Ukumuga 2

Duburu na bungebi buMoise

1Muisi Levi amawela muana mugetu uyifumba yiLevi. 2Mugetu eni amadila dimi na amabura muana dibaala. Amalaba yiri umaba uboti, amamusuega te na tsungi yirieru. 3Anojaba yiri agomuerungula umusuega kabogu amabonga tsansi aji amasinga bituma na maka; amapodula muana muna nomudibiga, amajiputiga o mamba va gari bilelenga va mugula umujamba Nil. 4Yibusi yimuana eni amasuema mua vala, ukelisa muana.

5Muana mugetu uPharaon amawenda o Nil na bambatsi bandi uyebuila, bamayenalinganga va mugula mujamba. Jandi amalabilila tsansi va gari bilelenga, amasindiga musalitsi andi umugetu uyejibonga. 6Anodibula tsansi, amalaba muana dibaala agumalilanga. Amalaba yingeba, amagamuga rie: Kayia! Muana ubaHebreu!

7Mbana yibusi yimuana eni amawivula muana mugetu uPharaon rie: Tsie nyiyegurombila mubusi va gari bagetu baHebreu umunuisa? 8Muana mugetu uPharaon amamuwagula rie: Diwelimina. Muana eni umugetu amayelanda tindi nguji muana. 9Muana mugetu uPharaon amamutsingula rie: Yenduisila muana egugu; nyugufuta. Nguji muana amamubonga, amayemunuisa.

10Muana anobanguga, nguji andi amamubega ombu muana mugetu uPharaon, agumamukelisa tindi muana andi. Amamuluga Moise, mu mbari amavosa yiri nyimamupalisa o mamba.

Moise urina erini o bulongu buMadian

11Yilumbu yimosi, Moise anobanguga, amayenalinganga o yiari ayi baIsrael bamatsaninanga, amalaba bisalu biogu biranga. Amalaba muisi Egypte agumadimbanga muisi Hebreu umosi ubaana bataji bandi. 12Moise amagengila yiari na yiari, asamalaba mutu ususu kabogu amaboka muisi Egypte na amafundiga mfumbi mu yisieyi. 13Amamuelinga yilumbu yisusu; amalaba baHebreu babeji utsunda betsundi. Amawivula jandi omaba na mbela rie: Mu mbari yi guidimbili mutu nagu? 14Dibaala dieni amamugabusila rie: Anyi amaguvaga yivunda na nsonsi va gari etu? Guirondi umboka nana gumabokila muisi Egypte?

Moise amalaba goma na amavosa rie: Kabogu diambu dimajabunu. 15Pharaon amadijaba, amarombanga ubokisa Moise. Tumba Moise amarina Pharaon, amayesuema o bulongu buMadian, amatsana guna va mugula yiduna yimamba.

16Muvagulitsi upagu, muisi Madian amaba na yisambuali yibaana babagetu abamawenda uyetega mamba; bamabasa bitegulu unuisa mugamba utaji ogu. 17Mbana babungulitsi babindombu bamabarasuna na bamababinga. Kabogu Moise amabawaka kalala, jaʼ beni amanuisa mugamba ogu. 18Ava bamagabuyila ombu taji ogu Jethro, amabawivula rie: Tsie divu yiri namunyi dugaatsinga? 19Bamamugabusila rie: Muisi Egypte atsituwaka kalala ombu babungulitsi babindombu na atsituteyila mamba, atsinuisa mugamba. 20Jandi amawivula baana bandi babagetu rie: Aguʼ avu? Dibandu yi dutsisilila dibaala dieni? Munengilianu uyitsoka murima.

21Moise amatabula diambu utsana na dibaala dieni, omamuwetsa na muana andi Sefora. 22Amabura muana dibaala agu Moise amaluga Guerchom, divindugulu rie: nyitsani o bulongu bungana.

Nsambi usola esoli Moise uwaka baIsrael kalala

23Yitsingu yineni yinovioga, kaga jiEgypte amafu, baIsrael ubima mbe bakibima o buviga; migamu miogu mibuviga mimagulunu te nʼombu Nsambi. 24Nsambi amagulu bibimu biogu, amakipanga pangini andi na Abraham na Isaac na Jacob. 25Nsambi amalaba buviga bubaIsrael na amabalaba yingeba.

Currently Selected:

Ukumuga 2: PUU1992

Highlight

Copy