Ukumuga 1
1
NSAMBI UPALISA EPALISI BAISRAEL O EGYPTE
Buviga bubaIsrael o Egypte
1Guluanu miina mabaIsrael, abamawenda na taji ogu Jacob o Egypte, na mukuta umutu mutu: 2Ruben na Simeon na Levi na Juda, 3Issakar na Zabulon na Benjamin 4Dan na Neftali na Gad na Asser. 5Dutalu duotsu dumukuta uJacob dumaba magumidusambuali. Joseph amarela o Egypte. 6Bilima bipuela binovioga Joseph amafu na baana bataji bandi botsu te na dukula dueni duotsu wandi. 7BaIsrael bamaburasana na bamafuna, bamabanguga na bamabanganga na mangolu maneni. Bamabasa bulongu de.
8Kaga jisusu amavinga uruma o Egypte ajisamalejaba Joseph. 9Amatsingula batu bandi rie: Labatianu baIsrael bamafuna puela na bana mangolu uviolila jetu. 10Tsie tubakambisianu; tubagubitsianu ufuna mu mbari pa voruga divita, bakefubana na bavinitsi betu ututoyisa, va julu vana bakegusuga mu bulongu buetu.
11Bisi Egypte bamabavega bivunda bibisalu, abimabakuananga na bisalu biranga. Anana baIsrael bamarungila misiengi miPitom na Ramses, amimabanganga bisuegulu biPharaon. 12Diuleba bamabakuananga, bamafuna uviolila na bamabasa biari biotsu; la dibandu baIsrael bamalabulu goma. 13Mbana bisi Egypte bamatsoyisa baIsrael tindi utsoyisa nobakotisa o buviga. 14Bamabalasa maguga na bisalu biranga: bidiga na bibirika na bisalu biotsu bimusiru. Bamabatsotsa bisalu bieni biotsu na bukisi.
Pharaon ukuana ekuani baIsrael
15Va julu vana, kaga jiEgypte amavega diruma ombu baburisitsi abamaburisanga baHebreu, umosi diina diandi Chifra, na ususu diina diandi Poua. 16Amabaruma rie: Ava duburisila bagetu baHebreu, pa uvu muana dibaala, mubokianu; pa uvu muana mugetu duyamuboka.
17Tumba baburisitsi bamaduma Nsambi, basamadedila adi kaga jiEgypte amabaruma; basamabokisa baana bababaala. 18Kabogu kaga jiEgypte amanengila baburisitsi, amabawivula rie: Dibandu yi dutsivayila nana? Dibandu yi dugaabokisila baana bababaala? 19Baburisitsi bamawagula Pharaon rie: Mu mbari bagetu baHebreu bagaa nana bagetu baEgypte; jogu bana mangolu, yiotsu ayi muburisitsi etolili bekeburila.
20La dibandu baIsrael bamaviolila ufuna. Va julu vana Nsambi amawamusanga baburisitsi; 21amabafunisila bategula mu mbari bamadedila Nsambi. 22Mbana Pharaon amaruma diruma diedidi ombu batu bandi botsu rie: Muana uotsu udibaala uHebreu dukabuaga o mujamba uNil, yika baana babagetu dukelisa.
Currently Selected:
Ukumuga 1: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
