Ukumuga 4

Nsambi ulasa elasi mangolu mandi

1Moise amagabusila Fumu rie: Kokolu, baIsrael bagopayila yitu na bagokululu. Tumba bovosa rie: Fumu asamalabana nagu ne temu mosi. 2Fumu amamuwivula rie: Yi yivu va dikaka diagu? Moise amawagula rie: Nguangu. 3Fumu amamuruma rie: Jibuayi va tsi. Moise amajibuaga va tsi, na jimakaluga nyoga. Moise amajirina. 4Tumba Fumu amaruma Moise rie: Simbula gogu, jigaangi va pilibinsi.

Moise amasimbula gogu na amajigaanga: nyoga jimamuekaluga nguangu va dikaka diandi. 5Fumu amamutsingula rie: Adina diulasa baIsrael yiri nyimalabana nagu, menu Nsambi bataji bogu, Nsanjbi Abraham na Nsambi Isaac na Nsambi Jacob. Mbana boguvayila yitu. 6Fumu amamuemuruma rie: Soma dikaka diagu o tsi yikutu.

Moise amasoma dikaka diandi o tsi yikutu; mbana amadigusula na laba dikaka diandi dimakaluga muambalolu dibungana na nyambi. 7Fumu amaruma Moise rie: Muesoma dikaka diagu o tsi yikutu yiagu.

Moise amagabusa dikaka diandi o tsi yikutu yiandi, dimamuegabuga nana dimabila va kala. 8Fumu amabuesa rie: Pa baIsrael bageguvayili yitu na pa bagededili diufi diagu ava belabili yimaga yitega boguvayila yitu ava belabili ayimubeji. 9Pa bagevayili nesi bimaga bieni yitu na pa bageguvayili yitu, gukabonga mamba mamujamba uNil, gukamapuga va tsi na mamba ama gubongila mu mujamba mokituga malungu va butamba.

Nsambi usola esoli Aaron uwamusa Moise

10Moise amatsingula Nsambi rie: Aa! Fumu! Nyina mbembu jirekama, jigaabanda masiga vo nsimasiga, vo ne ava gumabandila uvosa nami; mu mbari nyina waʼ na munu, tumba utsikadana nyitsikidini.

11Fumu amamuwivula rie: Anyi amavaga munu mutu? Anyi evayi mutu dibaba vo madiba? Anyi evayi mutu yidunga vo ulaba? Tsia Menu Fumu? 12Kabogu, wenda. Nyuba nagu na nyugulonsa ama guvosa. 13Moise amalenda Fumu rie: Kokolu, sindiga mutu ususu!

14Mbana Fumu amanyoyila Moise, amamuwivula rie: Aaron aguvu muisi Levi agaa muana nguji agu? Nyijabi yiri jandi evosingi na dupasu. Jaʼ beni uruga eruyi ugubengusana; ava ogulabila obasa na nsangu jineni. 15Ndeju gumutsingula ama guronda uvosa; menu nyuba nagu na nyuba nandi wandi, nyudulonsa motsu amaduvaga. 16Jandi oguvosila ombu batu; jandi oba nderi munu agu, ndeju guba nderi Nsambi ombu gandi. 17Va julu vana bonga nguangu agu, gukajisalisa uvaga bimaga.

Moise ugabuga egabuyi o Egypte ombu batu bandi

18Moise amalewenda ombu boji buandi Jethro, amamulenda rie: Kokolu, lensingisa uwenda ombu baana bataji bami abavu o Egypte, nyirondi uyebalaba yeri bakivu monyu. Jethro amatsingula Moise rie: Wenda na buranga. Mbana Moise amayenawenda.

19Fumu amaruma Moise ava amabila o Madian rie: Gabuga o Egypte mu mbari botsu aba mbe bamaguboka bamafu.

20Kabogu Moise amabonga mugatsi andi na baana bandi bababaala, amabanangiga mu baburu, mbana bamayenagabuga o Egypte. Amabonga nguangu aji Nsambi amamuruma ubonga. 21Fumu amatsingula Moise rie: Nyimagulonsa uvaga bimaga biminongu na minongu. Ava guigabuyili o Egypte, gukabivaga va gusu Pharaon. Menu nyugalisa murima andi na agowensa baIsrael. 22Gukatsingula Pharaon rie: Fumu jandi rie: Israel avu muana ami udibaala, tsomi ami. 23Nyigurumi rie: Dunda muana ami, awendingi yiri onsalila; gulu, pa guibusi umudunda, nyubokisa muana agu udibaala agutsomi.

24Ava Moise amabila mu nsila va mbura aji amasilimina, Fumu amamutumuna na amaronda umubokisa. 25Sefora amabonga dimanyi adimaba mengu, utabula musosu umuana andi, amagubuaga va makulu maMoise ava amavosila rie: Ndeju guvu mulumi ami umalungu! 26Mbana Fumu amamudunda. Mu diambu didurebu Sefora amamuluga rie: Mulumi umalungu!

27Fumu amaruma Aaron rie: Rela o kumu uyebenguna na Moise.

Aaron amawenda; amabenguna na Moise o mukongu uNsambi, bamabumbasana. 28Moise amajabisa Aaron mambu motsu maFumu na amamulonsa bimaga abi amamuruma uvaga. 29Mbana Moise na Aaron bamayenawenda, bamagukiga bivunda biotsu biIsrael. 30Aaron amavosa mambu motsu ama Nsambi amatsingula Moise, Moise amalasa batu botsu bimaga. 31Batu bamabavayila yitu. Bamagudama va tsi uyitsa Fumu mu mbari amalingula baIsrael na amalaba maguga mogu.

Currently Selected:

Ukumuga 4: PUU1992

Highlight

Copy