Toukepra 6

1Sitse Jihovae Mosa ki, “Tsie we n bu a Faro gei kedipuo chüshütuo shi ngushütuo. Puoe puo dzie kuo se di uko bu pratuo, u zo, puo dzie kuo phi di puoe puo kijü nunu uko whuo phrashütuo.”

Mosa Kekie Va Kenieu

2Siro Ukepenuopfüe Mosa ki, “A sü Jihova zo, 3Ae Abraham, Isak mu Jakob ki, Kekuotho Kepenuopfü üdi pie pengushü, derei a zae Jihova ücü se uko pesishü mo. 4A uko ze dietseidiekho rei chü, uko rüsomia chü di lhouketuo Kanan kijüu pie uko tsütuo üdi. 5Sizomonyü ae Israelko Ijiptmia die chü di meheimelokezhü pfhe sishüte, mu a a dietseidiekho-u rükraliete. 6Süla Israelko ki pushücie, ‘Ae Jihova zo, mu a Ijiptmia pieko khro nu nieko ze parlietuo, mu uko die kechü nunu nieko shüphralietuo, mu a a bou yhashü mu kepejo kere phi se di nieko kelalietuo. 7Mu a nieko pie a themia chülietuo, tsiu a nie Kepenuopfü chütuo; sidi nieko ae Jihova, nieko Kepenuopfü, Ijiptmia thepie kemesiko nunu nieko ze parkeshü silietuo. 8Tsiu a kijü pie Abraham, Isak mu Jakob tsütuo üdi rüsekeshüu nu nieko ze voshütuo; nie bu süu pie nie vie chüketuo la khashü nie tsütuo. Ae Jihova we.’ ” 9Mosae Israelko ki hakemhie pushü, derei uko Mosa pfhe rünyü mvüta, uko nou kemezhiekecü mu miadie chü di rethortacü la.

10Sitse Jihovae Mosa ki, 11“Le di Ijipt kediu Faro ki Israelko bu puo kijü nunu pratanu di pushücie.” 12Derei Mosae Jihova ki, “Harie, Israelko a pfhe rünyü mvüte; siüro Faro kikidi puo tie metso kemo a tuoikecü puo pfhe rünyütuo ga?” 13Derei Jihovae Mosa mu Aron unie ki pu di unie bu Israelmiako Ijipt nunu ze pratatuo ükecü dieu pie Israelmiako mu Ijipt nu kediu Faro ki pushü.

Mosa mu Aron Puotsanuo Dze

14Hako uko puonuo kiko nu puo krüko: Israel nuorieu Reuben nuonuoko: Hanok, Palu, Hezron mu Karmi; hako Reuben kinuko. 15Simeon nuonuoko: Jemuel, Jamin, Ohad, Jakin, Zohar, mu Kananpfü puo unie nuo Shaul#6:15 Moro Saul.; hako Simeon kinuko. 16Hako Levi nuonuoko u thuo u yieu medzi di: Gershon,#6:16 Gershom idi thu reiya; 2:22 meholie. Kohat mu Merari, Levi kelhouzha cie krie puo di serethenie. 17Gershon nuonuoko: Libni mu Shimei, unie kinuko medzi di. 18Kohat nuonuoko: Amram, Izhar, Hebron mu Uziel, Kohat kelhouzha cie krie puo di serese. 19Merari nuonuo: Mahli mu Mushi. Hako Levi kinuko u thuo u yieu medzi di. 20Amram-e puo puo üpfü Jokebed lielie, di puoe Aron mu Mosa unie penuoshü, Amram kelhouzha cie krie puo di serethenie. 21Izhar nuonuo: Kora, Nefeg mu Zikri. 22Tsiu Uziel nuonuoko: Mishael, Elzafan, mu Sithri. 23Aron-e Aminadab nuopfü mu Nahshon üpfü Elisheba lielie, tsiu puoe Nadab, Abihu, Eliazar mu Ithamar penuoshü. 24Kora nuonuoko: Asir, Elkana mu Abiasaf; Hako Kora kinuko. 25Aron nuou Eliazar-e Putiel nuopfü puo lielie, tsiu puoe Finehas penuoshü puo tsü. Hako Levi kinuko, u puonuo kiko nu puo krüko.

26Jihovae, “Ijipt kijü nunu Israelko krodidi chü di ze partacie,” idi hako se Mosa mu Aron ki pushü. 27Ijipt kijü nunu Israel themiako ze partatuo üdi Ijipt kediu Faro ki pukeshü sü, Mosa mu Aron unie zo.

Mosa mu Aron Jihova Die Zekelie

28Jihovae Ijiptmia kijü nunu Mosa rüchükecü nhie, 29Jihovae Mosa ki, “A sü Jihova zo; Ijipt kediu Faro ki a n ki kepu peteko pushücie.” 30Derei Mosae Jihova mhodzü nunu sie, “Harie a sü a tie metso mo,#6:30 Ibri nu A tie zhürekemomia puo; 6:12 meholie. siro Faro kikidi a pfhe rünyütuomu.”

Currently Selected:

Toukepra 6: ANBRBSI

Highlight

Copy