Toukepra 4

1Sitse Mosae sie, “Derei harie, ukoe a pelelie lho morei a pfhe rünyülie lho, ukoe, ‘Jihovae n pengushü mo’ itatuocü la.” 2Jihovae puo ki, “N dzie nu kebau kedipuo ga?” Puoe sie, “Kethe puo.” 3Sitse Puoe sie, “Kelhoupie kijü shücie,” si. Süla puoe süu kelhoupie kijü shü ru süu tinyhü puo chüta; sitse Mosa süu kinu tata. 4Derei Jihovae Mosa ki, “N dzie yhashü di puo meiu thezelie.” Süla puoe puo dzie yhashü di süu thezelie, ru süu puo dzie nu kethe puo chü lata. 5“Uko bu Jihova, uko puonuoko Kepenuopfü, Isak Kepenuopfü mu Jakob Kepenuopfüe n pengukeshü pelelieketuo la,” sishü.

6Süsie rei Jihovae puo ki, “N dzie pie n pfhe khro shüshülie,” siru puoe puo dzie pie puo pfhe khro shüshü, sidi puo dzie se la par ru harie, puo dzie gei mpa kechü bata, krapie pekrie tuoita. 7Sitse Ukepenuopfüe pu la di, “N dzie pie n pfhe khro shü lashücie,” süla puoe puo dzie pie puo pfhe khro shü lashü; di puo süu se la par tse, harie, süu puo chü kekreiko tuoi lata. 8Ukepenuopfüe la sie, “Ukoe n pele mo, morei zasi kerieu pie mha ümo rei, zasi kenuou we uko pelelietuo. 9Mhanuü uko zasi hanie rei pele mo, morei n pfhe rünyü moro, no Nail rü nunu dzü huoyo thoulie di süu lapie kijü keso gei shücie, sitse no Nail rü nunu dzü thoukelieu kijü keso gei thezie chütatuo.”

10Derei Mosae Jihova ki, “He-i a Niepuu, a we hamhodzütsa rei mu no n kituou ki die pukeshü sie rei die pu metu mo, derei die putho, mu a meü meduoe.” 11Süsie Jihovae puo ki, “Supuo themia tie chüshü ga? Supuonie puo chüpie liehuo, morei puo nyie rüvü, morei mha ngulie, morei puo mhiciekecü chüshüya ga? Süu A, Jihova thuo mo üme? 12Süla tsie volie, a thuo n tie ze tuotuo, sidi n bu kedipuo pu morosuo shikecü se n pethashütuo.” 13Derei puoe sie, “He-i a Niepuu, n pezie rei kekreimia ketsewacie.” 14Sitse Jihovae Mosa gei puo nou meyieta di sie, “Aron, n dzürieu, Leviu rei ba mo me? Puoe die pu si phikecü a si ba; mu harie, puo n ze kesetuoü vorzhie, mu puo n ngulie tse puoe puo nou puo neituo. 15Mu noe puo ki die putuo siro dieko pie puo tie nu shütuo, tsiu a n tie mu puo tie ze tuotuo, sidi n bu kedipuo chü morosuo shikecü se pethashütuo. 16Puoe n la themiako ki die pushütuo, tsiu puoe n tie chülietuo, mu noe puo la Kepenuopfü tuoituo. 17Mu noe n dzie nu kethe hau pie tuotuo, sidi se zasiko chütuo.”

Mosa Ijipt nu La Kevor

18Süsie Mosae puo meiu Jethro ki la vo di puo ki, “A n ki chaya, a bu Ijipt nu la vo di a kicükinumiako rhei ba zoluo mo mo shicü mehoshücie.” Sitse Jethro puo ki, “Keviu chü volie.” 19Sitse Jihovae Midian nu Mosa ki, “Ijipt nu la volie, n kerheiro pfhü ketuoko pete siatemu.” 20Süla Mosae puo kimia, siro puo nuo thepfuko zelie di uko pie gada gei shülie, sidi Ijipt kijü nu la vo; mu Mosae puo dzie nu Ukepenuopfü theu se tuo zo.

21Sitse Jihovae Mosa ki, “No Ijipt nu la vo ro, ae n bu chülie kevi kekuo pie n tsüwaketa ungomhathoko Faro mhodzünu chüshücie; derei a puo nou chü perewatuo, sitse puoe themiako bu tuolie lho. 22Siro noe Faro ki putuo, ‘Jihovae puya: Israel-e a nuo nuorieu, 23mu a n ki puya, “A nuo bu a lie chüketuo la tuotacie,” mhanuü no puo bu tuo mvüta ro, harie, ae n nuo nuorieu dukhriwatuo.’ ”

24Cha nu razhüchü puo nu Jihovae puo ze keselie di puo dukhriwatuoüta. 25Sitse Ziporae tsiekhrü puo chülie, di puo nuou zhürewa, di süu pie Mosa phi bieshü, di puo ki, “No ha a la we thezie nupfu puo zo!” 26Süla puoe puo khashüwa. Zhükereu la puoe, “No ha thezie nupfu puo zo” idi pukeshü zo.

27Jihovae Aron ki, “Rayha nu volie Mosa ze keseketuo la.” Süla puo Ukepenuopfü kijüthouu gei vo puo selie, sidi puo meboshü. 28Sitse Mosae Jihova die se puo pesekeshüko pete mu puo bu zasi chüshünukecü peteko pie Aron ki pushü. 29Sitse Mosa mu Aron unie vo di Israelmia phichüko pete pfhü kengulie. 30Mu Aron-e Jihova Mosa ki pukeshü dieko pete pushü, sidi themiako mhodzünu zasiko rei chüshü. 31Sitse themiakoe pelelie; mu ukoe Jihova Israelko ki vor di uko kemezhiekezhüko ngu ba ükecü silie tse, uko tsu Ukepenuopfü rüsuota.

Currently Selected:

Toukepra 4: ANBRBSI

Highlight

Copy