Luc 11

Zezi ayisiha aluoni osuumbu ovuono

1Tsuhu mo, Zezi akihi avuono o biri mo ntu. Ntini e nde amani ovuono, oluoni a nde omo opisi nde ndi: «Nkumu, yisiha bisi osuumbu ma ovuono, mva e Zan ayisihi aluoni a nde.» 2Nde na bo ndi: «Ntini e be levuono. Be leduhi mbri:

Taara,

sa mbri baari aso ayaa ndi Nkuumi e we opeende,

na Onkumu o we oya.

3Mpa bisi biila e bisi leli na kaama,

etsuhu eso.

4Boloho ambiini a bisi

mva o bisi leboloho a baari ma biisa bisi,

ka nyiliha bisi ntsa etsimihi ma ebi ni.»

Ntsintsami e ndihi ali o ntsa kaama

5Zezi ovurihi oduhi bo ndi: «Mvuuru omo o mpanihi e be, abuuna obasaha ndihi, oyeni mpili e nde na mpiibi ma oduha nde ndi: “Ndihi a me, biha me mpeembe tari. 6Obila ndihi a me omo omi wa opiinga oli o ndzo, ŋa me kiila empa nde kali.” 7Ŋa na ntsa ndzo, buha okaali ndi: “Nyila me tuo! Me emi mana obiinda ndzo. Saa baana leli antolo. Me i buuna otemehe ma ompa we mpeembe ni.” 8Ŋa me eduha be mbri ndihi a nde atemehe, adze ompa nde eso e nde adia. Ka ma obila o nde ali ndihi e nde ni, ŋa mo nkomoho e nde. 9Ŋa me eduha be, be opisa ampi be, be osaha lebahi. Be okuruha ndzo, anaani. 10Obila, mpini mvuuru apisa obahi, asaha omoni, ŋa akuruha ndzo ma adze onaana. 11Dzua taara o mpanihi e be na, ali ntini e muana apisa ntsu nde ompi nde ntaari o biri e ntsu na? 12Si kali nde opisa bi na taara, taara ompi nde ngia na? 13Be baari ma abi, be leyaa ompa baana a be biibi ma eve, nkusa na Taara a be ali o yulu adze ompa Oduduma Santi na baari ma pisa na nde!»

Mpari e Zezi

14Zezi aki atsuura odidima obi oki na balaha eki nkina. Odidima otsuuhi, nde oya awobo. Lemvuuru leya ntsa lekimi. 15Baari ake ndi: «Nde atsuura ŋa o mpari e Belezibile nkumu edidima ma ebi. Ampaha nde onkumu ma otsuura dzo!» 16Maamo asahi olehe nde oyere, bo apisi nde ndiimi omaa ewa na yulu. 17Zezi aki oyaa etsimiŋi e bo, oduhi na bo ndi: «Ntini e baari ma dzuana eta o mpanihi e bo, ntsa osi, tso obii, andzo avi o yula abuha.» 18Be leduha mbri me etsuura edidima ma ebi o mpari e Belezibile. Ŋa yuhu Sata adzuana eta nde anku, osi o nde edze okaana buni? 19Ŋa yuhu me etsuuraha edidima ma ebi o mpari e Belezibile, ŋa baana a be se ma atsuuraha dzo o mpari e na? Dzia biri aluoni a be anku ma adze opama be! 20Yuhu Ndziami mvuuru ama mpa me mpari ma otsuura edidima ma ebi, o ŋa Onkumu o Nde omi ya mpili e be.

21«Ntini e balaha eli na mpari na andzasi ma okiele ndzo e nde, i buuna oyaha osolo a nde ni. 22Ŋa mvuuru avuli nde mpari oya, opiini nde andzasi a nde aki ama lehe tari o mo. Okabihi biibi e nde apiini na nde eso. 23Mvuuru ali ka bla me ni, na mbele e me. Ŋa mvuuru ali i yamaha me ma okusaha baari ni, atsala bo.»

Odidima obi omi ya na avuriha

24«Ntini odidima obi otsuuha o mvuuru, tso oyeni ntsa kayi, osahi biri owuuma. Ŋa tso obisa obasaha biri tso oduhi ndi: “Tata me vuriha ntsa ndzo e me etsuuhi o yo.” 25Ŋa nde ovurihi, nde okiriha obasihi yo ama kuomo, ama yeese. 26Nde oyeni na ayaha edidima ekema ntsaami, me evuli nde obi, dzo enyunihi, eya o ntsi. Ekihi e mvuuru dzua ma enyarihi evuli e kala obi.»

Zezi awobo o baari ma ali ntsa osuere

27Ntini e Zezi awobihi vua, okaasi omo ntsa lemvuuru oduhi nde na ankala ndi: «Osuere oka na okaasi abiri yimi e we, ompi we biele le nde!» 28Ŋa Zezi okaali ndi: «Osuere oka ni na baari ma yuha mbari e Ndziami na ma nyiimaha yo!»

Zezi akaala na baari ma pisa nde omaa

29Lemvuuru le kuna leyi ledzeniŋi Zezi, nde na bo ndi: «Baari a lobi abi, bo masaha ndiimi, ŋa omaa o baari ma adze omono oso ni o Zonase.#11.29 Zonase aki owobi a Ndziami atumi mpili asi Ninive. 30Ŋa ma osuumbu a Zonase aki ndiimi omaa ŋa asi Ninive, Muana Mvuuru se adze oka ndiimi o baari a lobi. 31Tsuhu opami Nkani okaasi a ma osi o mbere#11.31 Okaasi dzua aki Nkani osi o Saba, oki la na Isayele na mbere. adze otemeŋe obanaŋa baari a lobi, obila nde ama wa esi e la, ma oyuha ntsimi e mbari e Salomo. Ŋa ali kuuni ovuli Salomo! 32Tsuhu opami baari a Ninive ma adze otemehe ma obanaha ndzubu e lobi, obila bo ama yalaha mbari e Zonase atoosi, bo se ama kaala eku. Ŋa ali kuuni ovuli Zonase!»

Miisi mva baami e mbaa

33«Mvuuru i buuna onaasa baami e mbaa, odzisihi yo si kali olehi yo ntsina ndzuu ni. Nde obaŋa yo o biri e baari ma ali onyunuŋa amoni oyalala. 34Diisi le we baami e mbaa e nyuru. Ntini e diisi le we le eli yemiŋi, nyuru e we eso se eli ntsa oyalala. Ŋa yuhu lo le bi, nyuru e we se eli ntsa lempiibi. 35Ŋa sa ayiba! Oyalala eli o we i ma ka lempiibi ni. 36Ŋa yuhu nyuru e we eso eli ntsa oyalala, se lengulu lemo leli ntsa lempiibi onyaŋa, yo eka eso ntsa oyalala, mva ntini e baami e mbaa empaha we oyalala o yo.»

Zezi abanaŋa Afarizi bla ayisihi a mbari e Ndziami

37Ntini e Zezi awobihi, Ofarizi omo otuoli Zezi na adza o ndzo e nde. Zezi onyunihi, oya o tanda. 38Ofarizi okimi ma osuumbu a Zezi aka saa tsuka dziala#11.38 Ntini e bo ma dza biila, ove bo asa tsuka dziala na ntaami bla epele ma oka opeende. ntini e bo ma baani odza ni. 39Ŋa Nkumu oduhi na Ofarizi ndi: Be letsuka ngula akobo bla epele, ŋa ntsa etima e be, be ndzala kuba, bla maami obi. 40Be baari a ntsimi kali! Ndziami osi ngula ndzi, nde se aka sa ntsa kari ni? 41Lempa anga owuha biibi e be leli na dzo ntsa akobo bla epele, ŋa maami aso aka tse tse o be.

42«Ŋa ndoho eka na be Afarizi, obila be lempaha Ndziami buhu le okuumi le efuuma mva dzira#11.42 Jira mpili e bo ma Azife otuolo o maante. na efuuma ekima ma eli o suaha na ma anguunu a be. Ŋa be lebisi oka tele bla abuha, be i dia Ndziami ni. Kaa be lesi vua, ongula ŋa be i ma limaha maamo ni. 43Ŋa ndoho eka na be Afarizi! Be ndzala okaha o ntsi ma ebiri ma levusu ntsa andzo ma avuonoho. Be ndzala awosoho be ma ambuhu. 44Ŋa ndoho eka na be, be le eli mva amuuma ma ali i mono ni. Baari ma yira o yula mo i yaa ni!»

45Oyisihi a mbari e Ndziami omo na Zezi ndi: «E Nkumu, ntini e we awobo vua, we atuha bisi se!» 46Zezi okaali ndi: «Ndoho eka na be se ayisihi a mbari e Ndziami! Obila be leduha baari obira elemi e kuna, ŋa be anku i tiila bo se ma oliemi ni. 47Ndoho eka na be! Ma obila o be letuuŋa amuuma ma awobi a mbari e Ndziami, ni ma bumi bo ankaha a be! 48Ma osuumbu dzua be lesiisa enyua o maami ma ankaha a be ma asi. Ma oma bo ma buma awobi a mbari e Ndziami, ŋa be letua amuuma! 49Dzia biri e Ndziami o ntsa ntsimi e nde aduhi ndi: Me edze otuma bo awobi a mbari e Ndziami bla antuma. Bo ma adze obuma ake, asuesehe maamo. 50Ŋa ma adze opisa ndzubu e lobi dzi, tohi awobi a mbari e Ndziami etsoli ma asi baana osuumba osi. 51Ma obaana o tohi Abele, tii tohi e Zakari ma abumi ma lebuhu le ndzo e Ndziami, o mpaniŋi e nkiina bla nkuomo. Me eduha be Ndziami adze oliisa ndzubu e lobi o maami maa aso!

52Ndoho eka na be ayisihi a mbari e Ndziami! Ma obila o be lema biinda ndzila ma odze mpili e Ndziami. Be anku leka nyuniha ni. Be se lema kanaha baari ma dii onyunuha.»

53Ntini e Zezi atsuuhi o ndzo dzia, ayisihi ma angri bla Afarizi abiri nkala yo mini, alehi nde eduhu kuna. 54Bo ma lehe nde eyere, ma osaha ndi dzaa e mbi etsuuha ma onyua a nde.

Currently Selected:

Luc 11: MDT

Highlight

Copy