Toukepra 7
7
1Sitse Jihovae Mosa ki, “Mehoshüyi, a Faro mhodzüki n pie Kepenuopfü tuoishütuo, mu n dzürieu Aron bu n siedzekesiu tuoishütuo. 2A n ki pukeshü pete noe pushü morosuo, mu n dzürieu Aron-e Faro bu puo kijü nunu Israelko bu pratanucü pu morosuo. 3Derei a Faro nou chü perewatuo, mu a Ijipt kijü nu zasiko tsiu u ngoko chü phishütuo. 4Sirei Faro nieko pfhe rünyülie lho, sitse ae a dzie pie Ijipt kijü gei shütuo, kepejo kere se di Ijipt kijü nunu a krodiko, a themia Israel nuonuoko ze parshütuo. 5Sitse Ijiptmiakoe a Jihova zo ücü silietuo, a a dzie yhapie Ijipt gei shü di uko donunu Israelko ze parkelie ki.” 6Sitse Mosa mu Aron unie sükemhie chülie, unie-e Jihova unie ki diekhakeshü kemhie chülie. 7Siro unie-e Faro rüchükecü ki Mosae cie hiethethata mu Aron-e cie hiethethaeseta.
Aron Theu
8Jihovae Mosa mu Aron unie ki, 9“Faroe nnie ki, ‘Ungomhatho puo chüshüyi,’ iro, noe Aron ki, ‘N the pielie di kelhoupie Faro mhodzünu shücie, sitse süu tinyhü chülietuo.’ ” 10Süla Mosa mu Aron unie Faro mhodzünu vo di Jihova unie ki diekhakeshü kemhie chüshü; Aron-e puo theu kelhoupie Faro mu puo kituoko mhodzünu shüshü, sitse süu tinyhü chüta. 11Sitse Faro rei puo themia mhakesithoko tsiu themouko kieshü, mu Ijipt nu kemeduoko rei uko kepekhre do se di sükemhie chüshü. 12Uko pete rei u theu kelhoushü, mu süko tinyhü mevita; derei Aron the-e uko theko mezulieta. 13Sirei Faro meloue re ba zo, mu Jihova pukeshü tuoi di, puoe unie pfhe rünyü mvüta.
Dzü Chüpie Thezie Mevikewa
14Sitse Jihovae Mosa ki, “Faro nou chü perewate, puoe themiako bu tuo mvü ba zo. 15Khise Faro ki vocie, puoe dzü nu voyacü la; kerü khie nu puo pfhe thalie, siro n dzie nu kethe tinyhü mevikelieu selie. 16Mu no puo ki, ‘Jihova, Ibriko Kepenuopfü, a ketsepie n ki shü di pucü, “A themiako bu tuotacie, uko bu rayha nu a lie chüketuo la,” si. Derei no tsie rei die süu ze mo ba zoluo. 17Jihovae puya, “Hageinu noe a Jihova zo ücü silietuo.” Harie, a a dzie nu keba ketheu pie Nail rü nu dzüu vüshütuo, sitse süu thezie mevitatuo. 18Tsiu Nail rüu nu khuoko siatatuo, mu kerüu menachütatuo, tsiu Ijiptmiako Nail rüu nu dzü krie mecütatuo.’ ” 19Jihovae Mosa ki, “Aron ki pushücie, ‘N theu pielie di n dzie yhase Ijipt dzüko mho, kerüko mho; dzüchako, dzükhouko, mu dzüthouko pete mho shücie, di uko bu thezie mevitalie; sidi Ijipt kijü pete nu thezie batatuo, seikhouko nu rei mu ketsiekhouko nu rei.’ ”
20Mosa mu Aron unie-e Jihova diekhakeshü kemhie chüshü; Faro mu kituoko mhinguki nu puo theu yhapie Nail rüu nu dzüko vüshü, ru Nail rüu nu dzü pete thezie mevita. 21Sidi Nail nu khuoko siata, sitse Nail rüu menata; sidi Ijiptmia bu Nail rüu nunu dzü krielie kenjüta, mu Ijipt kijü pete nu thezie tuota. 22Derei Ijipt nu kemeduoko rei uko kepekhre doko se di sükemhie chüshü; süla Faro nou khrü ba zota, sidi puoe Jihova kepu mhiei di unie die rünyü mvü ba zota. 23Faroe rüreilie di tuo puo kinu vota, mu puo hau rei pie puo nou shü mo zo. 24Siro Ijiptmia pete dzü kekrie la Nail rüu khie nu dzükhou ho, ukoe Nail rüu nunu dzü krielie kenjüketa la.
25Jihovae Nail rüu vükeshü sie zha thenie vota.
Currently Selected:
Toukepra 7: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
