Toukepra 5

Mosa mu Aron Unie Faro Mhodzünu Kevo

1Kenuotsa Mosa mu Aron unie Faro ki vo di sie, “Jihova Israel Kepenuopfüe puya, ‘A themiako bu tuotaliecie, uko bu rayha nunu a la thenyi puo nyiketuo la!’ iya.” 2Derei Faroe sie, “Jihova supuo di a bu puo pfhe rünyü di Israelko bu tuotatuo ga? A Jihova si mo, sizomonyü a Israelko bu tuotalie lho.” 3Sitse unie puo ki, “Ibriko Kepenuopfü, hienie ze kesewate, hienie n ki chaya, hieko bu tuotacie, hie bu zha se tuo nu vo di rayha nunu Jihova hie Kepenuopfü ki ruosuo chücie, si moro, hie thesa nunu morei zhiecha nunu kata rei si momu.” 4Derei Ijipt kediue unie ki, “Mosa mu Aron, kiüdi nnie themiako mhatho nunu uko zetatieya mu? Nie mhatho nu la voliecie.” 5Sitse Faroe sie, “Harie, ukoe kijü hau nu themiako ki krakuote mu nnie uko bu u mhathoko nu rüleitatuo üzhie!” 6Siro sünhie teiso nu Faroe themia mhatho niepuko mu kemehoko ki pu di, 7“Nieko hadzü tuoi nyorietsie chüketuo la rügu khapie themiako tsü sa hie; uko bu u thuo vo rügu pfhü kengutalie. 8Derei uko bu hadzü nyorietsie chüyakecü de chü zotuo, nieko süu chü petsawa mo zolie, uko mhachü mecü; süla ukoe sie, ‘Hieko bu vo di ruosuo chüpie hieko Kepenuopfü tsücie, iba.’ 9Mhatho rekuocü pie themiako gei shülie, uko bu süko chü di mha kese dieko rünyü motalieketuo la.”

10Süla mhatho niepuko mu themia kemehoko pra di themiako ki, “Faroe puya, a rügu pie nieko tsülie lho. 11Nie thuo vo di ngulie kevira nu rügu pfhülie; derei nieko mhatho we yopuorei petsawalie lho.” 12Süla themiakoe vo rügu sou nu rügudo pfhü di Ijipt kijü pete nu nyhünhe tuota. 13Siro mhatho niepukoe kenouse di sie, “Nie mhatho chü tseiwalie, nieko khunhie tho-u rügu keba ki tuoi zotuo.” 14Siro Faro mhatho niepukoe Israelmia krütako, uko thuo kedapie themia kemeho chükeshüko vü di uko ki, “Kiüdi thie nieko bu nyorietsie chünukeshüko thiedzü tuoi pete chüshü mota ga?”

15Sitse Israelmia krütakoe Faro ki vor di puo ki, “No kiüdi n kituoko gei hakemhie chüya mu? 16Rügu puorei khapie n kituoko tsü mo, sizorei ukoe hieko bu, ‘Nyorietsie chüshülie,’ si. Mu harie, n kituoko vütaya, derei kejo-u n themiako tsü gei zo.” 17Derei puo uko ki, “Nieko mhachü mecü rei mecüthor; süla niekoe sie, ‘Hieko bu vo ruosuo chüpie Jihova tsücie, iya.’ 18Tsie volie, di mhachülie; rügu pie nieko tsülie lhoketa la, sizorei nie tho bu nyorietsie chünukeshü de chü zotuo.” 19Israelmia krütakoe, “Nieko bu khunhie nyorietsie chünukeshüko petsawalie lho” idi pukecü sikeshü ki ukoe puotei kesuo puo nu baketa ngulie. 20Ukoe Faro kinu par ru Mosa mu Aron unie uko pfhe tha di selie. 21Sitse uko unie ki, “Jihova bu nnie meho di capi chülie, kekreilamonyü nnie hieko bu Faro mu puo kituoko mhodzünu ngukemecüko chüwate, mu hieko dukhriketuo la zhiecha pie uko dzie nu shüwate.”

Mosa Kecha

22Sitse Mosae rürei Jihova kitsa valie di sie, “He-i, Jihova, no kiüdi themia hako gei mha kesuo chüshü ga? No kiüdi a ketse rei shü ga? 23Ae n za nunu Faro ki die putuoü vorkecü ze, puoe themia hako gei mha kesuo chü ba zote, mu no n themiako shüphralie mo zo.”

Currently Selected:

Toukepra 5: ANBRBSI

Highlight

Copy