Ukumuga 5

Moise na Aaron va gusu Pharaon

1Motsu mana manosuka, Moise na Aaron bamawenda ombu Pharaon, bamamutsingula rie: Fumu Nsambi Israel jandi rie: Dunda batu bami, bawendingi yiri boyevaga feta jiukitsila o kumu. 2Pharaon amabawivula rie: Anyi avu Fumu yiri nyudedila diufi diandi nowensa baIsrael? Ngejabi Fumu, ngoduwensa!

3Moise na Aaron bamavosa rie: Nsambi baHebreu aguvu Fumu etu amalabana netu. Kabogu tusingisi ubonga bilumbu birieru biuwendila o kumu, uyemuvagulila pagu yiri agotuboka na yivunga vo dijenga. 4Kaga jiEgypte amawivula Moise na Aaron rie: Dibandu yi duigubitsili baIsrael usala bisalu biogu? Wendanu o bisalu bienu! 5Pharaon amabuesa rie: Dugelabi yiri batu bebaba bamafuna tindi ufuna ne nana dubagubitsa usala bisalu biogu?

Pharaon amarangisa bisalu bibaIsrael

6Muna yilumbu yieni Pharaon amavega diruma diedidi ombu bivunda bibisalu nʼombu bafumu babisalu rie: 7Duyamuevega bisinga nana va kala ombu baIsrael uvayila birika; bawendingi joʼ beni uyenakerombila bisinga. 8Dukabatsoyisa na dutalu dubirika nana adu bamadimbanga va kala, duyadiamisa dutalu; jogu bavu batsoritsi; la dibandu bevosili rie: Tʼwendianu uyevagulila Nsambi etu pagu! 9Tubakambisianu nabisalu bipuela; mbana baIsrael bagomuekipa mfurulu tsiMoise na Aaron.

10Bivunda bibisalu na bafumu babisalu bamatsingula batu rie: Pharaon jandi rie: Ngomueduvega bisinga! 11Wendanu jenu beni uyenaromba bisinga guna dudilila! Ngodudiamisila ne udiamisa dutalu dubirika.

12BaIsrael bamapansiga o bulongu buotsu buEgypte, uyenaromba bisinga. 13Bivunda bibisalu bamabasukanga novosa rie: Dumananga dutalu duyilimbu na yilumbu nana ava dumavegulungu bisinga. 14Bivunda bibisalu biPharaon bamadimba bafumu babisalu baIsrael, bamabawivulanga rie: Dibandu yi dugaamaninanga dutalu dumasiga na dunamunyi udugusu birika nana na kala?

15Bafumu babisalu babaIsrael bamawenda uyetatila Pharaon nomuwivula rie: Dibandu yi gukatutsoyisila nana? 16Diuleba bagemuetuvega bisinga, beturumi rie: Dimbanu birika! Va julu vana, betudimbi, nderi tuvu na mbela. 17Pharaon amabawaka rie: Jenu batsoritsi na batsoritsi duvu! La dibandu duivosili rie: Tʼwendianu o uvagulila Fumu etu pagu. 18Tsie wendianu o usala! Bagomueduvega bisinga ne nana vengu dudugusu dutalu dubirika nana na kala.

19Bafumu babisalu babaIsrael bamalaba yiri diambu dimaranga, mu mbari bivunda bibisalu biPharaon bamaruma rie: Dugodiamusulu dutalu dubirika duyilumbu na yilubu! 20Ava bamapalila o ndagu Pharaon, bamabenguna na Moise na Aaron abamabavivanga. 21Bamatsingula Moise na Aaron rie: Fumu jaʼ beni adugengili na aduveyi mbela! Dumaturombisa uvinu na Pharaon na basalitsi bandi, dumabawakisa majenga utubokila.

22Moise amagabuga ombu Fumu, amamuwivula rie: Fumu, dibandu yi gumavayila batu bebaba dibi? Dibandu yi gumansindiyila gunu? 23Yiotsu ayi nyimawendila ombu Pharaon novosa nandi mu diina diagu, evayi baIsrael dibi, gugaabawaka kalala ne pesu!

Currently Selected:

Ukumuga 5: PUU1992

Highlight

Copy