Migaga Mimatubula 7

BaIsrael batu baNsambi

(Uku 34.11-16)

1Fumu Nsambi enu odudilisa bulongu abuba abuenu na va misu menu obingisa malongu mapuela: baHitt na baGuirgachie na baAmor na bisi Canaan na baPerizie na baHivie na baJebusie, diwendi rie: Yisambuali yimalongu mafuna tindi ufuna na amavu na tindi mangolu uviolila jenu. 2Ava Fumu Nsambi enu oduwakisila monyi dukababetsa na dukabapansa na duyavangana pangini nogu na duyabagabila maboti. 3Duyakunsa mawela nogu, duyawetsa baana benu babagetu na baana bogu bababaala na duyawelila baana benu bababaala baana bogu babagetu. 4Pa duivayi nana borombisa baana benu bababaala uliyila Fumu nsima usalila bansambi bangana mbana kabu Fumu jiuba va julu miuru mienu na agotamba udubokisa. 5Tumba guluanu nana dubavayila: dukapansa binyensulu biogu bipagu na dukabula bitumba biogu na dukapansa bakosi bogu na dukanyensa bibagunu biogu abimavalu. 6Jenu duvu batu abamawakusu ombu Fumu Nsambi enu. Fumu Nsambi enu amadusola yiri duba dilongu adiuba tindi adiandi va gari malongu motsu amavu va butamba.

Usigama uFumu ukelisa pangini andi

7Pa Fumu amaduronda tindi uronda na amadusola, asamadivaga mu mbari dumaviolila malongu masusu ufuna, duvu dilongu digeyi uviolila malongu motsu. 8Tumba Fumu amaduronda na amakelisa pangini aji amavangana na bataji benu, na mangolu mandi Fumu amadupalisa o buviga buPharaon kaga jiEgypte.

9Kabogu jabanu Fumu Nsambi enu avu Nsambi mosi buandi. Nsambi eni aguvu usigama ukelisa pangini andi na yingeba yiandi te na tosini jikula ombu jogu abemurondi na abekelisi migaga miandi. 10Tumba jaʼ beni ekilisi jogu abemuvini na ebabokisi: agotamba nokilisa botsu abemuvini. 11Kabogu kelisanu maruma na migaga na malongi abi nyidurumi namunyi na bikipinganu.

12Pa duigulu maruma memama na pa duimakelisingi na pa duimakipingi Fumu Nsambi enu okelisila pangini andi na odulasa yingeba nana amavanginina na bataji benu. 13Jandi odurondanga na odugabilanga miula na odufunisanga; ogabila baana benu miula nofunisa digumba dible na malamu menu na matsi menu na bangombi benu na bindombu bienu na binsabi bienu o bulongu abu amavangana na bataji benu uduvega. 14Jenu dugabulu miula uviolila batu botsu: o mandagu menu dugoba na yinguma: ne dibaala ne mugetu ne yibulu yimosi va gari migamba mienu. 15Fumu okakasana maali motsu nenu; agodutindila nesi buali bumosi va gari maali meni maEgypte ama dumajabanga, tumba omawakusu jogu botsu abeduvini.

16Dubunga batu botsu aba Fumu Nsambi enu oduwakisa. Dugobalasa yingeba na duyayitsa bansambi bogu; mu mbari adina diudurombisa ukota o muyitsa ubakosi.

Fumu mukelisi ubatu bandi

17Tanguji dukewivula rie: Batu beni bagetuviolili ufuna? Tsie turungulila ubabinga? Duyabaduma. 18Rangiminanu adi Fumu Nsambi enu amavayila Pharaon na bisi Egypte botsu; 19na mambu maneni ama dumalaba na misu menu na bimaga na bilimba abimalasa mangolu maFumu Nsambi enu agumadupalisa: anana Fumu Nsambi enu ovayila batu botsu abedulasi goma. 20Fumu Nsambi enu otindila nesi banyosi ubarambusa o mbura atsi bedusuemi yiri dubaboka. 21Mu diambu diogu duyalaba keri mu mbari Fumu Nsambi enu aji nenu, Nsambi aguvu uneni na uranga. 22Fumu Nsambi enu obinga malongu meni vala nenu pesu pesu; pa dusundila ubabokisa vana vana, bulongu bubasa de na bibulu na bibulu. 23Mbana Fumu Nsambi enu omawakisa ombu genu; na omapansa tindi upansa yiari na yiari te na mobungu. 24Owakisa bakaga bogu ombu genu na dutsiemusa miina mogu va butamba ne jimosi jigogagana nenu te na botsu bobungu. 25Dunyensa bitumba bibansambi bogu bapaku. Duyanyungila lora jivema vo lora na duyatsibonga mu mbari tsivu nsoruru ombu Fumu Nsambi enu. 26Duyakotisa yima yinsoruru o mandagu menu yiri dugoba dedi na yima yieni ayimavegu na mugeli. Vengu dubibunga tindi ubunga, dukabigengila bibi; bivu nsoruru mu mbari bimavegu na mugeli.

Currently Selected:

Migaga Mimatubula 7: PUU1992

Highlight

Copy