Migaga Mimatubula 12

Migaga mifumu

1Guluanu migaga na maruma abi dukipanga te na dufuila o bulongu abu Fumu Nsambi bataji benu oduvega, abuba abuenu.

Mbura jimosi jiuyitsila Fumu Nsambi

2Dunobunga bisi malongu, dupansa mbura tsiotsu atsi beyitsili bansambi bogu; o julu tsimikongu na tsibikundubuga nesi mu tsi tsimiri. 3Dupansa binyensulu biogu bipagu nobula bitumba biogu nonyensa bakosi bogu, dukabivisa bibagunu biogu abimayalu bibansambi bogu na dukatsiemusa miina mogu mu mbura tsieni. 4Mu muyitsa uFumu Nsambi enu amadugabila miula mu bionyi. 5Tumba dukayitsa Fumu Nsambi enu yika va mbura aji jaʼ beni osola va gari enu uyetsana nokelasa. 6Avana duwakisila pagu tsienu tsiunyensa na pagu tsimunongu na munongu na yimosi yienu mu digumi na bienu biumanga na pagu tsienu tsiudugusulu pangini na pagu tsienu tsitondini na tsomi tsibangombi na tsibindombu na tsibinsabi. 7Avana dujanganga feta va gusu Fumu Nsambi enu, jenu na mikuta mienu, dusangila mu mbari Fumu Nsambi enu amadugabila miula.

8Dundanu uyitsa Nsambi nana jetu tuivayingi namunyi, diwendi rie: mutu mutu evayi adi elabi diwelimina na jaʼ beni. 9Dusakatola o yivumunu nesi o disiala adi Fumu Nsambi enu oduvega. 10Dukasabuga Jourdain na dukayetsana o bulongu abu Fumu Nsambi enu odudilisa ava oduwakila kalala dmbu bavinitsi botsu abedutsiengili, oduvega yivumu na dutsananga sui. 11Mbana voba mbura aji Fumu Nsambi enu osola uyetsana nokelasa nana nyimadutsingulila. Avana dusambulilanga biotsu abi nyidurumi, diwendi rie: Pagu tsiunyensa tsiminongu na minongu na yimosi yienu mu digumi na bienu biumanga na pagu tsitondini atsi duvega Fumu udugusulu pangini. 12Amana modurombisa tindi nsangu va gusu Fumu Nsambi enu, jenu na baana benu bababaala na babagetu na basalitsi benu bababaala na babagetu na bisi Levi abavu nenu: mu mbari jogu bagaa na dikabu nesi disiala va mosi nenu.

13Kebananu, duyavagula pagu tsienu tsiunyensa va mbura yika la mbura: 14tumba duvagulila pagu tsienu tsiunyensa va mbura aji Fumu osola va gari bifumba bienu avana duvagulila motsu ama nyidurumi. 15Mbura yika la mbura nana Fumu Nsambi enu odugabila miula ava dugululu nsala durungula uboka yibulu noji nyama; nesi mutu aguvu muinsi nesi aguvu ulioma, orungula utsiji nana bejangingi tsiesi vo kabi. 16Dimosi buandi duyaji malungu: dukamapuga va tsi nana bepuyili mamba.

17Dugaa na musuga uji pagu tsiotsu o mandagu menu: nesi yimosi mu digumi yible nesi yimalamu, nesi yimatsi nesi yitsomi tsibangombi nesi tsibindombu nesi tsibinsabi nesi yipagu tsiotsu va gari pagu tsienu atsiudugusulu pangini nesi yipagu tsienu tsitondini nesi yibienu biumanga. 18Tumba dubijanganga va gusu Fumu Nsambi enu va mbura aji Fumu Nsambi enu osola, jenu na baana benu bababaala na babagetu na basalitsi benu bababaala na babagetu na bisi Levi abavu nenu: dusangilanga va gusu Fumu Nsambi enu mu diambu dimaboti ama dudila. 19Yitsingu yiotsu ayi dutsananga o bulongu buenu, kebananu duyalibana bisi Levi.

20Ava Fumu Nsambi enu ojeyisila mandilu menu nana amavanginina nenu, pa nsala nyama jiudurombisa uvosa rie: Nyirondi uji nyama. Durungula uji nana duirondili. 21Pa mbura aji Fumu Nsambi enu osola ukelasa ombu genu jivu vala durungula uboka nesi ngombi nesi yindombu nesi yinsabi nana nyimadurumina mbana durungula uyiji o mandagu menu nana duirondili. 22Duyijanganga nana bejangingi tsiesi vo kabi: nesi mutu aguvu muinsi nesi aguvu ulioma, jogu botsu borungula uyijanganga. 23Dimosi buandi duyaji malungu mu mbari malungu la muvumu. 24Diwendi rie: Duyaji nyama atsisakadekisa malungu, tumba dukamapuga va tsi nana bepuyili mamba. 25Pa dugomaji, jenu na baana benu dulabanga ubueji mu mbari duivayi amavu mawelimina va gusu Fumu.

26Duwakisa yika bima biyingitsi na pagu atsi duvagula udugusulu pangini o mbura aji Fumu osola ukelasa ombu genu. 27Dukavagula pagu tsienu tsiunyensa, diwendi rie: Nyama na malungu va yinyensulu yipagu yiFumu Nsambi enu: mu pagu tsienu tsisusu tsiunyensa malungu mowitulu va julu yinyensulu yipagu yiFumu Nsambi enu jenu beni dukaji nyama.

28Guluanu nokipanga mambu meni motsu ama nyiduveyi mbana jenu na baana benu dulabanga ubueji te na mutubu mu mbari duvaganga amavu mawelimina na masungama va gusu Fumu Nsambi enu.

Bansambi babisi Canaan

29Ava Fumu Nsambi enu obingisila bisi malongu, dukota nodila malongu mogu, amuna dutsananga, 30kebananu, dukewakululu mu mirambu ava dubagukulila diuleba bamabungu va misu menu. Kebananu, duyaromba ujaba mambu mabansambi bogu nowivula rie: Tsie bisi malongu meni bamayitsilanga bansambi bogu? Jetu wetu tuirondi uvaga munongu mosi. 31Duyavaga nana va misu maFumu Nsambi enu mu mbari ava bamasalilanga bansambi bogu na bamanyensanga nesi baana bogu bababaala na babagetu pagu tsibansambi bogu bamavayilanga nsoruru tsiotsu.

Currently Selected:

Migaga Mimatubula 12: PUU1992

Highlight

Copy