Pethakeshüu 7
7
Kelhou Dze la U Chameziekecü
1Theza kevi-e tier puoma kere ki vikuo; mu kesia nhie kepenuo nhie ki vikuo.
2Thehethehie ki nu kevo ki thekrü chü keba ki nu kevo vikuo,
kekreilamonyü süusü themia peteko la thelau zo,
tsiu kerheimia süu pie u melou ki shüse tuotatuo.
3Thenou kesuoe kenyü ki vikuo,
kekreilamonyü u zie bu puo nousuokeshü geinu u meloue puo neilieya.
4Mhakesimia noue thekrü kechü ki nu baya,
derei mhalekemomia noue keyukenyü chü kebamia ki nu baya.
5Mhalekemomia tsali rünyükecüu ki,
mhakesimia u kerhiekeshü pfhe kerünyü we vikuo.
6Kekreilamonyü gali khro zohu pro priepriekeshü tuoi,
mhalekemomia kenyü rei sümhie zo;
hau rei kemethuo zo.
7Mha pesekecüe mhakesimia chü penyawaya ketho zo,
tsiu thesoe u nou bie perhuwaya.
8Mha therieu ki puo thelau vikuo,
tsiu unou shügeshühiekecüe unou kemiakokecü ki vikuo.
9N nou meyie mhaita hie,
kekreilamonyü nouyie-e mhalekemomia merü nu baya.
10“Kiüdi teisozha kerieko haki vikuo ga?” sikecü pu hie,
kekreilamonyü no hau mhasi geinu ketso mokecü la.
11Mhasi-e vipie kayie mhie zo,
tsiu niaki nguyakezhako la puo kemevi ba.
12Kekreilamonyü mhasi rüguokelie-e raka rüguokelie mhie zo,
tsiu kesikele kevi sü mhasi-e kerhei khapie puo gei kebamia tsüyacüu zo.
13Ukepenuopfü mhathoko dze leshücie;
supuonie puoe bie kerüwikewau bie kemezhülie vi ga?
14Mhanyikelie nhie u neilie, tsiu kemezhiekelie nhie mha leliecie,
Kepenuopfüe sünie chü phreshü zo,
themia bu puo sie mhapuorei ngulie lho ükecü la.
Kelhou nu Lelie Kemoko
15A kelhou kemethuoyo nu mha hako pete nguwate; kemiathomia puo kemiatho nunu kaketa, tsiu kerüzhümia puo kerüzhü nunu lhou chakelie. 16No n thuo n üse miatho phi üta hie, morei n thuo n üse mhasi phi üta hie, kiüdi n thuo n pekawatuo mu? 17No n zho suothorta hie, morei mhalekemomia chüta hie; kiüdi n teiu mhodzü siatatieya ga? 18No hau thezelie tse vituo, tsiu kekreiu nunu n dzie teshü seta hie, kekreilamonyü Kepenuopfü preiyakezhamia sünie kenienie nu vi kehielietuo.
19Nadi nu kezhamia ker ki rei mhasi-e kekuo khapie mhakesimia tsükuoya.
20Ketho zo, kijü nu miapuorei miatho zo vo phouma moto di mha kevi chükecü ba mo zo.
21Siro mia diepu pete pele hiecie;
n kituomia n rüsekecü rünyülie rei silie lhomu.
22No va kekra mia rüsetayakecü n noue si ba zo.
23A mhasi se mha hako pete dojüwate; a sie, “A mhasilietuo,” derei süu a kinu pecieta. 24Mha kepecie nu ketuou, tsiu sou mu sou sekecüu, supuonie pfhüse parlie vi ga? 25A a nou kereipie silietuoü mu pfhüse partuoü tsiu mhasi pfhütuoü, mu puocapuola silietuoü sie zo, tsiu kerüzhüe mhalekemo zocü, siro mhalekemoe kenya zocü. 26Tsiu a thenumia kebie mhie zocüpfü, puo melou kebie mu jal, puo dzie sü kero kesia ki rei suokuokecü ngulie; Ukepenuopfü nei chüyakecümiae hapfü dzie nunu talietuo; derei kephoumamiae hapfü bu u teshülietuo. 27Harie, a hau nguliete, Pethakeshüue#7:27 Ibri Qoheleth, kepethau idi se vor. puya, mhacamhala silietuoü mhapuo pie kekreiu sashüshü vo. 28A noue süu pfhü mu pfhü la zo, derei a süu ngulie mo. Mia nyie puo donu thepfumia puo a ngulie, derei süko donu thenumia puorei ngulie mo. 29Harie, mha hau rübei a silie, süusü Ukepenuopfüe themia chü kemezhüshü zo, derei ukoe mharhü kekra pfhüse parte.
Currently Selected:
Pethakeshüu 7: ANBRBSI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More