Migaga Mimatubula 6

Vengu gurondanga Fumu Nsambi agu

1Guluanu malongi na maruma na migaga abi Fumu Nsambi enu amaruma udulonsa yiri dubikipanga o bulongu abuba abuenu: 2yiri dudumanga Fumu Nsambi enu te na bilumbu bienu biotsu, jenu na baana benu bababaala na bategula benu bababaala, dukelisanga migaga mieni miotsu na maruma motsu abi nyimaduruma, yiri dununanga. 3Kabogu jenu baIsrael dubigulungu na dubikipanga. Dulabanga ubueji na dufunanga nana Fumu Nsambi bataji benu amadutsingulila ava amavanginina uduvega bulongu abuvu na tindi digumba.

4BaIsrael, guluanu! Fumu Nsambi etu avu Fumu mosi buandi. 5Ronda Fumu Nsambi agu na murima agu uotsu na matasa magu motsu na mangolu magu motsu. 6Maruma meni ama nyiguveyi namunyi gumakelisanga o murima agu. 7Gukamalonsanga baana bagu, gukamavosanga ava gubila o ndagu agu nesi mu mulingu nesi ava gusiliminanga nesi ava gusimbuyilanga. 8Gukamatunga nderi bilimba va makaka magu na nana yirangumunu va mbami agu. 9Gukamasona mu makutu mandagu agu na mu biabutsu biagu.

BaIsrael bayalibana Nsambi ogu

10Fumu Nsambi agu ogukotisa o bulongu abu amavangana na bataji bagu: Abraham na Isaac na Jacob yiri oguvega buonyi. Gudila misiengi mineni na miboti ami gusamarunga ndeʼ beni, 11mandagu amamabasa na minongu miotsu mimaboti ama ndeʼ beni gusamabasa na biduna bimamba abi ndeʼ beni gusamatima na manungi na miri amiburi mioliva abi ndeʼ beni gusamavara. Ava gubijanganga na gugukurulu, 12guyalibana Fumu agumagupalisa o buviga o bulongu buEgypte. 13Gudumanga Fumu Nsambi agu, gumuyitsanga na gulevanga pesi yika na diina diandi. 14Guyaduka bansambi bangana, bansambi babatu abetsani nagu; 15mu mbari Fumu Nsambi agu aguvu nagu avu Nsambi diwavi. Kebana yiri Fumu Nsambi agu agogunyoyila kabu nogugusula va butamba. 16Duyamanga Fumu Nsambi enu nana dumamumangila o Massa. 17Dedilanga malongi maFumu Nsambi enu na maruma mandi na migaga miandi abi amaduvega. 18Guvaganga amavu masungama na amavu maboti va gusu Fumu. Mbana gulabanga ubueji na gudila bulongu buboti abu Fumu Nsambi amavangana uvega bataji bagu, 19dubinga bavinitsi benu botsu nana Fumu amavosila.

20Diurungula uba muana agu udibaala oguwivula rie: Gugopindiyila malongi mamigaga na maruma abi Fumu Nsambi etu amaguvega? 21Gukatsingula muana agu udibaala rie: Jetu tumaleba baviga baPharaon o Egypte tumba Fumu na mangolu mandi amatupalisa o Egypte. 22Fumu amavayila bisi Egypte na Pharaon na bisi ndagu andi botsu bimaga biminongu na minongu, bineni na biranga va misu metu. 23Amatupalisa o Egypte utubega o bulongu abu amavangana uvega ombu bataji betu. 24Fumu amaturuma ukipanga migaga mieni miotsu. Tulabanga ubueji pa tudumanga Fumu Nsambi etu na otukelisanga nana evayilingi te na namunyi. 25Dingensa pa tukipanga migaga mieni miotsu va gusu Fumu Nsambi etu nana amaturumina avana otulaba basungama.

Currently Selected:

Migaga Mimatubula 6: PUU1992

Highlight

Copy