Toukepra 3

Mosa Kiekelie

1Siro Mosae puo meiu Jethro, Midianmiako Zievo-u kuo pfhe tuo, sidi puoe puo kuoko ze rayha niakratsa vo di, Ukepenuopfü kijüthouu, Horeb gei volie. 2Sitse Kepenuopfü dielieu seinyho geinu kepar miü puo nunu puo pengushü, mu puoe meho tha ru, harie, seinyho-u tu ba, derei the pejüwa mo. 3Sitse Mosae sie, “A tuo rürei phi di mha kezha kengu hau mehoshütuo, kiüdi seinyho-u thewa mo shi.”

4Siro Jihovae puo mha hau mehotuoü rüreikeshü ngu tse, Ukepenuopfüe seinyho-u nunu puo kie di sie, “Mosa, Mosa!” Sitse puoe sie, “A haki bawe,” si.

5Süsie puoe sie, “Penuo phir hie, n phi geinu n phikou rhuowalie, no thakecü chüu mesakecü la.” 6Sidi puoe sie, “A n puou Kepenuopfü, Abraham Kepenuopfü, Isak Kepenuopfü mu Jakob Kepenuopfü zo.” Sitse Mosae puo zie kevielie, puoe Kepenuopfü meho michieketa la.

7Sitse Jihovae sie, “Ae a themia Ijipt nu kebako kemezhiekecüko ngushüte, mu ukoe uko mhatho niepuko la kemezhie di meheimelo keba sishüte; 8mu a Ijiptmia dzie nunu uko shüphralietuo üdi kerwe, siro kijü sünunu uko ze kijü kevi mu kemeya puo mithunudzü mu mepfhidzü krukezhü kijü puo nu pralieketuo la, kijü süu Kananko, Hitko, Amorko, Perizko, Hivko mu Jebusko kebachü. 9Mu tsie we, harie, Israel themiako mezhie si vor a tso bate, siro ae Ijiptmiako uko pesekecü ngushüte. 10Vorlie, a n ketsepie Faro ki shütuo, n bu a themia Israel nuonuoko Ijipt nunu ze parlieketuo la.”

11Derei Mosae sie Ukepenuopfü ki, “Faro ki vo di Ijipt nunu Israel nuonuoko ze parlieketuo, a sü supuo mu?”

12Puoe sie, “Derei a n ze tuotuo; mu a n ketseshü ücü hau bu n la zasi chütuo; noe Ijipt nunu themiako ze parlie ro, niekoe kijüthou hau geinu Kepenuopfü rüsuotuo.”

13Sitse Mosae Ukepenuopfü ki, “Mhanuü a Israelmiako ki vo di uko ki, ‘Nieko puonuoko Kepenuopfü a ketsepie nieko ki shü’ mu uko a ketso di, ‘Puo za supuo ga?’ iro, a bu uko ki kedipuo pu ta?”

14Ukepenuopfüe Mosa ki, “A SÜ A ZO,”#3:14 Moro A SÜ A ZO moro Ae A ZOTUO. siro puoe sie, “Hau pie Israelmiako ki pushülie, ‘A ZO cüu thuo a ketsepie nieko ki shü ho!’ ” 15Ukepenuopfüe Mosa ki pu sa di sie, “Hau pie Israelmiako ki pushülie, ‘Jihova#3:15 Theza hau, YHWH, icü meseu. nieko puonuoko Kepenuopfü, Abraham Kepenuopfü, Isak Kepenuopfü, mu Jakob Kepenuopfü, a ketsepie nieko ki shü ho’:

Hau kechachie a za,

mu hai di thephou pete nu a rükra tuotuo.

16Vo di Israel phichüko pfhü kengulie, di uko ki pushülie, ‘Jihova, nie puonuoko Kepenuopfü, Abraham, Isak mu Jakob Kepenuopfü, a pengushü di a ki: A nieko mehoshü mu Ijipt nu nieko gei kedipuo chüshü shi ngushüte. 17Mu ae kemezhiekecü Ijipt nunu nieko ze parshütuoü a die phrashü, sidi nieko ze Kanan kijü nu, Hitko, Amorko, Perizko, Hivko mu Jebusko kijü mithunudzü mu mepfhidzü krukezhü nu nieko ze voshütuoü shü,’ 18Mu ukoe n pfhe rünyütuo, siro no mu Israel phichüko vo di Ijipt nu kediu ki hakemhie putuo, ‘Jihova, Ibriko Kepenuopfü, hieko ze kesewate; mu tsie, hie n ki chaya, hieko bu rayha nu zha se tuo nu vocie, hie bu ruosuo chüpie Jihova hie Kepenuopfü tsülieketuo la.’ 19Ijipt nu kediue thedzie kuo sekecü#3:19 Gk Vg: Ibri Mo, thedzie kuo kemo puo. puo bu puo kemvü chü zoshü kemosie nieko bu tuolie lho ükecü a si zo. 20Süla a a dzie yhashütuo, sidi a sünu u ngokecü chüshüketuoko pie Ijipt vüshütuo; süsienu puo nieko bu tuolietuo. 21Mu a themiako bu Ijiptmia mhingu nu thekhrie pfütuo; siro nieko tuokeshü ki, nieko bu methuo di tuolie lho, 22derei thenumia kehoupuorei puo zanuopfü ki, mu puo sopfü ki rakachü, suna rütsonyieko tsiu pfhemenei chalietuo, di pie nie nuonuo thepfumia mu thenuko gei shülietuo; sidi nieko Ijiptmiako pekawatuo.”

Currently Selected:

Toukepra 3: ANBRBSI

Highlight

Copy