Migaga Mimatubula 8

Fumu ulonsi elonsi baIsrael o kumu

1Dukelisanga na dukipanga migaga miotsu ami nyiduveyi namunyi yiri dukefu, mbana dufuna na dudila bulongu abu Fumu amavangana uvega ombu bataji benu; abuba abuenu. 2Rangiminanu nsila jiotsu aji Fumu Nsambi enu amaduruma uvioyila o kumu te na magumana mabilima uduvongula noduweliga ujaba mirima mienu, nolaba yeri dudedila vo dugodedila migaga miandi. 3Nyiina, amaduvongula; amadusingisa ugulu nsala mbana amadulisila manna meni ama jenu dusamalejabanga, ama bataji benu basamajaba wandi, dimalabana udulonsa yiri mutu agedilili monyu na biguji buandi, tumba egudilili na motsu amepalili mu munu uFumu. 4Biduaru bienu bisamafu na makulu menu masamaranda te na magumana meni motsu mabilima. 5Rangiminanu yiri Fumu Nsambi enu edukilisi nana mutu ekilisili muana andi. 6Dukelisanga migaga miFumu Nsambi enu, dudedila duganu duandi na dumudumanga.

Mbongulu tsibulongu bupangini

7Fumu Nsambi enu odukotisa o bulongu buboti, bulongu abuvu na bivela na bileka na biliba abivuvingi o bibususu no mikongu. 8Bulongu abuvu na ble na orsa na mirayisan na mifiga na migeranada na mioliva nesi buji. 9Bulongu abu dujanga biguji ne uviolila na dugogambu na yima: bulongu abu mamanyi mavu madilu na o julu tsimikongu dupakilanga kunga. 10Ava dujangilanga nogukurungu dugabusilanga Fumu Nsambi diboti mu diambu dibulongu buboti abu oduvega.

11Kebananu, duyalibana Fumu Nsambi enu nobusa ukelisa maruma mandi na malongi mandi na migaga miandi abi nyiduveyi namunyi. 12Ava dujangilanga nogukurungu, ava durungilanga notsananga mu mandagu maboti 13ava dulabila bangombi benu na bindombu bienu na binsabi bienu na lora enu jivema na lora bifuningi wandi na biotsu abivu nenu bifuningi, 14kebananu yiri dugoba na dunangu na yiri dugolibana Fumu Nsambi enu agumadupalisa o buviga buEgypte. 15Jandi agumaduwendisa o kumu eni jineni na jibi ajivu banyoga na bakuru mu mbura tsigumuga atsigaa na mamba, agumadupalisila mamba mu tindi dimanyi. 16Jandi agumadulisila manna ajisamalejabunu na bataji benu o kumu, uduvongula noduweliga nodurombisa maboti o gusu. 17Kebananu, duyatasa rie: Mangolu metu mamatudilisa busina buebubu. 18Rangiminanu Fumu Nsambi enu mu mbari la jandi aguduvega mangolu ubudila na ewarisi nesi namunyi pangini andi aji amavangana na bataji benu.

19Pa dulibana Fumu Nsambi enu te na dukota o muyitsa ubansambi bangana nogudama va gusu ogu, nyidutubulili namunyi rie: Dingensa dubungana tindi ubungana! 20Pa dugededila diufi diFumu Nsambi enu dutsiemuga dedi mosi nana Fumu ebungili malongu va misu menu.

Currently Selected:

Migaga Mimatubula 8: PUU1992

Highlight

Copy