Ndziami adze ovuura we o tsuhu akui a tele ma adze onyusiha.»
Ntsintsami e tsinda e nini
15Mvuuru omo aki o tanda oyuha vua na Zezi ndi: «Ove oka na mvuuru adze odza biila ntsa Onkani o Ndziami!» 16Zezi oti bo ntsintsami dzi ndi: «Balaha mo ekusihi tsinda e nini, otsuoli baari kuna. 17Ntini odza eto, otumi odzandzi a nde na aduha baari a nde atuoli ndi: “Ŋa ledziaha ntini emi to.” 18Ŋa bo aso, omo na omo, apisi kolo kolo. A ntsomi ndi: “Me kini ma osuuma nguunu, ove me yeni na amono yo. Boloho me.” 19Omo ndi: “Me kini ma osuuma angoombo kuumi, me edze na keese bo. Kolo kolo e we boloho me.” 20Okimandi: “Me kini esi baala, kia obila o me eli i buuna oya ni.” 21Odzandzi oya na avuruha na e nkumu, oduhi nde maami maa aso a baari baa ma kaali. Ŋa nga ndzo obie nkala, na odzandzi ndi: “Dziehe asisari ma ambungu na ewoombo bla enguundu, we oya na anga owuha, ebuka, baari ma ali i mono ni, bla eleme.” 22Emana ŋa odzandzi oyi na aduha ndi: “E Nkumu, aso a we aduhi me emi sa, ŋa ebiri ekini.” 23Nkumu na odzandzi ndi: “Dziehe ma andzila ma anguunu, mpa bo okura bo aya, ove ndzo e me eluuli. 24Ŋa me eduha be o ntsa baari a me eki ema tsuolo, si omo aka adze odza biila e me ni.”»
Lemihi la oluono Zezi
25Lemvuuru le kuna leki lelaana bla Zezi, nde okalihi mpili e bo ndi: 26«Mvuuru aya na e me ove nde odii me. Ŋa dia le nde o me, ove levuli le ema taara a nde, nguhu a nde, okari a nde, baana a nde. Akulu bla barihi a nde, ankeri a nde, na lebihi le nde anku. Nde yuhu i sa vua ni, nde i buuna oka oluoni a me ni. 27Mvuuru abisa obira lembandzi#14.27 Kuri oma kaha le yalaha la ampasi na leku, o nkuumi e Zezi. le nde, oturi me, i buuna oka oluoni a me ni. 28O mpanihi e be dzua mvuuru asaha otua ndzo, nde i sa ka o ntsi, otali adoro ma omono yuhu nde abuuna omana yo ni na? 29Ma oduma nde yuhu omi baana otua, nde okuoni, baari aso ma aya omono yo asebi nde. 30Bo ma adze oduha ndi: “Lemono mvuuru ama baana otua ndzo, nde aka buuna omana ni!”
31Dzua nkani adze na adzuana eta bla nkani okima, i saa ka o ntsi ma omono yuhu nde abuuna bla okuumi aworo omo, odzuana na ali na ekuumi ma aworo dziele ni na? 32Nde omono ndi nde i buuna ni, nde otumi antuma o ntini e buha akini la, ma osaha oduusu. 33Ma osuumbu dzua, mvuuru o mpanihi e be abisa osuba biibi e nde eso kalihi, i buuna oka oluoni a me ni.»
Mpiye ongua
34«Ongua kiila ove, ŋa ongua oyele mpie we ovuura yo buni? 35Nde oya ove mo ntsie na ewuru kali, atuni nde o ndzi. Ali na atsui ma oyuha, oyuhi!»
Currently Selected:
Luc 14: MDT
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
