Migaga Mimatubula 9

BaIsrael bagaa basungama

(Uku 31.18—32.35)

1BaIsrael, guluanu! Namunyi dusabuga Jourdain. Duyebinga bisi bulongu buneni abavu na tindi mangolu uviolila jenu, abavu na misiengi mineni amivu mikandu tindi ukandu. 2Dukabinga baAnac; batu baneni na basakama aba jenu duijabi na dumagulu bevosili rie: Anyi orungula uba na kueru na baAnac? 3Jabanu namunyi yiri jaʼ beni Fumu Nsambi enu owenda va gusu enu nderi muji aguisielisini, la Jandi agubabunga na obavongula va gusu enu; mbana jenu dubabinga nobaboka nana Fumu amavosila.

4Ava Fumu Nsambi enu obabingila va gusu enu duyakematisa novosa rie: Fumu etuveyi bulongu buebubu mu diambu didusungugu duetu. Mu diambu diubiva ubatu beni Fumu ebabingili va gusu enu. 5Nesi, tsiri mu diambu didusungugu duenu vo mirima mienu misungama duidilili malongu mogu tumba mu diambu diubiva ubisi malongu meni Fumu Nsambi enu ebabingili va gusu enu ukelisa pangini aji amavangana na bataji benu: Abraham na Isaac na Jacob. 6Kabogu jabanu yiri tsiri mu diambu didusungugu duenu Fumu Nsambi enu eduveyili bulongu bueni buboti mu mbari duvu mimbini.

Muana ngombi ulora: Utsimbu ubatu baIsrael

7Rangiminanu kumbu kwe dumanyoyisi laFumu Nsambi enu o kumu! Duyadilibana! Ubanda na yilumbu ayi dumapalila o bulongu buEgypte te na dumatola va mbura ejiji, dusakadunda uba mimbini miFumu.

8O mukongu uHoreb dumarangisa kabu jiFumu; Fumu amadunyoyila na amadila ditasa udubunga. 9Ava nyimamatila o julu mukongu uyebonga mamanyi mamigaga mipangini aji Fumu amavangana nenu, nyimatsana magumana mabilumbu na magumana mamikolu tsiri uji biguji nesi unu mamba. 10Fumu Nsambi amapega mamanyi mabeji mamigaga ama amasona na mulembu uNsambi amamaba na migaga miotsu ami amavosa nenu va julu mukongu agumalula muna yilumbu ayi jenu dumaba vana.

11Magumana mabilumbu na magumana mamikolu binovioga, Fumu amapega mamanyi mabeji mamigaga mipangini. 12Mbana Fumu amatuma rie: Relama, lensa nosunduga; batu bagu aba ndeʼ beni gumapalisa o Egypte bamavaga disumu dineni. Basamatamba nopembuga nsila aji nyimabalonsa; bamakevayila kosi jilora. 13Fumu amansingula rie: Nyilabi yiri batu bebaba bavu mimbini. 14Ndundi nyubabunga notsiemusa miina mogu va butamba mbana nyuguvaga bulongu abuvu na tindi mangolu na batu aboviolila batu bebaba ufuna. 15Nyimasunduga mukongu agumaiulanga, mamanyi mabeji mamigaga mipangini mamaba nami. 16Nyimalaba jenu dumavayila Fumu Nsambi enu dibi, dumakevayila muana ngombi ulora, dusamatamba upembuga nsila aji Fumu amadulonsa. 17La dibandu nyimabuayila mamanyi meni amamabulu va misu menu.

Muana ngombi ulora: Moise ulenda elendi Fumu mu diambu dibaIsrael

18Nyimagudama va gusu Fumu nana va kala, magumana mabilumbu na magumana mamikolu tsiri uji biguji nesi unu mamba mu diambu dimasumu menu motsu amamanyoyisa Fumu. 19Nyimalaba tindi goma ava nyimalabila kabu ajimagaanga Fumu mu diambu dienu te na amaronda nesi uduboka. Tumba temu eni wandi Fumu amamuekulu. 20Fumu amanyoyila Aaron tindi kabu, amaronda nesi umubokisa, vana temu eni nyimamulendila mu diambu diAaron. 21Nyimabonga muana ngombi agu dumavaga disumu dienu, nyimagunyensa o muji na nyimagunyiga te na gumakaluga difufundu na nyimadibuaga o mujamba aguiruyisini o mukongu.

22Jenu dumanyoyisa Fumu o Tabera no Massa no Quibrot-Taava. 23Ava Fumu amarondila uduwensa va Cades-Bamea amavosa rie: Wendanu yedilanu bulongu abu nyuduvega, jenu mimbini dumalevula diruma diFumu Nsambi enu mu mbari dusamamuvayila yitu na dusamadedila diufi diandi. 24Ubanda vana yilumbu yieni nyimadujabila, dumaba mimbini miFumu.

25Nyimagudama va gusu Fumu magumana mabilumbu na magumana mamikolu mu mbari Fumu amavosa yiri erondi uduboka. 26Nyimasambila Fumu rie: Fumu Nsambi kokolu, guyaboka batu bagu, jogu bavu disiala diagu aba gumagobula na mangolu magu ava gumabapalisila o Egypte na mangolu magu. 27Tasila basalitsi bagu: Abraham na Isaac na Jacob. Guyakipa ugala umirima mibatu bebaba nesi ubiva uogu nesi masumu mogu, 28mu mbari bisi bulongu abu gumatupalisila bakevosa rie: Fumu asamaba na mangolu ubatolisa o buiongu abu amavanganga ubavega. Amabavinanga kabogu amabapalisila uyebabokisila o kumu. 29Aa Fumu bavu batu bagu na disiala diagu aba gumapalisa o Egypte na mangolu magu maneni.

Currently Selected:

Migaga Mimatubula 9: PUU1992

Highlight

Copy