Ukumuga 8

1Fumu amatsingula Moise rie: Ruma Aaron rie: Samba gogu agu na nguangu agu mu mijamba mineni nesi migeyi, na mu manga nobasa milansa o bulongu buotsu buEgypte.

2Aaron amasamba dikaka diandi mu mamba motsu maEgypte; milansa mimamata na mimabasa bulongu buEgypte. 3Tumba banganga baEgypte bamavaga munongu mosi na bingana biogu. Bamabasisa milansa o bulongu buEgypte. 4Pharaon amanengila Moise na Aaron na amavosa rie: Sambilanu Fumu yiri okakasana milansa nami na batu bami; mbana nyuwensa baIsrael uyevagulila Fumu ogu pagu.

5Moise amatsingula Pharaon rie: Ndeʼ beni gukansingula temu aji guirondi yiri nyusambila Fumu mu diambu diagu na dibasahtsi bagu na dibatu bagu yiri okakasana milansa vala nagu na mandagu magu, miusiala yika o Nil. 6Pharaon amawagula rie: Mugesa. Moise amavosa rie: Anana diubila mbana gujaba rie: Vagaa mutu ne umosi aguibagunu na Fumu Nsambi etu. 7Milansa miukakana nagu na mandagu magu wandi na basalitsi bagu na batu bagu; miusiala yika o Nil.

8Moise na Aaron bamapala o ndagu Pharaon. Mbana Moise amatatila Fumu mu diambu dimilansa amimakambisa Pharaon. 9Fumu amavaga adi Moise amamuwivula; milansa amimaba o mandagu no ndombili no manungi mimafu. 10Bamamigukiga maguki mapuela mapuela na bulongu buotsu bumaba yika mbunga na mbunga jibi.

11Pharaon anolaba mukilu eni amamuegalisa murima andi na asamagulu mambu maMoise na Aaron nana Fumu amabalubusila.

Yivunga ayimurieru: Batsina

12Fumu amatsingula Moise rie: Ruma Aaron rie: Bonga nguangu agu, dimba difufundu, diukaluga batsina o bulongu buotsu buEgypte.

13Moise na Aaron bamadivaga. Aaron amasamba gogu andi na amadimba difufundu nguangu andi; dionyi dimakaluga batsina abimagaka nesi batu nesi bibulu. Difufundu dimakaluga batsina o bulongu buotsu buEgypte. 14Diuleba banganga baEgypte bamasalisa bingana biogu basamarungula uvaga yimaga yibatsina. Batsina bamagakanga nesi batu nesi bibulu. 15Banganga bamatsingula Pharaon rie: Dionyi diruyili ombu Nsambi!

Pharaon amagalisa murima andi, asamagulu mambu maMoise na Aaron nana Fumu amabalubusila.

Yivunga ayimuina: Biragala

16Fumu amatsingula Moise rie: Rambuga kedi jineni uyelabana na Pharaon, ava owendila o mujamba. Gukamuruma rie: Fumu jandi rie: Dunda batu bami yiri bonsalila. 17Pa gugodunda batu bami, nyutinda biragala ombu gagu; mandagu mabisi Egypte mobasa de na biragala, na butamba buotsu buba yika biragala na biragala. 18Tumba muna yilumbu yieni yiari yiGochen yigoba muna ayi batu bami betsanini, aguna ugolabana ne yiragala yimosi; mbana gujaba yiri menu Fumu oyitsani nogu o bulongu buebubu. 19Nyuvaga duviakusunu va gari batu bami na batu bagu. Mugesa yimaga yiulabana. 20Fumu amavaga nana amavosila; dibumba dibiragala dimabasa ndagu Pharaon na mandagu mabasalitsi bandi, na bulongu buotsu buEgypte bumakutu na biragala. 21Pharaon amanengila Moise na Aaron, amabaruma rie: Wendanu yevagulilanu Nsambi enu pagu o bulongu buebubu. 22Moise amawagula rie: Digaa diwelimina uvaga nana mu mbari tuvagulila Fumu Nsambi etu pagu, tsionyi tsiuba nsoruru ombu bisi Egypte. Yika tsie pa tuvagulila pagu atsiuba nsoruru ombu bisi Egypte, jogu bagotutindila mamanyi? 23Tuvaga bilumbu birieru biuwendila o kumu, tuvagulila Fumu Nsambi etu pagu, nana Fumu otutsingulila. 24Pharaon amavosa rie: Nyudusingisa uwenda uyevagulila Fumu Nsambi enu pagu o kumu; dimosi buandi duyaweʼ vala na nsambililianu wandi.

25Moise amawagula rie: Nyulepala o ndagu agu mbana nyusambila Fumu. Mugesa biragala biugusuga ombu Pharaon nʼombu basalitsi bandi. Dimosi buandi Pharaon ayatudunsa; awensi baIsrael uyevagulila Fumu pagu.

26Moise anopala o ndagu Pharaon amasambila Fumu. 27Fumu amavaga adi Moise amamuwivula; biragala bimagusulu ombu Pharaon nʼombu basalitsi bandi nʼombu batu bandi, vasamasiala ne yimosi. 28Ne nana Pharaon amamuegalisa murima andi, asamawensa baIsrael.

Currently Selected:

Ukumuga 8: PUU1992

Highlight

Copy