Ibriko 12

Jisu Geinu Thakie Chükeshü

1Süla zhapumia hadepuo kimhou mhiei u houpfü bakecü la, mha u cha khapfü kebako mu u kutsapfü keba kephouma kha kegewa di u kegepfü ta u mhodzütsa whuo zo volie khe, 2sidi u kepele khapie u ketsüu mu chü tseishüyakezha Jisu meho zolie khe, puoe mha puo kenei puo mhodzütsa bakecüko la kemengakecü rei üse mhapuo kemo mhie di krus se rei hielieta zo, sidi vo Ukepenuopfü zatsa kedibau nu bate.

3Puo kephoumamia kinu ngukemvü hade ngulie rei kephoumako donu shügeshühiekelie leshücie,#12:3 Leshü kewe huo nu kephoumako kinu uko kepetsou sümhie. sitse nie chamezie morei nie nou thachüta molietuo. 4Nieko kephouma ze keperhiekecü nu nie zie pekrucü ketso phi mo zoluo, 5siro nie puo nuonuo üdi nie tarhokeshü dieko rükra mote,

“A nuo, Niepuu n pethakeshü le kemedzawa hiecie,

morei puo siazha pie n ketsü ki n nou thachüta hiecie;

6kekreilamonyü Niepuue puo khriemia pethaya,

mu puo nuonuo üdi zelieketamia vü di zelieyakezha la,” ishü.

7Nie bu vilieketuo la pethayakecü zo. Ukepenuopfüe nieko ü puo nuonuo üdi nie gei haishüya; sütuoi nuo kikecüpuoe puo krü puo pethaya kemo ba ga? 8Mhanuü mianuonuo pete u pethakecü ngulie hu; mu nieko sikecü ngulie mota ro, niekoe nuothonuo monyü tekhruonuote. 9Sizomonyü uchüüphoutsa zorei u krünuoe u pethaya, mu we süko rhuya. Siliro we süki rei ruopfü kitsa u Puou dieze chükuo di lhou zhü mo me? 10Úko zowe u mhodzüki vi ücü puotei huo u pethayakezha zo, derei puo zowe u bu puo kemesau ngulieketuo la u la kevi le di u pethashüya. 11Pethayakezha khe tseki we u neikelieu monyü u thepesuokeshü mhietaya, derei sidi pethapfülieketako kenuotsa süu la kemiatho kelhou si thenou kemene parlieya.

12Süla nie bou nganga tuoketako yhashülie, siro nie khoudza metei moketako chü kemeteilie, 13mu nie phiyhako chü kemezhüliecie, sitse phiyhoko bu rüyho sa mota di vilietuo.

Ukepenuopfü Ngukemezhie

14Themia kehoupuorei ze kezevituoü pfhü zolie, mu mesa zolie, si moliro Niepuu ngulie lho zo. 15Miapuorei bu Ukepenuopfü u ngukemezhieu vajowa molieketuo la menuoliecie; moliro mha kepfhü bu tsü par nieko chü pesuowa di mia kekra bu rhuta rei si momu. 16Siro thiedzü Esau vatho puo la puo phichüzha ze cükelie kemhie pieüpiera mu miatho kemo puo bu rei par molieketuo la menuoliecie. 17Puo kenuotsa thejau ngulie nyü di kra zo di cha bei sie rei kha puo tsü mvüketa nieko rei si batuo, kekreilamonyü puo mhapuorei chü di puo nou kedi lakelie ba puorei ngulie moketa la.

18Siro nieko bielie kevi, tu kemerie chü zo keba, zeiboui mu thedzükezei chü keba, rükrierükhriepfü keba, 19siro ketsü kekhou pfhe, mu puo die kepu pfhe kesi khe puo bu uko ki die pu sa hietanu u mezhiemelo phreta zo. 20(Kekreilamonyü ukoe “Khunuo zorei kijüthou süu nyü ro, ketsie pie vakhri zotuo, ikeshüu hielie kenjüta zokecü la.” 21Süu kemerie chü zoketa Mosa rei ngu di sie, “A michie di peta zo,”) isi. 22Derei nieko Zion Kijüthou, kerhei Kepenuopfü nadiu, teigei Jerusalem, mu puo dieliemia phrü hulie kelho kerütsopfü di vor kengu kebau, nu vorte, 23tsiu teigei u za rulieketa penuolie kerieko kehou nu,#12:23 Moro teigeidielieko, mu thenyi nu kevor mu mechükehou. siro themia peteko nyie pepiketuou Ukepenuopfü ki, mu kemiathomia chü pevi tseishülieketa kemiathomia ruopfüko, 24siro dietseidiekho kesakelieu nu thedo nu kethau Jisu ki, siro Abel zie kegepie vakeshüu ki die vikuokecü puyakezha puo ki vor bate.

25Nieko rüchü kethau meliewa molieketuo la nie kireiliecie; kekreilamonyü süko thuo rei kijü nu uko tarhokeshüu die ze mvüketa la rüdalie lhota ro, úko we teigei nu u rüchü kethau die rünyü mota ro talie lhokuota zotuo. 26Süki puo pfheu kijü shükenieshü zo; derei tsie we puoe, “A va puo kijüu zomonyü tei rei sa shükenieshütuo” idi phrashüte. 27Siro, “Tsie rei va puo” icü die hau ca liro shükeniekewako bie pejüwaketuo tha toushüte mu süze mha bie kenielie kelhoko bu batatuo. 28Süla we kethezie khashülie khe, kekreilamonyü we bie keniewalie kelho kedirüvie puo ngulieketa la, sidi we Ukepenuopfü rhu mu puo khrüprei siei di puo neikecü lietho-u chülietuo khe; 29Ukepenuopfüe mha the pejüwayakezha mi puo zocü la.

Currently Selected:

Ibriko 12: ANBRBSI

Highlight

Copy