Ukumuga 7

1Kabogu Fumu amatsingula Moise rie: Gulu nyiguveyi musuga uNsambi ombu Pharaon na muana nguji agu Aaron oba munu agu. 2Gukatsingula muana nguji agu motsu ama nyuguruma; jandi ovosa na Pharaon rie: Dunda baIsrael, bagusuyi o bulongu buagu. 3Nyugalisa murima uPharaon; diuleba nyufunisa bimaga biami o bulongu buEgypte, 4Pharaon agogaru. Kabogu nyulasa bisi Egypte mangolu mami ava nyubakilisila, mbana nyupalisa batu bami baIsrael o bulongu buEgypte muna mukuta mukuta. 5Bisi Egypte bojaba yiri nyiji Fumu ava nyubalasila mangolu mami, mbana nyupalisa baIsrael o Egypte.

6Moise na Aaron bamavaga adi Fumu amabaruma. 7Bilima biMoise bimaba magumidunana na bilima biAaron bimaba magumidunana na bilima birieru ava bamalevosila na Pharaon.

Pharaon ubusa ebusi ugulu Moise na Aaron

8Fumu amatsingula Moise na Aaron rie: 9Pa Pharaon ovosa nenu rie: Vaganu yimaga! Gukatsingula Aaron rie: Bonga nguangu agu nojibuaga va gusu Pharaon. Jiukaluga nyoga.

10Moise na Aaron bamawenda ombu Pharaon na bamavaga adi Fumu amabaruma, Aaron amabuaga nguangu andi va gusu Pharaon na va gusu basalitsi bandi; jionyi jimakaluga nyoga. 11Tumba Pharaon amanengila batu badiela na bavanditsi na banganga baEgypte abamavaga munongu mosi na bingana biogu. 12Jogu botsu bamabuaga manguangu mogu. 13Ne nana Pharaon amagalisa murima na asamagulu mambu maMoise na Aaron dedi mosi nana Fumu amabalubusila. Yivunga ayitega: Mamba mamakaluga malungu.

14Fumu amatsingula Moise rie: Pharaon amagalisa murima, ubusa ebusi uwensa baIsrael. 15Kabogu kedi gukawenda ombu Pharaon; ava owendila o mujamba uNil, gulabana nandi na gubonga nguangu eni ajimakaluga nyoga, 16mbana gukatsingula Pharaon rie: Fumu Nsambi jibaHebreu amansindiga ombu gagu ugutsingula rie: Dunda batu bami yiri jogu bonsalila o kumu. Te na temu ejiji gukagulu? 17Fumu amabuesa rie: Mbana gujaba yiri nyiji Fumu. Nyimaruma Moise udimba mamba maNil na nguangu ajivu va dikaka diandi, mamba meni mokaluga malungu. 18Nyama tsimamba tsiufu, mujamba ubiva te na bisi Egypte bagorungula unuanganga mamba meni.

19Fumu amamuevosa na Moise rie: Ruma Aaron rie: Bonga nguangu agu na samba gogu agu mu mamba maEgypte: mu mijamba miogu mineni na migeyi na mu manga na mu matanga mamamba. Diwendi rie: Mamba motsu mokaluga malungu; voba malungu o biari biotsu biEgypte nesi te no gari tsibisanga biminongu na minongu.

20Moise na Aaron bamavaga adi Fumu amabaruma. Aaron amabonga nguangu na amadimba mamba maNil va gusu Pharaon na basalitsi bandi; mujamba uotsu umakaluga yika malungu na malungu. 21Nyama tsimamba tsimafu, mujamba uotsu umabiva, te na bisi Egypte basamamuerungula unu mamba mamujamba. Vamaba malungu o biari biotsu biEgypte.

22Tumba banganga baEgypte bamavaga munongu mosi na bingana biogu. Pharaon amagalisa murima, asamagulu mambu maMoise na Aaron dedi mosi nana Fumu amabalubusila. 23Pharaon amayenagabuga o ndagu andi; asamakipa ne ukipa mambu memama. 24Bisi Egypte bamayenatimanga biduna va migula miNil udila mamba monu; mu mbari basamamuerungula unu mamba mamujamba.

25Yiotsu ayi Fumu amalasa yivunga yimamba maNil yisambuali yibilumbu bimavioga.

Yivunga ayimubeji: Milansa

26Mbana Fumu amaruma Moise rie: Wenda ombu Pharaon, gukamutsingula rie: Fumu erumi rie: Dunda batu bami yiri bonsalila. 27Pa guibusi ubadunda, nyubasa bulongu buagu buotsu yika milansa na milansa. 28Mujamba ufunisa milansa; miubasa de na miukota te no ndagu agu, te no yibuku yiagu yindagu nesi te no tangi agu te no mandagu mabasalitsi bagu na mabatu bagu nesi te no furu tsiogu te no gari tsibidu biagu. 29Milansa miugumata nesi na batu bagu wandi.

Currently Selected:

Ukumuga 7: PUU1992

Highlight

Copy