Migaga Mimatubula 11

Durangumunu duama Nsambi amavayila baIsrael

1Durondanga Fumu Nsambi enu dumusalilanga nokipanga malongi mandi na migaga miandi na maruma mandi temu tsiotsu. 2(Ngevosi na baana benu abagejabi malongi ama Fumu amadulonsa mu mbari basamaba bambeji) tumba jenu rangiminanu namunyi mikilu miFumu Nsambi enu na mangolu mandi, 3na bimaga biandi na bisalu abi amasala va gari enu o Egypte ava amagayinina na Pharaon kaga Egypte na bisi bulongu botsu. 4Rangiminanu adi amavayila dibadi diEgypte na bakabala bogu na makalu mogu; nana amabagudisila o Mubu uBenga ava jogu bamadudukila; amabatsiemusa mutubu; 5adi amaduvayila o kumu te na dumatola o mbura ejiji 6na adi amavayila Datan na Abiram baana bababaala baEliab muana dibaala uRuben nana butamba bumapasiyila nobatsudiga na mikuta miogu na mandagu mogu mamatsanda na biotsu abimaba nogu va misu mabaIsrael botsu. 7Dumalaba biotsu bineni abi Fumu amavaganga. 8Vengu dukipanga migaga miotsu ami nyiduveyi namunyi mbana duba na mangolu ukota o bulongu abu dudila, 9yiri dutsinganga o bulongu abu Fumu amavangana uvega bataji benu na bategula bogu, diwendi rie: bulongu abuvu na tindi digumba.

Bulongu abu Fumu ekelisi

10Bulongu abu dudila bugaa dedi na Egypte agu dumapalila avana dumavarilanga bivaru o manungi menu na dumatsatsanga na mamba ama dumateganga jenu beni na jenu beni. 11Bulongu abu dudila buvu na milengu na bibususu na buinogulungu mfula; 12buvu bulongu abu Fumu Nsambi enu ekelisingi abu egengilingi yisuisu mfula na mangala.

13Pa duikelisingi migaga ami nyiduveyi namunyi, pa duirondingi Fumu Nsambi enu pa duimusalilingi na mirima mienu miotsu na matasa menu motsu, 14onoyisa mfula o bulongu buenu mu temu tsiwelimina, nesi mfula jitega nesi jiusita na dugumbiyilanga ble nesi malamu nesi matsi. 15Obendisila biruitsi bienu biriri o manungi menu na dujanganga nogukurungu.

16Kebananu, duyakedunsa noliyila Nsambi enu nsima nosalila bansambi bangana nobakutimina. 17Fumu odunyoyila tindi kabu; te na odibiga julu na mfula jigomuenoga na butamba bugomuebendisa bivaru na jenu dugotamba notsiemuga o bulongu buboti abu Fumu oduvega. 18Tsiyisanu mambu ama nyidutsinguli nderi mavu mabaka va mirima mienu. Dukamatunga nderi yilimba va makaka menu nana birangumunu va mambami menu. 19Dukamalonsanga baana benu, dukamavosanga ava dubilanga o mandagu menu nesi mu milingu nesi ava dusiliminanga na ava dusimbuyilanga wandi. 20Dukamasona mu makutu mamandagu menu na mu biabutsu bimandagu menu. 21Bilumbu bienu na bibaana benu abi dutsananga o bulongu abu Fumu amavangana uvega bataji benu biuba bipuela; munongu mosi nana julu na butamba bigotsiemuga, bilumbu bienu bigosuka wandi.

22Kipanganu migaga mieni miotsu ami nyiduveyi, rondanganu Fumu Nsambi enu; dedilanganu duganu duandi nokeveganu ombu gandi; 23mbana Fumu odubingila bisi malongu meni motsu na jenu durumanga bisi malongu abavu na tindi mangolu uviolila jenu. 24Mbura tsiotsu atsi dutsiarila tsiuba atsienu: mandilu menu nobandila o kumu te no mikongu miLiban na ubandila o mujamba uEuphrate te no mubu o yiari ayi wisi ewendisini. 25Mutu agorungula ugagana nenu. Fumu Nsambi enu onyavisa keri na goma enu o bulongu buotsu abu jenu dutola, dedi mosi nana amavanginina nenu.

26Guluanu namunyi nyidujabisi miula na milogu: 27miula pa dudedila migaga miFumu Nsambi enu ami nyiduveyi namunyi: 28milogu pa dugededila migaga miFumu Nsambi enu na pa duipembuyi nsila aji nyidulonsi namunyi nokota o muyitsa ubansambi bangana aba dugejabi.

29Ava Fumii Nsambi enu odudilisila bulongu buenu, dukagabila miula va julu mukongu uGarizim na milogu va julu mukongu uEbal. 30(Tsia mikongu mieni migaa o disimu dina diJourdain va mugula nsila ajivu o yiari ayi wisi ewendisini o bulongu bubisi Canaan abetsanini o kumu ajisungasana na Guilgal bebeli na miri miMore?) 31Usabuga duisabuyi Jourdain uyedila bulongu abu Fumu Nsambi enu eduveyi: dubudila na dutsana muna. 32Dukipanga migaga miotsu na maruma motsu abi nyiduveyi namunyi.

Currently Selected:

Migaga Mimatubula 11: PUU1992

Highlight

Copy