Ibriko 11
11
Kepele
1Siro kepele-e siedze ngulietuoü ketuoko merü tou baketa puo, ngu mo zoluo rei si tou baketau zo. 2Ketho zo, u pfutsanuoko rei kepele süu la uko üse mezhü ülie. 3Kepele geinu tei kijü chükelie Ukepenuopfü die geinu zo ücü silie, sidi ngu kemoko geinu kengu vieko chüse parlie.
Abel, Inok mu Noah pie Thakie Kechü
4Kepele geinu Abel-e Kain ruosuo ki vikuocü chüpie Ukepenuopfü tsülie. Sügeinu puo üse miatho ülie, sidi Ukepenuopfü thuo puo mha khakeshüko puotou ükelie zo; süla puo siata zorei puo kepele süu geinu tsie rei u rüchüya. 5Kepele geinu Inok bu sia mo di ze khote, mu “Ukepenuopfü thuo puo ze khoketa la puo ngu mote.” Kekreilamonyü puo ze khoketa mhodzü rei “Puo Ukepenuopfü nei chülie” ükecü zhapu chüshü zo. 6Siro kepele sa mo di Ukepenuopfü nei chülie kenjü, kekreilamonyü puo ki kevormia, puo ba zo ükecü mu puoe puo pfhü kevormia zhakhra chüshüya ücü pele morosuo. 7Kepele geinu Noah rei vorketuoko ngu moluocü nu Ukepenuopfüe puo tarhokeshü dieu silie, mu tarhokeshü dieu ze di rou puo chülie, puo kinuko kelalieketuo la; süu geinu puoe kijüu pejowate, mu kepele la puoe kemiatho kayieu chüte.
Abraham Kepele
8Kepele geinu Abraham rei puo kekie die ze di pie puo tsütuo ükezhü kijüu nu voketuo la puoe tuo prata, puo kevokevü cha si mo zorei. 9Kepele geinu puotei huoyo la puoe phrakeshü kijüu nu chazoumia mhie di lhou, dzüpfheki nu lhou, Isak mu Jakob unie rei sümhie di pfheki nu lhou, unie rei puo ze phrakeshü kayieu kerhe zocü la. 10Kekreilamonyü puoe merü keba nadi puo mvüdzeko dzepie zhükewau, süu rhi mu chükeshüu sü Ukepenuopfü thuo zokecüu pfhüzhüketa la. 11Kepele geinu puo yie ngulie kevi kekuo ngulie, puo rei tsata mu Sara rei nuojüpfü puo zo, sirei puoe phrapiekezhüu dietho zoketuo peleketa la.#11:11 Moro Nuojüpfü puo chüta rei Sarae phichü phiketa ze nu nuonipfülie, puoe phrakeshüue dietho zoketuo lecü la. 12Sidi kesiamia kemhie puo geinu zorei puoseüyie “Teigei themvüko mhiei mu dzükezha khieki huoca tuoi phrü hulie kelho kekra lhoulie.”
13Themia hako pete rei phrakeshüko ngulie mo, rei kepele nunu sia phrete, derei uko ratsa nu süko ngu di u neita zo. Uko pete rei kijü hanu la zowe rüsomia mu chazoumia zoü pu, 14themia hai di pukeliemia u rüna ketho puo pfhükezhü thakeshü la. 15Uko khawaketa kijüu dze leücü siewe, uko sünu la vota zotuo. 16Derei ukoe vikuokecü rüna puo mengu tuote, süu teigei rünau. Süla Ukepenuopfüe uko bu puo uko Kepenuopfü üdi kie mengata mo zo; ketho zo, puoe uko la nadi puo kesepie bate.
17Kepele la Abraham rei puo dojü kesie ki, Isak rei pie ruosuo chütuoü sie zo. Phrakeshüu ngulieketau puo nuo pfuliu zorei khapie ruosuo chütuoü dojüse tuo, 18süu dze, “Isak geinu n nuosenuoyie üdi kieketuo siertuo,” isi . 19Puoe Ukepenuopfü kesiamia zorei chü perhei lalie kevi pele zo, mu sürhi puo nunu puoe puo ngu lalieta zo. 20Kepele la Isak rei hasie vorketuo thejako japie Jakob mu Esau unie tsüwa. 21Kepele la Jakob rei siatatuo ükezhü ki japie Josef nuonie tsü mu, “Puo the mengupie di rüsuota zo.” 22Kepele la Josef rei puo se tieki Israelmiako tuo la pralietaketuo dze puta zo mu puo khruketuo#11:22 Gk Puo ruko. la mha morokesuoko pushü zo.
Mosa Kepele
23Kepele la Mosa penuokelie sie ki puo krünie thekhrü se puo keviese bata, unie unuoyo zivicü ngucü la; sidi unie kediu thezho khakeshü rei prei mota. 24Kepele la Mosa rei phichü sierkelie ki puo Faro nuopfü nuo ücü rei kie mvüta, 25sidi kephouma nunu puo nei kebau ki rei Ukepenuopfü themiako ze kemezhieketuo kedalie. 26Puo Ijipt kinyiko pete ki rei Khrista la thetha pfükeshü we puoma rekuo ücü leta, puoe thiesie zhakhrau meho tuoketa la. 27Kepele la puo kediu nouyieu prei mo zo di Ijipt nunu tuoprata, kekreilamonyü puoe umhi ü ngulie kelho-u ngu baketa tuoi khashü mvü beita zo. 28Kepele la puoe Ciekevonyiu keselie mu thezie kegepie vakecüu rei chülie, sidi nuorieu kepekau bu Israelmia nuorieu pekawa molieketuo chülie.
Israel Krüta Kekreiko Kepele
29Kepele la themiako Kemerie Dzükezhau ha rei ü kijü keso tuoi di cie vota zo, derei Ijiptmia süu cietuoü kele ki uko pelheikhriwa. 30Kepele la uko zha thenie tuo Jeriko dahouu whikeshü sie süu bu tetsuta. 31Kepele la dieze chülie moketako donunu thethenupfü Rahab dukhriwa molie, kekreilamonyü puo puo nei siei di mha rie kevornie pesokelie la.
32A bu kedipuo pu sa ta? A Gideon, Barak, Samson, Jeftha, David, Samuel mu siedzekesiko dze putuo üro pu kekralie lho, 33süko kepele geinu kedirüvieko penyülie, kethoca chülie, phrakeshüko rei ngulie, loshako tie rei pha khalie, 34kemeriekecü miüko rei biemhelie; zhiecha rei therhielie, kuo kemonu rei kekuo ngulie, terhü nu miavimia chülie, solhimia rüpfhünuoko rei whuokelie zo. 35Thenuko bu u themia siaketako rhei lakelie ngu. Kekreiko kedieki nunu par mvü di mia bu u pechü, uko rheilakesie vikuocü puo menguketa la. 36Huomia mia bu u kre, u vü, u tepie pha mu kedie chü. 37Ketsie pie u vakhri, seigei pie rethe,#11:37 Leshü kewe huo nu uko kedo. zhiecha pie uko dukhri; uko bu tekuo mu temvü zhü dzie di ze whi kho mu ke, tsopfhü, u pechüpenyü mu u pese phi, 38kijüu themia süko ze balie sü mota zo. Uko rayhako siro kijüthouko gei rühou kho mu ke, tsiu tsiepfüko mu keciekiko nu lhou tuota.
39Sishierei kepele geinu kuokelie hako pete uko kepele la thetshepfü phi zorei, uko phrakeshüu ngulie mo, 40derei Ukepenuopfü uko la süki vikuokecü puo keseshü, süko bu úko sa mo di chü pevi tseikelie nguwa moketuo la.
Currently Selected:
Ibriko 11: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
