Ukumuga 3

1Moise amakelisanga bindombu na binsabi biboji buandi Jethro, agumaba muvagulitsi upagu uMadian. Yilumbu yimosi amabega migamba o yiari yina yikumu, amatola o mukongu uNsambi o Horeb. 2Avana yiansa yiFumu yimalabinina nandi mu mulutsu muji agumalula mu yivala. Moise amalaba yivala yiotsu yika muji na muji, tumba yisamasiegalana. 3Moise anolaba yimaga yieni amatsiengila yivala mbana amakewivula rie: Dibandu yi yivala yigenyengili? 4Fumu anolaba yiri Moise utsiengila etsiengili yivala, amamunengila o gari yivala rie: Moise! Moise! Amawagula rie: Meʼ janduʼgu! 5Fumu amavosa rie: Guyabambana gunu, vula bapondu bagu! Avana guvu la mbura yingitsi. 6Mbana amabuela rie: Menu la Nsambi bataji bagu: Nsambi Abraham na Nsambi Isaac na Nsambi Jacob.

Moise amakubiga yinsi mu mbari amalaba goma ugengila Nsambi. 7Fumu amavosa rie: Nyimalaba dikuana dibatu bami abavu o Egypte, nyimagulu migamu mibaIsrael ava bango bukisi bebadimbuli. Nyiina, nyilabi maguga mogu. 8Nyimasunduga ubawaka kalala ombu bisi Egypte, nobapalisa o bulongu bueni ubabega o bulongu abuboti na buneni, abuvu na digumba, o malongu ama bisi Canaan na baHitt na baAmor na baPerizie na baHivie na baJebusie betsanini. 9Meʼ rie: Migamu mibaIsrael mimagulunu te nʼombu gami na nyimalaba dikuana adi bisi Egypte bebakuani, 10Namunyi nyigusindiyi ombu Pharaon. Wenda yepalisa batu bami, baIsrael o Egypte. Nsambi ujabisa ejabisi Moise diina diandi.

11Moise amawivula Nsambi rie: Je menu nyivu uwelimina uwenda ombu Pharaon uyepalisa baIsrael o Egypte? 12Nsambi amavosa rie: Nyiina! Nyuba nagu; adina diugulasa yiri menu nyigusindiyi: disusu gunomana upalisa baIsrael o Egypte, dusalila Nsambi va julu mukongu egugu. 13Moise amagabusila Nsambi rie: Kabogu yika ombu baIsrael nyiwendi, nyubatsingula rie: Nsambi bataji benu atsinsindiga ombu genu. Tumba pa bokwivula rie: Diina diandi yi? Diina yi nyubatsingula?

14Nsambi amawagula Moise rie: Menu la Jandi Ojivu! Mbana amabuela rie: Anana guwagulila baIsrael rie: Jandi oyinengulu Menu Nyivu amansindiga ombu genu. 15Nsambi amamuetsingula Moise rie: Gukatsingula baIsrael nana rie: Fumu amansindiga ombu genu aguvu Nsambi bataji benu: Nsambi Abraham na Nsambi Isaac na Nsambi Jacob. Adina la diina diami, la diina adi bonsambililanga te na kula tsiotsu. 16Wenda yegukiga bivunda biIsrael, nobatsingula rie: Fumu aguvu Nsambi bataji benu, Nsambi Abraham na Nsambi Isaac na Nsambi Jacob amalabana nami. Amavosa rie: Nyimadulaba, nyimalaba ama beduvayi o Egypte, 17amavosa rie: Nyudugusula o Egypte agu duilabili maguga, udubega o malongu ama bisi Canaan, na baHitt na baAmor na baPerizie na baHivie na baJebusie betsanini, malongu amavu na digumba. 18BaIsrael bodedila diufi diagu. Jenu na bivunda biIsrael dukawenda ombu kaga jiEgypte, dukamutsingula rie: Fumu aguvu Nsambi baHebreu, aguvu Nsambi etu amalabana netu. Tusingisi ubonga bilumbu birieru biuwendila o kumu, uyevagulila Fumu Nsambi etu pagu tsiunyensa. 19Nyijabi yiri kaga jiEgypte agodusingisa uwenda, te na mangolu mosalusu. 20La dibandu nyusalisila mangolu mami ulasa bisi Egypte minongu na minongu mibimaga abi nyuvaga va gari ogu. Va julu vana odusingisa uwenda. 21Nyusalisa maboti mabisi Egypte yiri ava duwendila, dugowenda miogu na miogu. 22Kadi mugetu uIsrael owivula mugetu nandi umuisi Egypte bima bilora jivema na bima bilora na biduaru abi duduisa baana benu bababaala na babagetu. Anana dukindila bisi Egypte.

Currently Selected:

Ukumuga 3: PUU1992

Highlight

Copy