Toukepra 8

Guorünuo Chüpie Tshukewa

1Sitse Jihovae Mosa ki, “Faro ki vo di puo ki, ‘Jihovae puya: A themiako bu tuotacie, uko bu a lie chüketuo la. 2Mhanuü noe uko bu tuo mvüta ro, harie, a guorünuo pie n rüna pete pelhashütuo. 3Nail nu guorünuo thuo tshutatuo, di süko n kinu lertuo, n zhübou nu tsiu n zhü gei votuo, siro n kituoko mu n themiako#8:3 Gk: Ibri nu N themiako gei. kiko nu, n miphuko nu mu thoukenekhouko nu rei votuo. 4Guorünuokoe n gei mu n themiako tsiu n kituoko pete gei vortuo.’ ” 5Siro Jihovae Mosa ki, “Aron ki pushülie, ‘N dzie nu n theu yhapie kerüko mho, dzükhouko mho, mu dzüthouko mho shülie, sidi guorünuo chüpie Ijipt kijü pete mho shüwalie!’ ” 6Süla Aron Ijipt dzüko mho puo dzie yhashü; sitse guorünuoko par Ijipt kijü ketshu chülie. 7Derei kemeduoko rei uko kepekhre doko se di sükemhie chülie, sidi guorünuoko ze vor Ijipt kijü nu shü.

8Sitse Faroe Mosa mu Aron kieshü di unie ki, “Jihova bu a kinu tsiu a themiako kinu guorünuoko setanu di chashücie; sitse themiako bu vo Jihova ki ruosuo chüketuo la a uko bu tuolietuo.” 9Mosae Faro ki, “N la mu n kituoko la tsiu n themiako la, n gei siro n kiko nunu guorünuoko bie pejüwa di uko bu Nail rüu nu rübei batanukecü, kicükipuo chashü ro n nei shi, pushülie.” 10Puoe sie, “Sodu,” sishü. Mosae sie, “Süu bu n kepu mhieliecie, sidi n bu Jihova hie Kepenuopfü tuoikecü miapuorei ba kemo silieketuo la. 11Guorünuoko n gei mu n kiko nunu tsiu n kituoko siro n themiako kinu tuotatuo, ukoe Nail rüu nu rübei bacü zotatuo.” 12Süsie Mosa mu Aron unie Faro kinu tuo prata, sidi Mosae guorünuoko la Jihova ki chashü, puoe Faro ze kepfhekhokeshü tuoi di. 13Siro Jihovae Mosa die kemhie chüshü; guorünuokoe kiko nu, phetsuoko nu mu lieko nunu siata. 14Sidi uko süko pfhü kengupie pfhepie zhüwa mu kijüu menachüta. 15Derei Faroe rüü lakelie ngushü tse, puo nou re lata di unie die rünyü mvüta; Jihova pukeshü mhiei.

Mimhienuo Chüpie Tshukewa

16Sitse Jihovae Mosa ki, “Aron ki pushülie, ‘N theu yhapie kijü nu nyopheko vüshüyi, uko bu Ijipt kijü pete nu mimhienuo chülieketuo la.’” 17Sitse unie sükemhie chüshü; Aron-e puo dzie nu ketheu yha se kijü nu nyophe vüshü, ru mimhienuo themia mu khunuoko gei vorta; Ijipt kijü nu nyophe pete mimhienuo chüta. 18Siro kemeduoko rei uko kepekhre doko se di mimhienuo se parshütuo üdi thehie chü, derei chülie kenjüta. Sidi mimhienuo themia gei mu khunuo gei tshuta. 19Sitse kemeduokoe Faro ki, “Hau we Kepenuopfü dziekinuoute.” Derei Faro nou chü perewa, sidi puoe unie die rünyü mvüta; Jihova pukeshü mhiei.

Teizie Chüpie Ijipt Tshukewa

20Süsie Jihovae Mosa ki, “No khiserüna sielie, di Faro kerü nu vokecü ki puo ze kesecie, sidi puo ki, ‘Jihovae puya: A themiako bu tuotacie, uko bu a lie chüketuo la. 21Mo di, mhanuü no a themiako bu tuo mvü ro, harie, a teizie krodi ketsepie n gei siro n kituoko gei tsiu n themiako gei mu n kiko nu shütuo; siro Ijiptmia kiko nu mu uko keba pheko nu rei teizie bu tshutatuo. 22Derei sünhiesü a Goshen kijü, a themia bayakecüu kho pekreishütuo, sidi sünu teizie krodi puorei bu balie lho, n bu kijü hau nu a Jihovae ba zo ücü silieketuo la. 23Sidi ae a themiako mu n themiako kho kekreishütuo.#8:23 Gk Vg: Ibri Rhakelie khashütuo. Zasi hau sodu batatuo.’ ” 24Mu Jihovae sü kemhie chüshü; teizie krodidi chü Faro kinu tsiu puo kituoko kinu vorta, mu Ijipt kijü pete nu teizie la kijüu bie pesuowa.

25Süsie Faroe Mosa mu Aron unie kielie di sie, “Volie, di kijü hau nunu nie Kepenuopfü ki ruosuo chüliecie.” 26Mosae sie, “Süu sidi chükecü puotoulie lho; hie-e Jihova hie Kepenuopfü ki ruosuo kechü Ijiptmiako mhodzü mha kerütse kro puo zotuocü la. Mhanuü hie Ijiptmiako mhingu nu chüshü ro, uko ketsie pie hieko vatalie lho me? 27Hieko rayha nu zha se tuo nu vo di Jihova hie Kepenuopfü hie ki diekhakeshü tuoi ruosuo chü morosuo bei zo.” 28Süla Faroe sie, “A nie bu vo rayha nu Jihova nie Kepenuopfü ki ruosuo chüketuo la voketuo khashütuo, tuou tuo pecie se vota hie; a la nie Kepenuopfü ki chashücie.” 29Süsie Mosae sie, “Harie, a n ki nu tuo pratazhie mu a teizie krodiko bu Faro kinu, puo kituoko kinu mu puo themiako kinu sodu tuotaketuo la Jihova ki chashütuo. Faro bu cürü lata hie, themiako bu vo Jihova ki ruosuo chüketuo khashü mvü lata di.”

30Süla Mosae Faro ki nu prata di Jihova ki chashü. 31Sitse Jihovae Mosa chakeshü tuoi chüshü, sidi teizie krodiko Faro gei, puo kituoko kinu, mu puo themiako kinu yopuorei ba sa mota. 32Derei tsieu va rei Faro puo nou re lata, sidi themiako bu tuo mvüta.

Currently Selected:

Toukepra 8: ANBRBSI

Highlight

Copy