Ukumuga 6
6
1Fumu amatsingula Moise rie: Namapapa gulaba adi nyuvayila Pharaon; mangolu mami momutsotsa uwensa baIsrael, mangolu mami momutsotsa nesi ubabinga o bulongu buandi.
Fumu uvangana evangini na Moise uwaka baIsrael kalala
2Nsambi amamuevosa na Moise rie: Menu la Fumu! 3Nyimalelabana ombu Abraham nʼombu Isaac nʼombu Jacob na diina diNsambi Mangolu; tumba basamanjaba na diina diami diFumu. 4Nyimavangana pangini ami nogu wandi ubavega bulongu buCanaan, bulongu abu jogu bamatsaninanga nana balinsi. 5Menu ugulu nyigulu bibimu bibaIsrael, bibuviga abu bisi Egypte bebakelisi. Nyurungula ulibana pangini ami? 6Kabogu tsingula baIsrael rie: Menu la Fumu! Nyulengasana bisalu abi bisi Egypte bedutsoyisili, nyuduwaka kalala o buviga buogu. Na mangolu mami nyubakilisa na mukilu agulabana ava nyudujeyisila. 7Nyuduvaga batu bami, nyuba Nsambi enu. Mbana dujaba yiri menu Fumu nyivu Nsambi enu agumalengasana bisalu abi bisi Egypte bamadutsoyisila. 8Menu Fumu nyudukotisa o bulongu abu nyimavangana uvega ombu Abraham nʼombu Isaac nʼombu Jacob; menu Fumu nyuduvega bulongu abu nyimavangana uduvega.
9Anana Moise amayetsingulila baIsrael tumba basamamugulu mu diambu digoma na ditsoga dibuviga.
10Fumu amamuevosa na Moise rie: 11Wenda, yetsingula Pharaon, kaga jiEgypte, rie: Dunda baIsrael; bagusuyi o bulongu buagu.
12Moise amawagula Fumu rie: Lesa baIsrael bamabusa ukulu tambusa na Pharaon; menu aguvu na mbembu jirekama?
13Fumu amavosa na Moise na Aaron na amabavega maruma mu diambu dibaIsrael na diPharaon kaga jiEgypte. Amaruma rie: BaIsrael bagusuyi o Egypte.
Miina mabategula baMoise na Aaron
14Amama la miina mabasefu bamikuta miogu: baana bababaala baRuben, tsomi Jacob: Hanok na Pallou na Hesron na Karmi, amina la mikuta miRuben.
15Miina mabaana bababaala baSimeon amama: Yemouel na Yamin na Ohad na Yakin na Sohar; na Chaoul muana udibaala umuisi Canaan. Amina la mikuta miSimeon.
16Amama la miina mabaana bababaala baLevi nana bamaburulu: Guerchon na Quehat na Merari.
Yitsingu yiotsu yiLevi yimaba kama na magumarieru na yisambuali yibilima. 17Miina mabaana bababaala baGuerchon amama: Libni na Chimoi na mikuta miogu. 18Miina mabaana bababaala baQuehat amama: Amram na Issar na Hebron na Ouziel. Yitsingu yiotsu yiQuehat yimaba kama na magumarieru na bilima birieru. 19Miina mabaana bababaala baMerari amama: Mali na Mouchi. Amimi la mikuta miLevi na bategula bandi.
20Amram amawela Yokebed agumaba taji andi ketu, amamuburila Aaron na Moise. Yitsingu yiAmram yimaba kama na magumarieru na yisambuali yibilima.
21Miina mabaana bababaala balssar amama: Core na Nefeg na Zikri. 22Miina mabaana bababaala baOuziel amama: Michael na Elissafan na Sitri.
23Aaron amawela Elicheba muana mugetu uAmminadab yibusi yiNachon na amamuburila Nadab na Abihou na Elazar na Itamar.
24Miina mabaana bababaala baCore amama: Assir na Elcana na Abiassaf, amina la mikuta mibaana bababaala baCore.
25Elazar muana dibaala uAaron amawela muana mosi uPoutiel, amamuburila Pinhas. Amana la miina mabasefu babaana bababaala baLevi na mikuta miogu.
26La Aaron eni na Moise eni aba Fumu amaruma rie: Palisanu baIsrael o bulongu buEgypte muna mukuta mukuta. 27Jogu bamavosa na Pharaon, kaga jiEgypte rie: Palisa baIsrael o bulongu buEgypte. Tsiri basusu abamadivosa, Moise na Aaron.
Nsambi uwarisa ewarisi pangini andi na Moise
28Ava Fumu amavosila na Moise o bulongu buEgypte, 29amamutsingula rie: Menu la Fumu, tsingula Pharaon, kaga jiEgypte motsu ama nyugutsingula.
30Moise amawagula Fumu rie: Aa! Nyina mbembu jirekama. Yika tsie Pharaon okululu?
Currently Selected:
Ukumuga 6: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
