Like 14
14
Jesu asalaha obyeri o cuhu mawuumaha
1Cuhu mawuumaha mo, Jesu oyeni na aja biila mpili e nkʉmu Afarisi omo. Baari ma aki ŋa ma keese nde. 2Ŋa balaha mo eki na ngaa ebiimaha nyuru. Nde aki o vusu o Jesu. 3Jesu oyahi mbari, na ayisihi me ekele e Njyami bɨla Afarisi ndi: «Ma buuna osalaha obyeri o cuhu mawuumaha, si kali?» 4Bo aya pi. Ŋa Jesu oyahi obyeri, osalihi, onyili nde oyeni. 5Emana nde na bo ndi: «O mpaniŋi e be ali na mwana si kali ngoombo a nde ova nca terihi, abɨsa otusaha nde asisari o cuhu mawuumaha ni na?» 6Bo aka buuna oyalaha ni.
Jesu atiba baari ma oswoloho ebiri ma lembɨsa
7Jesu ama mono ndi baari ma jyaha ma acinda oswoloho ebiri ma levusu. Ŋa nde oti bo ncincami ndi: 8«Ntini e mvuuru atwolo we o cinda e baala, we kaa kaha levusu ni. Mo oma, leke onga cinda ama twolo mvuuru okɨmaavʉli we okiimi, 9ŋa ntini onga cinda acwoli be aso a vwele, oya na aduha na we ndi: “Yisa nde biri”, we ama temehe mo oje biri e mbɨsa ŋa na okʉru oso. 10Ŋa ntini ma twolo we o cinda, jyehe na aka obiri lembɨsa, onga cinda oma ya oduhi na we ndi: “E ndihi a me, jyaha na aka levusu.” O ŋa we omoni okiimi o mwa baari ma ali bɨla we o tanda. 11Obila, ntini e mvuuru akuusa nyuru nde anku, avuuri nde nci, ŋa mvuuru avuriha nci, akuusi nde.»
Jesu atiba mo ompa anga owuha
12Nde se oduhi na mvuuru atwoli nde ndi: «Ntini e we acwolo baari ma oja, ka atwoloho andihi na baana ma anguhu, na nkwono e we, na anga osolo ma ali o paani e we ni. Caaki bo se acwoli we na aja, bo avuuri we ma lemihi le we ampi bo. 13Ŋa ntini e we asa cinda, twolo anga owuha na ebuka, na eleme na baari ma ali i mono ni. 14Ŋa we aje omono ove obila bo kiila ma buuna ovuura we onyaŋa. Njyami aje ovuura we o cuhu akwi a tele ma aje onyusiha.»
Ncincami e cinda e nini
15Mvuuru omo aki o tanda oyuha vwa na Jesu ndi: «Ove oka na mvuuru aje oja biila nca Onkani o Njyami!» 16Jesu oti bo ncincami ji ndi: «Balaha mo ekusihi cinda e nini, ocwoli baari kuna. 17Ntini oja eto, otumi ojanji a nde na aduha baari a nde atwoli ndi: “Ŋa lejyaha ntini emi to.” 18Ŋa bo aso, omo na omo, apɨsi kolo kolo. A ncomi ndi: “Me kini ma osuuma nguunu, ove me yeni na amono yo. Boloho me.” 19Omo ndi: “Me kini ma osuuma angoombo kuumi, me eje na keese bo. Kolo kolo e we boloho me.” 20Okimandi: “Me kini esi baala, kya obila o me eli i buuna oya ni.” 21Ojanji oya na avuruha na e nkʉmu, oduhi nde maami maa aso a baari baa ma kaali. Ŋa nga njo obye nkala, na ojanji ndi: “Jyehe asisari ma ambungu na ewoombo bɨla enguundu, we oya na anga owuha, ebuka, baari ma ali i mono ni, bɨla eleme.” 22Emana ŋa ojanji oyi na aduha ndi: “E Nkʉmu, aso a we aduhi me emi sa, ŋa ebiri ekini.” 23Nkʉmu na ojanji ndi: “Jyehe ma anjila ma anguunu, mpa bo okʉra bo aya, ove njo e me eluuli. 24Ŋa me eduha be o nca baari a me eki ema cwolo, si omo aka aje oja biila e me ni.”»
Lemihi la olwono Jesu
25Lemvuuru le kuna leki lelaana bɨla Jesu, nde okalihi mpili e bo ndi: 26«Mvuuru aya na e me ove nde odii me. Ŋa dya le nde o me, ove levuli le ema taara a nde, nguhu a nde, okari a nde, baana a nde. Akulu bɨla barihi a nde, ankeri a nde, na lebihi le nde anku. Nde yuhu i sa vwa ni, nde i buuna oka olwoni a me ni. 27Mvuuru abɨsa obira lembanji#14.27 Kuri oma kaha le yalaha la ampasi na leku, o nkuumi e Jesu. le nde, oturi me, i buuna oka olwoni a me ni. 28O mpaniŋi e be jwa mvuuru asaha ocwa njo, nde i sa ka o nci, otali adoro ma omono yuhu nde abuuna omana yo ni na? 29Ma oduma nde yuhu omi baana ocwa, nde okwoni, baari aso ma aya omono yo asebi nde. 30Bo ma aje oduha ndi: “Lemono mvuuru ama baana ocwa njo, nde aka buuna omana ni!”
31Jwa nkani aje na ajwana eta bɨla nkani okɨma, i saa ka o nci ma omono yuhu nde abuuna bɨla okuumi aworo omo, ojwana na ali na ekuumi ma aworo jyele ni na? 32Nde omono ndi nde i buuna ni, nde otumi antuma o ntini e buha akini la, mo osaha oduusu. 33Mo osuumbu jwa, mvuuru o mpaniŋi e be abɨsa osuba biibi e nde eso kalihi, i buuna oka olwoni a me ni.»
Mpye ongwa
34«Ongwa kiila ove, ŋa ongwa oyele mpye we ovuura yo buni? 35Nde oya ove mo ncye na ewuru kali, atʉni nde o nji. Ali na acwi ma oyuha, oyuhi!»
Currently Selected:
Like 14: MDT
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
