Migaga Mimatubula 10

Muana ngombi ulora: Nsambi utanda etandi baIsrael

(Uku 34.1-10)

1Vana temu eni Fumu amatumina rie: Paka mamanyi mabeji nana amatega, tasunu o julu mukongu; gurunga yigara yipangini wandi. 2Nyumuesona migaga amimaba va mamanyi matega ama ndeʼ gumabula, gukamapodula muna yigara yipangini. 3Nyimarunga yigara yipangini na tsimbi tsiakasia, nyimapaka mamanyi mabeji nana matega na nyimawenda o julu mukongu na mamanyi meni. 4Fumu amamuesona amimasonugu va mamanyi matega, diwendi rie: yigumi yimigaga amimavosu nenu o julu mukongu agumalula muna yilumbu ayi jenu dumaba vana mbana Fumu amamakwakisa. 5Nyimasunduga mukongu, nyimapodula mamanyi o gari yigara yipangini ayi nyimarunga na mamaba muna nana Fumu amatumina.

6BaIsrael bamarambuyila va Bene-Yacan uwenda o Mossera. Avana Aaron amafuila na amatsigu; muana andi Elazar amamuvinga mu yisalu yibuvagulitsi bupagu. 7Bamarambuyila vana uwenda o Goudgoda, na bamarambuyila vana Goudgoda uwenda o Yotbata, bulongu abuvu na bivela bipuela. 8Vana temu eni Fumu amakakisinina yifumba yiLevi na amabavega musuga uyenabeganga yigara yipangini yiFumu noba va gusu Fumu umusalila nogabila batu miula midiina diandi: abana besalingi te na namunyi. 9La dibandu bisi Levi bagaa na dikabu nesi disiala va mosi na baana bataji bogu: Fumu avu dikabu diogu nana Fumu Nsambi enu amabatsingulila.

10Nyimamuetsana o julu mukongu magumana mabilumbu na magumana mamikolu nana va kala. Fumu amamuekulu va temu eni na asamamueduboka. 11Fumu amatuma rie: Wenda o gusu batu bebaba. Bayedila bulongu abu nyimavanganga uvega ombu bataji bogu.

Mugaga udurondu na udululu

12BaIsrael, yi Fumu Nsambi enu erondi viri? Erondi yiri dudumanga nodedilanga duganu duandi nomurondanga nomusalilanga na mirima mienu miotsu na matasa menu motsu. 13Erondi yiri dukipanga maruma mandi na migaga miandi abi nyiduveyi namunyi yiri dulabanga nsangu! 14Julu jivu jiFumu Nsambi enu na tindi julu na butamba na biotsu abivu muna. 15Fumu amaronda tindi uronda bataji benu, va julu vana amaronda jenu bategula bogu, dumasolu va gari malongu motsu nana duilabili namunyi. 16Kabogu kesunsanu va gusu Fumu duyamueba mimbini. 17Fumu Nsambi enu eviolili bansambi botsu na avu Fumu bafumu, avu Nsambi jineni aguvu na mangolu na aguvu uranga, agegengili buneni bumutu na agesingi milendu udibiga mabi. 18Ewamusi bisiana na bakuili, erondi benyi na ebaveyi biguji na biduaru. 19Jenu wenu rondanu benyi duyalibana dumaleba benyi o Egypte.

20Dudumanga Fumu Nsambi enu, dumusalilanga na dukevega ombu gandi na dulevanga pesi yika na diina diandi. 21Jandi avu bundumba buenu, jandi avu Nsambi enu! Jandi amavaga mambu maneni na maranga ama jenu beni dumalabanga. 22Bataji benu abamawenda o Egypte bamaba magumidusambuali mabatu; namunyi Fumu Nsambi enu amaduvaga yinombu ayivu yifuna dedi na bambuelili.

Currently Selected:

Migaga Mimatubula 10: PUU1992

Highlight

Copy